Read La Bible en Malgache 3Jaona 1 Bible Online

3Jaona 1 - La Bible en Malgache bible

3Jaona 1

¹Izaho loholona[1] no mamangy an’i Gaio, ilay malala, izay tiako amin’ny fahamarinana.

²Ry malala, mangataka aho mba hambinina sy ho salama amin’ny zavatra rehetra anie ianao, tahaka izay anambinana ny fanahinao ihany.

³Fa faly indrindra aho, fony nisy rahalahy tonga ka nanambara ny fahamarinanao, dia ny fandehananao amin’ny marina.

⁴Tsy manana fifaliana mihoatra noho izao aho dia ny andrenesako fa mandeha amin’ny marina ny zanako.

⁵Ry malala, manao asa mahatoky ianao amin’izay rehetra ataonao amin’ireo rahalahy ireo na dia vahiny aza izy;

⁶nambaran’ireo teo anatrehan’ny fiangonana[2] ny fitiavanao. Soa no ataonao, raha mamatsy azy amin’ny diany koa ianao, araka izay mendrika hatao noho ny amin’Andriamanitra.

⁷Fa noho ny Anarana no niaingany, nefa tsy nandray na inona na inona avy tamin’ny Jentilisa* izy.

⁸Koa isika dia tokony handray tsara ny olona toy izany, mba ho mpiara-miasa aminy amin’ny fahamarinana isika.

⁹Nanoratra tamin’ny fiangonana[3] ihany aho; nefa i Diotrefa, izay te ho lohany, dia tsy mba mandray anay.

¹⁰Koa amin’izany, raha tonga aho, dia hotsarovako izay asa ataony, fa mibedibedy foana manaratsy anay izy; ary tsy afa-po amin’izany ihany, fa ny tenany dia tsy mandray ireo rahalahy ireo, ary izay ta handray azy dia rarany sy roahiny hiala amin’ny fiangonana.

¹¹Ry malala, aza ny ratsy no alain-tahaka fa ny tsara. Izay manao ny tsara no avy amin’Andriamanitra; fa izay manao ny ratsy tsy mba nahita an’Andriamanitra.

¹²I Demetrio dia tsara laza amin’ny olona rehetra sy amin’ny fahamarinana koa; izahay koa manambara izany ary fantatrao fa marina ny fanambarànay.

¹³Maro ny zavatra tiako ho nosoratana taminao nefa tsy tiako hosoratana aminao amin’ny ranomainty sy ny penina.

¹⁴Fa manantena hahita anao faingana ihany aho dia hiresaka mifanatrika isika.

¹⁵Ho aminao anie ny fiadanana! Ny namana atỳ dia manao veloma anao. Veloma amin’ny namana tsirairay araka ny anarany avy.