Read La Bible en Malgache Hebreo 9 Bible Online

Hebreo 9 - La Bible en Malgache bible

Hebreo 9

¹Koa na dia ny fanekena voalohany aza dia nanana fitsipika ny amin’ny fanompoam-pivavahana sy ny fitoerany masina etỳ an-tany.

²Fa nisy tabernakely* voavoatra: Ny efitra voalohany dia ilay atao hoe ny fitoerana masina izay nisy ny fitoeran-jiro sy ny latabatra ary ny mofo atao fanatitra.

³Tao ambadiky ny efitra lamba faharoa no nisy ny tabernakely izay atao hoe ny fitoerana masina indrindra.

⁴Tao no nisy alitara volamena fandoroana ditin-kazo manitra sy ny vata misy ny Fanekena izay voapetaka takelaka volamena manontolo; ary tao anatin’io no nisy ny vilany volamena izay nisy ny mana sy ny tehin’i Arona izay nitsimoka ary ny vato fisaky ny Fanekena;

⁵ary teo ambonin’io koa ny kerobima* misy voninahitra, izay nanaloka ny rakotra fanaovam-panavotana; tsy ho voalaza tsirairay ny amin’ireo ankehitriny.

⁶Rehefa voavoatra toy izany ireo zavatra ireo dia miditra eo amin’ny tabernakely voalohany hatrany ny mpisorona hanatanteraka ny fanompoam-pivavahana.

⁷Fa ny faharoa kosa no idiran’ny Mpisoronabe irery ihany indray mandeha isan-taona; ary izy aza dia tsy miditra raha tsy mitondra ra izay atolony noho ny amin’ny tenany sy ny fahadisoana nataon’ny olona amin’ny tsy fahalalana;

⁸koa izany no anambaran’ny Fanahy Masina fa mbola tsy voaseho ny lalana mankany amin’ny fitoerana masina indrindra, raha mbola ao ihany ny tabernakely voalohany;

⁹fanoharana ho amin’izao andro ankehitriny izao izany, ary araka izay no anolorana fanomezana sy fanatitra, izay tsy mahatanteraka ny mpivavaka ny amin’ny fieritreretany,

¹⁰fa momba ny zavatra hohanina sy ny zavatra hosotroina ary ny fisasana samihafa, dia fitsipika araka ny nofo, voatendry hatao mandra-piavin’ny fotoana fanavaozana izany.

¹¹Fa Kristy* kosa, tonga ho Mpisoronabe ny amin’ny zavatra tsara ho avy. Namakivaky teo amin’ny tabernakely* lehibe lavitra sady tsara lavitra izay tsy nataon-tanana Izy; izany hoe, tsy isan’izao zavatra ary izao.

¹²Niditra indray mandeha monja tao amin’ny fitoerana masina Izy, nefa tsy mba nitondra ran’osilahy sy ran-janak’omby Izy, fa ny ran’ny tenany dia ampy ahazoana fanavotana mandrakizay ho antsika.

¹³Fa raha ny ran’osilahy sy ny ran’ombilahy ary ny lavenon’ny vantotra ombivavy afafy amin’izay voaloto no manamasina ka manadio ny nofo,

¹⁴mainka fa ny ran’i Kristy, izay nanolotra ny tenany tsy manan-tsiny ho an’Andriamanitra, tamin’ny alalan’ny Fanahy mandrakizay, no hahadio ny fieritreretanareo ho afaka amin’ny asa maty mba hanompoanareo an’Andriamanitra velona.

¹⁵Ary noho izany dia mpanalalana amin’izay fanekena vaovao Izy, rehefa niaritra fahafatesana ho fanavotana amin’ny fahotana natao tamin’ny fanekena voalohany; izany dia mba hahazoan’izay voaantso ny teny fikasana ny amin’ny lova mandrakizay.

¹⁶Fa raha misy didim-pananana dia ilaina ny hahafantarana ny fahafatesan’ilay nanao ny fanekena.

¹⁷Fa manan-kery ny didim-pananana rehefa tonga ny fahafatesana; fa tsy manan-kery kosa izany raha mbola velona ilay nanao azy.

¹⁸Koa na dia ny fanekena voalohany aza dia tsy nohamasinina raha tsy nisy ra.

¹⁹Fa rehefa voalazan’i Mosesy tamin’ny vahoaka rehetra ny didy rehetra araka ny lalàna dia nalainy ny ran’ny zanak’omby sy ny ran’osilahy mbamin’ny rano sy ny volon’ondry jaky ary ny hisopa* ka nafafiny tamin’ny boky sy ny vahoaka rehetra;

²⁰dia hoy izy: «Ity no ran’ny fanekena izay nandidian’Andriamanitra anareo» (Eks 24.8).

²¹Ary ny tabernakely sy ny fanaka rehetra enti-manao fanompoam-pivavahana dia nofafazany ra toy izany koa.

²²Saiky diovina amin’ny ra avokoa ny zavatra rehetra araka ny lalàna; fa raha tsy misy ra alatsaka dia tsy misy famelan-keloka.

²³Koa dia tsy maintsy nodiovina tamin’ireny ny tandindon’ny zavatra any an-danitra, fa ny tenan’ny zavatra any an-danitra kosa dia tamin’izay fanatitra tsara noho ireny.

²⁴Fa Kristy tsy mba niditra tao amin’izay fitoerana masina nataon-tanana, izay tandindon’ny tena fitoerana masina, fa mankany an-danitra mihitsy; ary ankehitriny Izy dia miseho eo anatrehan’Andriamanitra ho antsika;

²⁵ary tsy niditra Izy mba hanolotra ny tenany matetika, tahaka ny Mpisoronabe miditra ao amin’ny fitoerana masina isan-taona mitondra ny ran’ny zavatra hafa;

²⁶fa raha izany dia tsy maintsy ho nijaly matetika Izy hatrizay nanaovana izao tontolo izao; fa ankehitriny dia efa naseho indray mandeha tamin’izao andro farany izao Izy mba hanafaka ny ota tamin’ny nanolorany ny tenany.

²⁷Ary tahaka ny nanendrena ny olona ho faty indray mandeha, koa rehefa afaka izany dia hisy fitsarana,

²⁸dia tahaka izany koa Kristy, rehefa natolotra indray mandeha hitondra ny otan’ny maro dia hiseho fanindroany, tsy amin’ota, fa ho famonjena kosa amin’izay miandry Azy.