Read La Bible en Malgache Jakoba 3 Bible Online

Jakoba 3 - La Bible en Malgache bible

Jakoba 3

¹Ry rahalahiko, aza dia samy ho mpampianatra avokoa ianareo rehetra satria fantatrareo fa ho mafimafy kokoa no hitsarana antsika mpampianatra.

²Mety diso amin’ny zavatra maro mantsy isika rehetra. Raha misy olona tsy mba mety diso amin’ny teniny dia izy no lehilahy tanteraka ka mahafehy ny tenany manontolo koa.

³Raha asiantsika lamboridy amin’ny vavan’ny soavaly mba hanarahany antsika dia mitondra ny tenany manontolo isika.

⁴Indreo koa ny sambo, na dia lehibe aza ireny ka entin’ny rivotra mahery, dia ahodin’ny familiana kely foana izy ho any amin’izay tian’ny mpitondra azy.

⁵Toy izany koa ny lela, taova kely izy kanefa mirehareha fatratra. Indro afo kely monja dia mahadoro ala lehibe!

⁶Afo koa ny lela, faharatsiana tsy hita lany: Eo amin’ny momba ny tenantsika dia ny lela no mampipentimpentina ny tena manontolo ka mandoro izao zavatra ary rehetra izao, sady arehitry ny afobe* izy.

⁷Folaka avokoa ny karazana bibidia rehetra sy ny vorona ary ny biby mandady sy mikisaka mbamin’ny any an-dranomasina. Eny, voafolaky ny olombelona ireny,

⁸nefa tsy misy olona mahafolaka ny lela; zava-dratsy tsy hay tohaina izy sady feno poizina mahafaty.

⁹Izy no isaorantsika ny Tompo, dia ny Ray; ary izy ihany koa no anozonantsika ny olona izay natao araka ny endrik’Andriamanitra.

¹⁰Avy amin’ny vava iray ihany no ivoahan’ny fisaorana sy ny fanozonana. Ry rahalahiko, tsy mety raha misy izany.

¹¹Moa ny loharano va mamoaka rano mamy sy mangidy eo amin’ny vavany iray ihany?

¹²Ry rahalahiko, ny aviavy va mety mamoa voan’oliva na ny voaloboka mamoa voan’aviavy? Toy izany koa ny loharano masirasira dia tsy mba ivoahan’ny rano mamy.

¹³Iza eo aminareo no hendry sy manam-pahalalana? Aoka hasehony amin’ny fitondrantena tsara ny asany, amin’ny fahalemem-panahy sy fahendrena.

¹⁴Fa raha misy fialonana mirehitra sy fiheveran-tena ho zavatra ao am-ponareo dia aza mirehareha na mandainga manohitra ny marina.

¹⁵Izany fahendrena izany dia tsy ilay avy any ambony fa araka ny etỳ an-tany ihany, araka ny nofo, araka ny demonia*.

¹⁶Fa izay misy fialonana sy fiheveran-tena ho zavatra dia misy fikorontanana mbamin’izay asa ratsy rehetra.

¹⁷Fa ny fahendrena izay avy any ambony dia, voalohany indrindra, madio, manaraka izany, tia fihavanana, mandefitra, mora alahatra, be famindrampo sy asa soa, tsy miangatra na mihatsaravelatsihy.

¹⁸Ary ny vokatry ny fahamarinana ao amin’ny fihavanana dia afafin’izay mikatsaka ny fihavanana.