Read La Bible en Malgache Mpitsara 17 Bible Online

Mpitsara 17 - La Bible en Malgache bible

Mpitsara 17

¹Nisy lehilahy tany amin’ny tany be havoana any Efraima, nantsoina hoe Mika.

²Hoy izy tamin’ny reniny: Ilay volafotsy zato sy arivo sekela nisy naka taminao, izay nasianao ozona, sady nolazainao teo anatrehako izany, indro, ato amiko ny volafotsy; izaho no naka azy. Dia hoy reniny: Hotahìn’NY TOMPO anie ny zanako!

³Rehefa naveriny tamin’ny reniny ny volafotsy zato sy arivo sekela dia hoy reniny: Atokako ho an’NY TOMPO tanteraka ity vola avy amin’ny tanako ity ka atolotro ho an’ny zanako hanaovana sarin-javatra voasokitra sy sarin-javatra voarendrika, ary ankehitriny dia averiko aminao izy.

⁴Rehefa naveriny tamin’ny reniny ary ny volafotsy dia naka volafotsy roanjato sekela ny reniny ka nomeny ny mpanefy volafotsy izany mba hataony sarin-javatra voasokitra sy sarin-javatra voarendrika. Dia natao tao an-tranon’i Mika izany.

⁵Dia tonga nanana tranon’Andriamanitra ary izany lehilahy natao hoe Mika izany; nanamboatra efoda* sy terafima* izy ary ny zanany lahy iray no natokany ho mpisorony.

⁶Tamin’izany andro izany dia tsy nisy mpanjaka teo amin’ny Israely fa samy nanao izay noheveriny ho mety avy ny olona rehetra.

⁷Nisy zatovo iray, avy any Betleheman’i Joda, tamin’ny fianakavian’i Joda; levita* izy io ary mpivahiny nitoetra tao.

⁸Ary niala tao amin’ny tanàna Betleheman’i Joda Ralehilahy mba hivahiny any amin’izay azony hitoerana; nony nandeha izy dia tonga tany amin’ny tany be havoana any Efraima tao amin’ny tranon’i Mika.

⁹Hoy i Mika taminy: Avy aiza moa ianao? Hoy izy taminy: Levita avy any Betleheman’i Joda aho ka handeha hivahiny any amin’izay azoko hitoerana.

¹⁰Dia hoy i Mika taminy: Mitoera atỳ amiko ianao, ary aoka ho raiko sy ho mpisoroko ianao, dia homeko sekela volafotsy folo isan-taona sy fitafiana ampy ary sakafo. Dia lasa nandeha ilay levita.

¹¹Avy eo dia nanaiky hitoetra tao amin-dRalehilahy ilay levita ka tonga tahaka ny zanany.

¹²Dia natokan’i Mika ilay levita ka tonga mpisorony; nitoetra tao an-tranon’i Mika izy.

¹³Dia hoy i Mika: Fantatro izao fa hanisy soa ahy NY TOMPO satria manana ity levita ity ho mpisoroko aho.