Read La Bible en Malgache Mpitsara 10 Bible Online

Mpitsara 10 - La Bible en Malgache bible

Mpitsara 10

¹Taorianan’i Abimeleka dia nitsangana hamonjy ny Israely i Tola, zanak’i Poa, zanak’i Dodo, lehilahy avy tamin’Isakara; izy dia nonina tao Samira, any amin’ny tany be havoana any Efraima.

²Nitsara ny Israely nandritra ny telo amby roapolo taona izy dia maty ka nalevina tao Samira.

³Nitsangana nandimby azy i Jaira gileadita ka nitsara ny Israely nandritra ny roa amby roapolo taona.

⁴Nanana zanakalahy telopolo izay nitaingina borikilahy tanora telopolo izy sady nanana tanàna telopolo any amin’ny tany Gileada; antsoina hoe Havota-Jaìra ireny mandraka androany.

⁵Dia maty i Jaira ka nalevina tany Kamona.

⁶Ary ny Zanak’Israely dia nanao izay ratsy ihany teo imason’NY TOMPO ka nanompo ireo Baala* sy ireo Astarta*, ireo andriamanitr’i Siria, ireo andriamanitr’i Sidona, ireo andriamanitr’i Moaba, ireo andriamanitry ny Amonita ary ireo andriamanitry ny Filistina. Nahafoy NY TOMPO izy ka tsy nanompo Azy intsony.

⁷Dia nirehitra tamin’ny Israely ny fahatezeran’NY TOMPO ka nivarotra azy ho eo an-tanan’ny Filistina sy ho eo an-tanan’ny Amonita Izy.

⁸Namoritra sy nanao tsindry hazo lena ny Zanak’Israely ireo tamin’izany taona izany; valo amby folo taona no nampahoriany ny Zanak’Israely rehetra izay tany andafin’i Jordana, tany amin’ny tanin’ny Amorita any Gileada.

⁹Nita ny Jordana ny Amonita mba hiady amin’i Joda sy i Benjamina koa ary ny taranak’i Efraima ka tra-pahoriana mafy ny Israely.

¹⁰Dia nitaraina tamin’NY TOMPO ny Zanak’Israely hoe: Efa nanota Taminao izahay, satria nahafoy an’Andriamanitray ka nanompo ireo Baala.

¹¹Hoy NY TOMPO tamin’ny Zanak’Israely: Moa tsy nampahory anareo va ny Ejiptiana, ny Amorita, ny Amonita, ny Filistina,

¹²ny Sidoniana, ny Amalekita ary ny Maonita ka nitaraina Tamiko ianareo dia novonjeko tamin’ny tanany?

¹³Nefa nahafoy Ahy ianareo ka nanompo andriamanitra hafa. Koa izany no tsy hamonjeko anareo intsony.

¹⁴Mandehana mitaraina amin’ireo andriamanitra izay nofidinareo! Aoka ireo no hamonjy anareo amin’ny andron’ny fahorianareo!

¹⁵Ary hoy ny Zanak’Israely tamin’NY TOMPO: Efa nanota izahay; ataovy aminay izay rehetra sitrakao. Kanefa mba afaho ihany izahay anio!

¹⁶Dia nanary ireo andriamanitra hafa tao aminy izy ka nanompo NY TOMPO; tsy nahazaka nijery ny fijalian’ny Israely intsony NY TOMPO.

¹⁷Nivory ny Amonita ka nitoby tany Gileada. Nivory kosa ny Zanak’Israely ka nitoby tany Mizpa.

¹⁸Dia nifampiera ny olona, dia ireo andrianan’i Gileada hoe: Iza no lehilahy handeha voalohany hiady amin’ny Amonita? Ho lohany amin’ny mponina rehetra any Gileada izy!