Read La Bible en Malgache Hebreo 8 Bible Online

Hebreo 8 - La Bible en Malgache bible

Hebreo 8

¹Amin’izany zavatra lazainay izany dia izao no fotony: Manana Mpisoronabe toy izany isika, dia ilay mipetraka eo amin’ny ankavanan’ny sezafiandrianan’ny Avo indrindra any an-danitra

²ka manao fanompoam-pivavahana ao amin’ny fitoerana masina sy ny tena tabernakely* izay naorin’ny Tompo fa tsy nataon’olombelona.

³Fa ny Mpisoronabe rehetra dia tendrena hanolotra fanomezana sy fanatitra; ary amin’izany dia tsy maintsy mba manan-katolotra koa Izy.

⁴Koa raha etỳ ambonin’ny tany Izy dia tsy mba ho mpisorona akory satria efa misy rahateo ireo manolotra ny fanomezana araka ny lalàna,

⁵dia ireo manao fanompoam-pivavahana amin’izay endrika sy aloky ny zavatra any an-danitra, tahaka ny natoron’Andriamanitra an’i Mosesy, rehefa hanao ny tabernakely izy; fa hoy Izy: «Tandremo mba hataonao araka ny endrika izay naseho taminao tao an-tendrombohitra ny zavatra rehetra» (Eks 25.40).

⁶Fa ankehitriny dia fanompoana ambony lavitra noho ny an’ireny ny Azy, dia araka ny nanaovana Azy ho mpanalalana amin’ny fanekena tsara lavitra, izay natao tamin’ny teny fikasana tsara lavitra.

⁷Fa raha tsy nanan-tsiny izany fanekena voalohany izany dia tsy mba nilaina hotadiavina ny fanekena faharoa.

⁸Fa manome tsiny ny olona Izy hoe: «Indro, avy ny andro, hoy NY TOMPO, izay hanaovako fanekena vaovao amin’ny taranak’Israely sy ny taranak’i Joda,

⁹nefa tsy araka ny fanekena nataoko tamin’ny razany tamin’ny andro nitantanako azy sy nitondrako azy nivoaka avy tany amin’ny tany Ejipta; fa tsy nitoetra tamin’ny fanekeko izy ireny, ary Izaho koa dia tsy nitandrina azy, hoy NY TOMPO.

¹⁰Fa izao no fanekena hataoko amin’ny taranak’Israely, rehefa afaka izany andro izany, hoy NY TOMPO: Hataoko ao an-tsainy ny lalànako sady hosoratako ao am-pony, ary Izaho ho Andriamaniny ary ho oloko izy.

¹¹Ary samy tsy hampianatra ny namany sy ny rahalahiny avy izy ka hiteny hoe: Mahalalà NY TOMPO! Fa samy hahalala Ahy avokoa izy rehetra hatramin’ny kely indrindra ka hatramin’ny lehibe indrindra;

¹²fa hamindra fo amin’ny tsy fahamarinany Aho ary tsy hotsarovako intsony ny fahotany» (Jer 31.31-34).

¹³Rehefa milaza izy hoe vaovao dia noheveriny fa efa ela ny fanekena voalohany. Fa izay tratra ela sy mihaantitra dia efa madiva ho levona.