Read La Bible en Malgache Hebreo 5 Bible Online

Hebreo 5 - La Bible en Malgache bible

Hebreo 5

¹Fa ny Mpisoronabe rehetra dia alaina amin’ny olona ka tendrena ho solon’ny olona hanao ny raharahan’Andriamanitra, hanolotra fanomezana sy fanatitra hanafaka ota.

²Izy dia olona izay mahay mitondra mora ny tsy mahalala sy ny mania, satria ny tenany koa dia mba hodidinin’ny fahalemena ihany;

³ary noho izany dia tsy maintsy hanolotra fanatitra hanafaka ota ho an’ny tenany koa izy, toy ny ataony ho an’ny olona ihany.

⁴Ary tsy misy maka izany voninahitra izany ho an’ny tenany afa-tsy izay antsoin’Andriamanitra, tahaka ny tamin’i Arona.

⁵Dia toy izany koa Kristy: Tsy Izy no nanandratra ny tenany ho Mpisoronabe fa Ilay niteny taminy hoe: «Zanako Ianao, Izaho no niteraka Anao androany» (Sal 2.7).

⁶Ary toy ny lazainy eo amin’ny teny hafa koa hoe: «Ianao no mpisorona mandrakizay araka ny fomban’i Melkizedeka» (Sal 110.4).

⁷Tamin’ny andron’ny nofony, raha nanao fivavahana sy fangatahana niaraka tamin’ny fitarainana mafy sy ranomaso be tamin’izay nahavonjy Azy tamin’ny fahafatesana Izy, ary nohenoina noho ny fahatahorany an’Andriamanitra,

⁸dia nianatra fankatoavana tamin’izay fahoriana noentiny Izy, na dia Zanaka aza.

⁹Ary rehefa nahatanteraka izany Izy dia tonga loharanon’ny famonjena mandrakizay ho an’izay rehetra mankatò Azy

¹⁰ka nambaran’Andriamanitra hoe Mpisoronabe araka ny fomban’i Melkizedeka.

¹¹Ny amin’izany dia manana teny maro sady sarotra hazavaina izahay satria lalodalovana ny sofinareo.

¹²Fa na dia tokony ho efa mpampianatra aza ianareo noho ny fotoana efa ela dia mbola mila izay hampianatra anareo ny abidim-pianaran’ny tenin’Andriamanitra indray; ary ianareo dia mbola toy izay tokony homen-dronono fa tsy ventin-kanina.

¹³Fa izay rehetra mivelona amin’ny ronono dia tsy zatra amin’ny tenin’ny fahamarinana satria mbola zazabodo.

¹⁴Fa ho an’izay efa lehibe ny ventin-kanina, dia ho an’izay manana ny saina efa zatra nampiasaina tsara ka mahay manavaka ny tsara sy ny ratsy.