Read La Bible en Malgache 2Petera 1 Bible Online

2Petera 1 - La Bible en Malgache bible

2Petera 1

¹I Simona Petera, mpanompo sy apostolin’i Jesosy Kristy*, no mamangy izay efa nahazo finoana sarobidy tahaka ny anay, amin’ny fahamarinan’i Jesosy Kristy, Andriamanitra sy Mpamonjy antsika:

²Hampitomboina ho anareo anie ny fahasoavana sy ny fiadanana amin’ny fahalalana tsara an’Andriamanitra sy Jesosy Tompontsika.

³Efa nomen’ny herin’Andriamanitra ho antsika ny zavatra rehetra momba ny fiainana sy ny toe-panahy araka an’Andriamanitra, amin’ny fahalalana Ilay niantso antsika tamin’ny voninahiny sy ny fahatsarany.

⁴Izany no nanomezana antsika ireo teny fikasana sady sarobidy no lehibe indrindra, mba ho tonga mpiombona amin’ny fomban’Andriamanitra amin’izany ianareo, rehefa afa-nandositra ny fahalovana izay eo amin’izao tontolo izao noho ny filana.

⁵Noho izany indrindra dia manaova izay zotom-po rehetra kosa ianareo, koa amin’ny finoanareo dia manehoa fahatanjahan-tsaina, ary amin’ny fahatanjahan-tsainareo dia fahalalana,

⁶ary amin’ny fahalalanareo dia fahononam-po, ary amin’ny fahononam-ponareo dia faharetana, ary amin’ny faharetanareo dia toe-panahy araka an’Andriamanitra,

⁷ary amin’ny toe-panahinareo araka an’Andriamanitra dia fitiavana ny rahalahy, ary amin’ny fitiavanareo ny rahalahy dia fitiavana ny olona rehetra.

⁸Fa raha anananareo izany zavatra izany sady anananareo betsaka dia tsy avelan’izany ho malaina na tsy hahavokatra ianareo amin’ny fahalalana tsara an’i Jesosy Kristy* Tompontsika.

⁹Fa izay tsy manana izany zavatra izany kosa dia jamba; tsy mahajery lavitra izy sady nanadino ny nanadiovana azy tamin’ny fahotany fahiny.

¹⁰Noho izany indrindra, ry rahalahy, mazotoa kosa hampitoetra ny fiantsoana sy ny fifidianana anareo. Fa raha manao izany zavatra izany ianareo dia tsy ho tafintohina akory mandrakizay.

¹¹Fa toy izany no hanomezana malalaka ho anareo ny fidirana ho any amin’ny fanjakana mandrakizay izay an’i Jesosy Kristy Tompontsika sy Mpamonjy antsika.

¹²Koa hampahatsiaro anareo mandrakariva ny amin’izany zavatra izany aho, na dia efa fantatrareo aza ka efa tafaorina tsara amin’ny fahamarinana izay efa eo aminareo ianareo.

¹³Fa raha mbola eto amin’ity tranolay ity aho dia ataoko fa mety ny hanaitaitra ny fahatsiarovanareo

¹⁴satria fantatro fa ho avy tampoka ny hanesorana ny tranolaiko, araka izay nasehon’i Jesosy Kristy Tompontsika tamiko koa.

¹⁵Koa hataoko izay azoko atao mba hisy hotsarovanareo mandrakariva izany zavatra izany rehefa maty aho.

¹⁶Fa tsy mba niankina tamin’izay anganongano noforonin’ny hafetsen’ny saina izahay raha nampahafantatra anareo ny hery sy ny fiavian’i Jesosy Kristy* Tompontsika, fa efa hitan’ny masonay ny fiandrianany.

¹⁷Fa nahazo laza amam-boninahitra tamin’Andriamanitra Ray Izy raha tonga taminy avy tamin’ny voninahitra lehibe indrindra ilay feo hoe: «Ity no Zanako malalako izay sitrako» (Mat 17.5).

¹⁸Renay io feo avy tany an-danitra io raha niaraka taminy tany amin’ny tendrombohitra masina izahay.

¹⁹Ary manana ny teny faminaniana natao mafy orina kokoa isika ka tsara ny ataonareo raha mitandrina izany ianareo, fa toy ny jiro mamirapiratra ao amin’ny toerana maizina izany, mandra-pahazava ny andro ka miposaka ao am-ponareo ny kintana fitarikandro.

²⁰Fa fantatrareo voalohany indrindra fa ny famoahan-kevitry ny faminaniana ao amin’ny Soratra Masina dia tsy efan’ny fisainan’ny olona fotsiny ihany;

²¹fa tsy nisy faminaniana avy tamin’ny sitrapon’ny olona tany aloha rehetra; fa avy tamin’Andriamanitra no nitenenan’ny olona araka izay nitondran’ny Fanahy Masina azy.