Read La Bible en Malgache Mpitsara 6 Bible Online

Mpitsara 6 - La Bible en Malgache bible

Mpitsara 6

¹Ary nanao izay ratsy teo imason’NY TOMPO ny Zanak’Israely ka natolotry NY TOMPO ho eo an-tanan’ny Midianita nandritra ny fito taona.

²Nanampatra ny heriny tamin’ny Israely ny Midianita ka ny tahotra ny Midianita no nanamboaran’ny Zanak’Israely fierena tany an-tendrombohitra sy zohy ary toeram-pialofana.

³Rehefa namafy ny Israely dia niakatra hanafika azy ny Midianita sy ny Amalekita ary ireo zanaky ny Atsinanana.

⁴Nitoby tandrifiny ireny ka nanimba ny vokatry ny tany, hatrany akaikin’i Gaza; tsy nisy zavatra navelany mba hiveloman’ny Israely, na ondry na osy na omby na boriky.

⁵Rehefa nanafika izy ireny dia nitondra ny omby aman’ondriny sy ny tranolainy niaraka taminy ka ny fiaviny dia tahaka ny valala maro be; eny, tsy hita isa izy ireny sy ny ramevany; niditra tao amin’ny tany ireny mba handrava azy.

⁶Dia nahantra indrindra ny Israely noho ny Midianita ka nitaraina tamin’NY TOMPO.

⁷Ary rehefa nitaraina tamin’NY TOMPO ny Zanak’Israely noho ny Midianita

⁸dia nirahin’NY TOMPO ho any amin’ny Zanak’Israely ny mpaminany iray izay nilaza taminy hoe: Izao no lazain’NY TOMPO, Andriamanitry ny Israely: Izaho no nitondra anareo niakatra avy tany Ejipta, sady nitondra anareo nivoaka avy tany amin’ny trano nanandevozana

⁹ary nanafaka anareo tamin’ny tanan’ny Ejiptiana sy ny tanan’izay rehetra nampahory anareo. Nandroaka ireny teo anoloanareo Aho ka nomeko anareo ny taniny.

¹⁰Hoy Aho taminareo: Izaho no TOMPO Andriamanitrareo. Aza matahotra ny andriamanitry ny Amorita izay tompon’ny tany onenanareo. Nefa tsy nihaino ny feoko ianareo.

¹¹Dia tonga ilay Anjelin’NY TOMPO* ka nipetraka teo ambanin’ny hazo terebinta* teo Ofra, izay an’i Joasy Abiezerita. Tamin’izay i Gideona zanany dia nively vary tao amin’ny famiazam-boaloboka mba hanafenany azy tamin’ny Midianita.

¹²Ary niseho taminy ilay Anjelin’NY TOMPO ka niteny taminy hoe: NY TOMPO no momba anao, ry lehilahy mpiady mahery!

¹³Fa hoy i Gideona taminy: Indrisy tompoko, raha momba anay NY TOMPO, nahoana no mihatra aminay izao zavatra rehetra izao? Aiza ny fahagagana rehetra nataony, izay notantarain’ny razanay taminay hoe: Tsy nitondra antsika niakatra avy tany Ejipta va NY TOMPO? Fa ankehitriny, efa nahafoy anay mihitsy NY TOMPO ka nanolotra anay eo an-tanan’ny Midianita.

¹⁴Dia nitodika nijery azy NY TOMPO ka niteny hoe: Mandehana amin’izao herinao izao ka vonjeo amin’ny tanan’ny Midianita ny Israely. Tsy efa naniraka anao va Aho?

¹⁵Fa hoy i Gideona Taminy: Indrisy, Tompo ô, amin’ny alalan’ny inona no hanafahako ny Israely? E! ny ankohonako no kely hery indrindra eo amin’ny Manase, ary izaho no kely indrindra amin’ny ankohonan’ny raiko!

¹⁶Dia hoy NY TOMPO taminy: Homba anao tokoa Aho ka hamely ny Midianita toy ny famely olona iray monja ianao.

¹⁷Dia hoy izy Taminy: Miangavy Anao aho, raha mahita fitia eto imasonao, mba anehoy famantarana aho fa Ianao tokoa no miteny amiko.

¹⁸Miangavy Anao mba tsy hiala eto mandra-piaviko hitondra fanatitra ka hapetrako eto anatrehanao izany. Dia hoy Izy: Eny, hiandry Aho mandra-piverinao.

¹⁹Dia lasa i Gideona nanomana zanak’osy sy mofo tsy misy masirasira tamin’ny koba eran’ny efaha*; ny hena dia nataony tao anaty harona ary ny ron-kena dia nataony tao anaty vilany; dia noentiny ho eo Aminy teo ambanin’ilay hazo terebinta izany ka natolony Azy.

²⁰Ary hoy ilay Anjelin’Andriamanitra* taminy: Raiso ny hena sy ny mofo tsy misy masirasira ka apetraho eo ambonin’irỳ harambato irỳ, ary araraho eo amboniny ny ron-kena. Dia nataony izany.

²¹Ary naroson’ilay Anjelin’NY TOMPO ny lohan’ny tehina izay teny an-tanany ka notendreny ny hena sy ny mofo tsy misy masirasira; dia nisy afo nivoaka avy tamin’ny vatolampy ka nandevona ny hena sy ny mofo tsy misy masirasira. Dia lasa ilay Anjelin’NY TOMPO ka tsy hitan’ny masony.

²²Dia hitan’i Gideona fa Anjelin’NY TOMPO ilay teo ka hoy izy: Andray, ry TOMPO Andriamanitra ô! Hay, nahita ilay Anjelin’NY TOMPO nifanatrika aho!

²³Fa hoy NY TOMPO taminy: Fiadanana anie ho anao; aza matahotra; tsy ho faty ianao tsy akory.

²⁴Ary nanorina alitara teo ho an’NY TOMPO i Gideona, ary ny anarany dia nataony hoe Adonay-Shalom, na: NY TOMPO dia fiadanana. Mbola ao Ofran’ilay Abiezerita izany mandraka androany.

²⁵Tamin’iny alina iny ihany dia hoy NY TOMPO taminy: Alao ny ombilahin-drainao, dia ilay ombilahy faharoa izay fito taona ka ravao ny alitaran’ny Baala* izay an’ny rainao, ary kapao ny tsangankazon-tsampy ho an’ny Aseraha* izay eo anilany.

²⁶Dia manorena alitara ho an’NY TOMPO Andriamanitrao eto an-tampon’ity toeram-piarovana ity ka amboary tsara araka izay tokony ho izy izany. Ary alao ilay ombilahy faharoa ka atolory ho fanatitra dorana manontolo amin’ny hazo avy amin’ilay tsangankazon-tsampy ho an’ny Aseraha izay hokapainao.

²⁷Dia naka folo lahy tamin’ny mpanompony i Gideona ka nanatanteraka araka izay nolazain’NY TOMPO taminy; ary satria natahotra ny fianakavian-drainy sy ireo lehilahy tao an-tanàna izy dia tsy nanao izany tamin’ny antoandro, fa tamin’ny alina no nanaovany azy.

²⁸Nony nifoha vao maraina ny lehilahy tao an-tanàna ka nahita fa indro, potika ny alitaran’ny Baala sady voakapa ny tsangankazon-tsampy ho an’ny Aseraha izay teo anilany, ary ilay ombilahy faharoa dia efa natao fanatitra dorana manontolo teo ambonin’ilay alitara izay voaorina,

²⁹dia nifanontany izy ireo hoe: Iza re no nanao izao zavatra izao? Ary rehefa nikaroka sy nanadihady izy ireo dia nilaza hoe: I Gideona, zanak’i Joasy, no nanao izao zavatra izao!

³⁰Dia hoy ireo lehilahy tao an-tanàna tamin’i Joasy: Avoahy ny zanakao mba hovonoina satria nandrava ny alitaran’ny Baala izy sady nikapa ny tsangankazon-tsampy ho an’ny Aseraha teo anilany!

³¹Hoy i Joasy tamin’izay rehetra nitsangana teo anatrehany: Ianareo va no handahatra hiaro ny Baala? Ianareo va no hamonjy azy? Izay handahatra hiaro ny Baala dia hovonoina alohan’ny andro maraina! Raha andriamanitra ny Baala, aoka izy handahatra hiaro ny tenany, satria nisy nandrava ny alitarany!

³²Tamin’izany andro izany, ny anaran’i Gideona dia natao hoe Jerobaala[5], satria hoy ny olona: Aoka ny Baala no hifandahatra aminy satria noravany ny alitarany.

³³Ary nivory ny Midianita rehetra sy ny Amalekita ary ny zanaky ny Atsinanana, dia nita ka nitoby teny amin’ny tany lemaka Jezirela.

³⁴Ary notafina ny Fanahin’NY TOMPO i Gideona; dia nitsoka anjomara izy ka nivory nanaraka azy ny Abiezerita.

³⁵Naniraka olona nankany amin’ny Manase rehetra izy, dia nivory nanaraka azy ireo. Naniraka olona tany amin’ny Asera sy ny Zebolona ary ny Naftaly izy dia niakatra nitsena azy koa ireo.

³⁶Ary hoy i Gideona tamin’Andriamanitra: Raha hamonjy ny Israely amin’ny tanako tokoa Ianao araka izay nolazainao,

³⁷indro, hapetrako eo amin’ny famoloana ity faham-bolon’ondry iray ity; koa raha ny volon’ondry ihany no lenan’ny ando fa maina kosa ny tany manontolo dia ho fantatro fa ny tanako no hamonjenao ny Israely araka izay nolazainao.

³⁸Dia nisy tokoa izany. Nifoha vao maraina izy dia nofiazany ny volon’ondry ka nisy ranonando nikoriana avy taminy ary nahafeno lovia iray.

³⁹Hoy ihany i Gideona tamin’Andriamanitra: Aoka tsy hirehitra amiko ny fahatezeranao fa hiteny izao indray mandeha izao monja aho. Aoka mba hozahako izao indray mandeha izao monja ny amin’ny volon’ondry: Aoka ny volon’ondry ihany no ho maina fa ny tany manontolo kosa no ho lenan’ny ando.

⁴⁰Dia nataon’Andriamanitra izany tamin’ny alin’iny, koa ny volon’ondry ihany no maina fa ny tany manontolo kosa dia lenan’ny ando.