Read La Bible en Malgache 2Jaona 1 Bible Online

2Jaona 1 - La Bible en Malgache bible

2Jaona 1

¹Izaho loholona[1] no mamangy an’Itompokovavy[2] voafidy sy ny zanany, izay tiako amin’ny fahamarinana, ary tsy izaho ihany, fa izay rehetra mahalala ny marina koa

²noho ny fahamarinana izay mitoetra ato anatintsika sady ho ato amintsika mandrakizay:

³Ho amintsika ny fahasoavana sy ny famindrampo ary ny fiadanana avy amin’Andriamanitra Ray sy Jesosy Kristy*, Zanaky ny Ray, amin’ny fahamarinana sy ny fitiavana.

⁴Faly indrindra aho satria misy hitako ny zanakao sasany mandeha amin’ny marina araka ny nandraisantsika didy tamin’ny Ray.

⁵Ary mangataka aminao aho ankehitriny, tompokovavy, tsy toy ny manoratra didy vaovao aminao, fa ilay nananantsika hatramin’ny voalohany ihany, dia aoka hifankatia isika.

⁶Ary izao no fitiavana dia ny handehanantsika araka ny didiny. Izany no didy, tahaka ny efa renareo hatramin’ny taloha ihany dia ny handehananareo aminy.

⁷Fa maro ny mpamitaka efa lasa any amin’izao tontolo izao, ireny dia tsy manaiky fa efa tonga tamin’ny nofo Jesosy Kristy*. Izany no mpamitaka sy antikristy.

⁸Mitandrema ianareo, fandrao mahavery izay namonoanay tena, fa mba handraisanareo valim-pitia tanteraka kosa.

⁹Izay rehetra mitarika nefa tsy mitoetra ao amin’ny fampianaran’i Kristy dia tsy manana an’Andriamanitra. Izay mitoetra ao amin’ny fampianarana dia izy no manana ny Ray sy ny Zanaka.

¹⁰Raha misy olona mankeo aminareo ka tsy mitondra izao fampianarana izao, aza mampiantrano azy na miarahaba azy akory;

¹¹fa izay miarahaba azy dia miombona amin’ny ratsy ataony.

¹²Manana zavatra maro hosoratana aminareo aho, nefa tsy tiako hatao amin’ny taratasy sy ny ranomainty izany; fa manantena ho tonga atỳ aminareo aho ka hiteny mifanatrika mba ho tanteraka ny fifalianareo.

¹³Ny zanaky ny rahavavinao voafidy dia manao veloma anao.