Read La Bible en Malgache Mpitsara 12 Bible Online

Mpitsara 12 - La Bible en Malgache bible

Mpitsara 12

¹Ary nivory ny lehilahin’i Efraima dia nandeha nianavaratra ka niteny tamin’i Jefta hoe: Nahoana no nandeha niady tamin’ny Amonita ianao ka tsy mba niantso anay hiaraka aminao? Hodoranay amin’ny afo ny tranonao sy ianao!

²Fa hoy i Jefta taminy: Izaho sy ny oloko dia niady mafy tamin’ny Amonita; ary niantso anareo aho, nefa tsy namonjy ahy tamin’ny tanany ianareo.

³Koa rehefa hitako fa tsy namonjy ahy ianareo dia nanao ny aiko tsy ho zavatra aho ka nandeha niady tamin’ny Amonita ary natolotry NY TOMPO teo an-tanako izy. Koa nahoana ianareo no miakatra hila ady amiko amin’ity andro ity?

⁴Ary namory ny lehilahin’i Gileada rehetra i Jefta ka niady tamin’i Efraima. Dia namely an’i Efraima ny lehilahin’i Gileada, satria hoy ireo: Ianareo Gileadita dia mpandositra avy tamin’i Efraima, ao amin’ny taranak’i Efraima sy i Manase!

⁵Dia novonjen’ny Gileadita ny fitàna any Jordana mankany amin’i Efraima. Rehefa niteny ny mpandositra avy amin’i Efraima hoe: Aoka mba hita aho, dia hoy ny lehilahin’ny Gileada taminy: Efraimita va ianao? Ary raha hoy izy: Tsia,

⁶dia hoy izy ireo taminy: Tonòny ary ny hoe Shiboleta. Dia hoy izy: Siboleta, satria tsy nahay nanonona izany marina izy. Dia nisambotra azy izy ireo ka namono azy teo amin’ny fitàna ao Jordana; nahafatesana roa arivo sy efatra alina ny Efraimita tamin’izany andro izany.

⁷Enina taona no nitondran’i Jefta ny Israely. Dia maty i Jefta gileadita ka nalevina tao amin’ny tanàna iray any Gileada.

⁸Ibzana, avy any Betlehema, no nitsara ny Israely taorianan’i Jefta.

⁹Nanana zanakalahy telopolo sy zanakavavy telopolo, izay nampanambadiny tany ivelany izy, ary zazavavy telopolo kosa no nampidiriny ho an’ny zanany lahy. Nitsara ny Israely nandritra ny fito taona izy;

¹⁰dia maty Ibzana ka nalevina tany Betlehema.

¹¹Ary i Elona Zebolonita no nitsara ny Israely taorianany. Nitsara ny Israely folo taona izy;

¹²dia maty i Elona Zebolonita ka nalevina tany Aialona ao amin’ny tanin’i Zebolona.

¹³Taorianany dia i Abdona, zanak’i Elela, avy any Piratona, no nitsara ny Israely.

¹⁴Nanana zanakalahy efapolo sy zafy telopolo izay nitaingina borikilahy tanora fitopolo izy ary nitsara ny Israely nandritra ny valo taona;

¹⁵dia maty i Abdona, zanak’i Elela, avy any Piratona, ka nalevina tany Piratona, any amin’ny tanin’i Efraima any amin’ny tendrombohitry ny Amalekita.