Read La Bible en Malgache 1Petera 4 Bible Online

1Petera 4 - La Bible en Malgache bible

1Petera 4

¹Koa satria niaritra tamin’ny nofo Kristy* dia raiso mba ho fiadianareo koa izany saina izany; fa izay niaritra tamin’ny nofo dia efa nitsahatra tamin’ny ota

²mba tsy handanianareo ny andro sisa iainanareo amin’ny nofo araka ny filan’ny olona intsony, fa araka ny sitrapon’Andriamanitra.

³Fa ampy izay ny andro lasa ho nanaovana ny sitrapon’ny Jentilisa* tamin’ny nandehananareo tamin’ny fanaranam-po amin’ny ratsy sy ny fanirian-dratsy, ny fimamoana, ny filalaovan-dratsy, ny fisotroan-toaka ary ny fanompoan-tsampy izay fady indrindra.

⁴Amin’izany dia gaga izy ireo satria tsy miara-mihazakazaka aminy ianareo amin’izany fanaranam-po amin’ny ratsy izany ka teneniny ratsy;

⁵nefa hampamoahin’Ilay efa vonona hitsara ny velona sy ny maty izy.

⁶Fa noho izao no nitoriana ny Filazantsara tamin’izay maty aza mba hotsaraina araka ny olona amin’ny nofo izy fa ho velona araka an’Andriamanitra amin’ny fanahy.

⁷Fa antomotra ny faran’ny zavatra rehetra; koa hendre ka mahonòna tena mba ho afaka hivavaka ianareo.

⁸Ary mihoatra noho ny zavatra rehetra, mifankatiava tsara, fa «ny fitiavana no manarona fahotana maro» (Oha 10.12).

⁹Mifampiantranoa ka aza mimonomonona.

¹⁰Samia mifanompo araka ny fanomezam-pahasoavana izay noraisinareo, tahaka ny mpitantana tsara ny fahasoavan’Andriamanitra izay miasa amin’ny fomba maro samihafa.

¹¹Raha misy olona miteny dia aoka izy hiteny toy ny milaza tenin’Andriamanitra; raha misy olona manompo dia aoka izy hanao izany araka ny hery izay omen’Andriamanitra azy mba hankalazana an’Andriamanitra amin’ny zavatra rehetra amin’ny alalan’i Jesosy Kristy*; fa Azy ny voninahitra sy ny fanjakana mandrakizay mandrakizay. Amena*.

¹²Ry malala, aza gaga noho ny fizahan-toetra mahamay izay mahazo anareo, toy ny hoe misy zava-mahagaga manjo anareo.

¹³Fa mainka mifalia araka ny iombonanareo fijaliana amin’i Kristy* mba hifalianareo sy hiravoravoanareo koa amin’ny fisehoan’ny voninahiny.

¹⁴Sambatra ianareo raha haratsina noho ny anaran’i Kristy, fa ny Fanahin’ny voninahitra, dia ny Fanahin’Andriamanitra no mipetraka aminareo!

¹⁵Fa aoka tsy hisy eo aminareo hijaly satria mpamono olona, na mpangalatra na mpanao ratsy na mpitsabaka amin’ny raharahan’ny hafa.

¹⁶Fa raha misy mijaly satria Kristiana dia aoka tsy ho menatra izy; fa aoka hankalaza an’Andriamanitra amin’izany anarana izany izy.

¹⁷Fa tonga ny andro iantombohan’ny fitsarana hatrao amin’ny tranon’Andriamanitra. Ary raha miantomboka amintsika izany dia hanao ahoana kosa no hiafaran’izay tsy manaiky ny Filazantsaran’Andriamanitra?

¹⁸Ary «raha saika tsy voavonjy ny marina, inona no hahazo ny mpanota?» (Oha 11.31).

¹⁹Koa izay mitondra fahoriana araka ny sitrapon’Andriamanitra dia aoka ny fanaovan-tsoa no hanolorany ny tenany ho an’Ilay mahatoky, dia ny Mpanao azy.