Read La Bible en Malgache Mpitsara 8 Bible Online

Mpitsara 8 - La Bible en Malgache bible

Mpitsara 8

¹Ary hoy ny lehilahin’i Efraima tamin’i Gideona: Ahoana izao zavatra nataonao taminay izao no tsy mba nantsoinao izahay raha nandeha hiady tamin’ny Midianita ianao? Dia nanome tsiny azy mafy ireo.

²Hoy i Gideona taminy: Zinona izao nataoko izao raha oharina amin’izay nataonareo? Tsy tsara noho ny fiotazam-boalobok’i Abiezera va ny fitsimponam-boalobok’i Efraima?

³Teo an-tananareo no nanoloran’Andriamanitra ny manamboninahitry ny Midianita, dia i Oreba sy i Zeba. Inona no azoko atao raha oharina amin’ny nataonareo? Rehefa nilaza izany teny izany i Gideona dia nitony ny fahatezeran’ireo taminy.

⁴Ary nankany Jordana i Gideona dia nita izy sy ny telonjato lahy niaraka taminy, koa na dia efa reraka aza izy dia mbola nanenjika ihany.

⁵Dia hoy izy tamin’ny mponina tao Sokota: Miangavy anareo aho, mba omeo mofo ny olona manaraka ahy fa reraka. Izaho izao dia manenjika an’i Zebaha sy i Zalmona, mpanjakan’ny Midianita.

⁶Nefa hoy ireo manamboninahitr’i Sokota: Moa efa eo am-pelatananao va i Zebaha sy i Zalmona ankehitriny no homenay mofo ny miaramilanao?

⁷Dia hoy i Gideona: Rehefa voatolotry NY TOMPO eo an-tanako i Zebaha sy i Zalmona dia horotidrotehiko amin’ny tsilo avy any an-tany efitra sy ny songosongo ny tenanareo.

⁸Ary niakatra avy teo izy ka nankany Penoela dia nanao teny tahaka izany koa tamin’ny olona tao. Ary ny mponina tao Penoela koa dia namaly azy tahaka ny navalin’ny mponina tao Sokota ihany.

⁹Dia niteny tamin’ny mponina tao Penoela koa izy hoe: Raha tafaverina soa amantsara aho dia horavako ity manda avo ity.

¹⁰Ary i Zebaha sy i Zalmona dia tonga tao Karkora, niaraka tamin’ny miaramila tokony ho lehilahy dimy arivo sy iray alina, dia izay rehetra sisa tavela tamin’ny miaramila rehetra izay an’ny zanaky ny Atsinanana; ny maty kosa dia roa alina sy iray hetsy, samy lehilahy mpitan-tsabatra avokoa.

¹¹Ary i Gideona dia niakatra tamin’ny lalan’ny mpitoetra an-tranolay, any atsinanan’i Noba sy i Jogbeha ka namely ny toby raha ilay mbola tsy nanampo iny ny olona.

¹²Dia nandositra i Zebaha sy i Zalmona ary nanenjika azy i Gideona ka nisambotra ny mpanjaka midianita roa lahy, dia i Zebaha sy i Zalmona, ary nopotehiny ny tafika manontolo.

¹³Dia niverina avy tamin’ny ady, avy teo amin’ny fiakaran’i Heresa i Gideona, zanak’i Joasy.

¹⁴Nisambotra zatovo iray tamin’ny mponina tao Sokota izy ka nanadihady azy; dia nosoratan’ilay zatovo ny anaran’ireo olo-manankajan’i Sokota sy ny loholona tao izay nisy fito amby fitopolo lahy.

¹⁵Avy eo dia nankany amin’ny mponina tao Sokota i Gideona ka niteny hoe: Indreo i Zebaha sy i Zalmona izay efa nandatsanareo ahy hoe: Moa efa eo am-pelatananao ankehitriny va ny tanan’i Zebaha sy i Zalmona no homenay mofo ny olonao efa reraka?

¹⁶Dia naka ny loholona tao an-tanàna izy ary tsilo avy tany an-tany efitra sy songosongo ka ireny no noentiny nandrotidrotehana ny mponina tao Sokota.

¹⁷Nandrava ny manda avo tao Penoela koa izy ka namono ny lehilahy tao an-tanàna.

¹⁸Dia hoy izy tamin’i Zebaha sy i Zalmona: Lehilahy toy inona ange ireo izay novonoinareo tany Tabara? Hoy izy roa lahy: Tahaka anao izao izy. Izy rehetra dia samy miendrika zanaka mpanjaka avokoa.

¹⁹Hoy i Gideona: Rahalahiko, zanaky ny reniko, ireo. Raha velona koa NY TOMPO, tsy mba hovonoiko ianareo raha novelominareo ireo!

²⁰Dia hoy izy tamin’i Jetera lahimatoany: Mitsangàna, vonoy izy roa lahy! Fa tsy nanatsoaka ny sabany ilay zatovo fa natahotra: Mbola tanora fanahy loatra izy.

²¹Hoy i Zebaha sy i Zalmona: Aoka ianao no hitsangana hamely anay! Fa araka ny toetry ny olona ihany ny heriny. Dia nitsangana i Gideona ka namono an’i Zebaha sy i Zalmona ary naka ny ravaka sarim-bolan-tsinana izay teo amin’ny vozon’ny ramevany.

²²Hoy ny lehilahin’ny Israely tamin’i Gideona: Aoka ianao sy ny zanakao ary ny zafinao no hanapaka aminay fa namonjy anay tamin’ny tanan’ny Midianita ianao.

²³Fa hoy i Gideona taminy: Tsy hanapaka aminareo aho, ary tsy hanapaka aminareo koa ny zanako; NY TOMPO ihany no hanapaka aminareo.

²⁴Ary mbola niteny taminy koa i Gideona hoe: Hangataka zavatra iray aminareo aho: Aoka samy hanome ahy kavina avy amin’ny babony avy ianareo. Nanana kavina volamena mantsy ireny satria Ismaelita.

²⁵Dia hoy izy ireo: Eny, homenay tokoa izany. Dia namelatra lamba ny olona ka samy nanipy kavina izay avy tamin’ny babony teo.

²⁶Ny lanjan’ny kavina volamena nangatahiny dia volamena fitonjato sy arivo sekela, afa-tsy ny ravaka sarim-bolan-tsinana, ny kavina voavola ary ny lamba volomparasy izay teny amin’ireo mpanjakan’ny Midianita, ary koa ny ravaka izay teny amin’ny vozon’ny ramevany.

²⁷Dia nanaovan’i Gideona efoda[6] ireo ka nataony tao an-tanànany, tao Ofra; ary ny Israely rehetra dia nankany ka nijangajanga nanaraka izany efoda izany; tonga fandrika tamin’i Gideona sy ny ankohonany izany.

²⁸Voaetry teo anoloan’ny Zanak’Israely ny Midianita ka tsy nahatraka ny lohany intsony. Nandry nandritra ny efapolo taona ny tany tamin’ny andron’i Gideona.

²⁹Lasa nandeha i Jerobaala, zanak’i Joasy, ka nitoetra tao an-tranony.

³⁰Nanan-janaka fitopolo lahy izay naterany i Gideona, satria maro ny vadiny.

³¹Ny vady tsindranony izay tany Sekema dia niteraka zazalahy iray taminy koa, ary ny anarany dia nataony hoe Abimeleka.

³²Dia maty i Gideona, zanak’i Joasy, rehefa tratra antitra tsara, ka nalevina tao amin’ny fasan’i Joasy rainy tao Ofran’ny Abiezerita.

³³Rehefa maty i Gideona dia nijangajanga nanaraka ireo Baala* indray ny Zanak’Israely ka nanao an’i Baala-Berita ho andriamaniny.

³⁴Ary ny Zanak’Israely dia tsy nahatsiaro NY TOMPO Andriamaniny izay nanafaka azy tamin’ny tanan’ny fahavalony rehetra nanodidina azy

³⁵sady tsy mba nanao soa tamin’ny taranak’i Jerobaala na Gideona, araka ny soa rehetra nataon’i Gideona tamin’ny Israely.