Read La Bible en Malgache Apokalipsy 11 Bible Online

Apokalipsy 11 - La Bible en Malgache bible

Apokalipsy 11

¹Ary nomena volotara tahaka ny tehina aho ka nisy nilaza tamiko hoe: Mitsangàna ka refeso ny tempolin’Andriamanitra sy ny alitara ary isao izay mivavaka ao.

²Fa ny kianja eo ivelan’ny tempoly dia avelao fa aza refesina fa nomena ny Jentilisa* izany; hanitsakitsaka ny tanàna masina roa amby efapolo volana izy.

³Ary homeko hery ny vavolombeloko roa ka haminany enimpolo sy roanjato sy arivo andro izy sady hitafy lamba fisaonana.

⁴Ireo ny hazo oliva roa sy ny fitoeran-jiro roa, izay mijoro eo anatrehan’ny Tompon’ny tany.

⁵Ary raha misy ta handratra ireo dia misy afo mivoaka amin’ny vavany ka mandany ny fahavalony. Eny, raha misy ta handratra ireo dia toy izany no tsy maintsy hamonoana azy.

⁶Izy ireo dia manana fahefana handrindrina ny lanitra mba tsy hilatsahan’ny ranonorana amin’ny andro aminaniany; ary manana fahefana amin’ny rano koa izy hampody azy ho ra sy hamely ny tany amin’ny loza araka izay andro tiany na oviana na oviana.

⁷Ary rehefa tanteraka ny fanambaràny dia hiady aminy ilay bibidia miakatra avy amin’ny lavaka tsy hita noanoa ka haharesy sy hahafaty azy.

⁸Ary ny fatiny dia hiampatra eny an-dalambe amin’ny tanàna lehibe, izay adika araka ny hevi-panahy hoe Sodoma sy Ejipta, sady tao koa no nanomboana ny Tompony tamin’ny hazofijaliana.

⁹Ary ny olom-pirenena, ny fokom-pirenena, ny samihafa fiteny ary ny firenena maro dia misy mijery ny fatiny telo andro sy tapany; ary tsy avelany halevina am-pasana ny fatiny.

¹⁰Ary ny mponina ambonin’ny tany dia mifaly azy ka hiravoravo, ary hifanatitra fanomezana izy satria nampangirifiry ny mponina ambonin’ny tany ireo mpaminany roa ireo.

¹¹Ary rehefa afaka ny telo andro sy tapany dia nisy fanahin’aina avy tamin’Andriamanitra niditra tao anatin’ireo dia nijoro tamin’ny tongony izy ka raiki-tahotra indrindra izay nahita azy.

¹²Ary nandre feo mahery avy tany an-danitra izy roa lahy niteny taminy hoe: Miakara atỳ! Dia niakatra ho any an-danitra tao anatin’ny rahona ireo, ary nahita azy ny fahavalony.

¹³Tamin’izany ora izany dia nisy horohoron-tany mafy ka rava ny ampahafolon’ny tanàna ary maty tamin’izany horohoron-tany izany ny olona fito arivo; ary raiki-tahotra ny olona sisa ka nanome voninahitra an’Andriamanitry ny lanitra.

¹⁴Lasa ny loza faharoa. Indro, avy haingana ny loza fahatelo.

¹⁵Ary nitsoka ny anjely fahafito dia nisy feo mafy tany an-danitra niteny hoe: Ny fanjakana amin’izao tontolo izao dia lasan’ny Tompontsika sy ny Kristiny; hanjaka mandrakizay mandrakizay Izy!

¹⁶Ary ny loholona efatra amby roapolo izay mipetraka eo ambonin’ny sezafiandrianany eo anatrehan’Andriamanitra, dia niankohoka tamin’ny tany ka nivavaka tamin’Andriamanitra

¹⁷hoe: Misaotra Anao izahay, Tompo ô, Andriamanitra Tsitoha, Ilay ankehitriny sy taloha satria nasehonao ny herinao lehibe ka nampiorina ny fanjakanao Ianao.

¹⁸Tezitra ny firenena maro nefa tonga ny fahatezeranao sy ny fotoana hitsarana ny maty, hanomezana valim-pitia ny mpaminany mpanomponao sy ny olona masina ary izay matahotra ny anaranao, na kely na lehibe, ary mba hanimbanao izay manimba ny tany.

¹⁹Ary novohana ny tempolin’Andriamanitra any an-danitra ka niseho tao anatin’ny tempoliny ny vata misy ny fanekeny; ary nisy tselatra, feo, kotrokorana, horohoron-tany ary havandra vaventy.