Read La Bible en Malgache Apokalipsy 14 Bible Online

Apokalipsy 14 - La Bible en Malgache bible

Apokalipsy 14

¹Ary hitako fa indro, ny Zanak’ondry dia nitsangana teo amin’ny tendrombohitra Ziona*, ary nisy efatra arivo sy efatra alina sy iray hetsy nomba Azy, samy manana ny anarany sy ny anaran’ny Rainy voasoratra eo amin’ny handriny.

²Ary nahare feo avy tany an-danitra aho, tahaka ny firohondrohon’ny ranobe sy tahaka ny fikotroky ny kotrokorana mafy; ary ny feo izay reko dia tahaka ny an’ny mpitendry lokanga mitendry ny lokangany.

³Ary mihira toa tononkira vaovao eo anoloan’ny sezafiandrianana sy eo anatrehan’ny zavamananaina efatra sy ny loholona izy. Tsy nisy afaka nianatra izany tononkira izany, afa-tsy ny efatra arivo sy efatra alina sy iray hetsy izay navotana niala tamin’ny tany.

⁴Ireo no tsy voaloto tamin’ny vehivavy, fa virijiny izy. Ireo no manaraka ny Zanak’ondry na aiza na aiza no alehany. Ireo no navotana avy tamin’ny olona ho voaloham-bokatra ho an’Andriamanitra sy ny Zanak’ondry.

⁵Tsy nisy lainga hita teo am-bavany, sady tsy manan-tsiny izy.

⁶Ary hitako fa indro, nisy anjely iray hafa koa nanidina teo afovoan’ny lanitra, nanana Filazantsara mandrakizay hotorina amin’izay monina ambonin’ny tany sy amin’ny firenena, ny fokom-pirenena, ny samihafa fiteny ary ny olom-pirenena rehetra,

⁷niteny tamin’ny feo mahery hoe: Matahora an’Andriamanitra ka omeo voninahitra Izy, fa tonga ny andro fitsarany; miankohofa eo anoloan’Izay nanao ny lanitra sy ny tany sy ny ranomasina ary ny loharano!

⁸Ary nisy iray hafa koa, dia anjely faharoa, nanaraka azy ka niteny hoe: Rava! Rava i Babilona lehibe izay nampisotro ny firenena rehetra ny divain’ny fahatezerana noho ny fijangajangany!

⁹Ary nisy iray hafa koa, dia anjely fahatelo, nanaraka ireny ka niteny tamin’ny feo mahery hoe: Raha misy miankohoka eo anoloan’ny bibidia sy ny sariny ka mandray ny marika eo amin’ny handriny na amin’ny tanany,

¹⁰dia izy koa no hisotro ny divain’ny fahatezeran’Andriamanitra, izay naidina tao anatin’ny kapoaky ny fahatezerany, tsy mitampoka, miharoharo zavatra, sady hampijaliana amin’ny afo sy solifara eo anatrehan’ny anjely masina sy eo anatrehan’ny Zanak’ondry izy!

¹¹Ny setroky ny fijaliany dia miakatra mandrakizay mandrakizay ary tsy manana fitsaharana, na andro na alina, izay miankohoka eo anoloan’ny bibidia sy ny sariny, na izay mandray ny mariky ny anarany.

¹²Indro ny faharetan’ny olona masina, dia izay mitandrina ny didin’Andriamanitra sy ny finoana an’i Jesosy.

¹³Ary nahare feo avy tany an-danitra aho niteny hoe: Soraty: Sambatra ny maty, dia izay maty ao amin’ny Tompo, hatramin’izao! Eny, hoy ny Fanahy, fa hitsahatra amin’izay nisasarany izy, fa ny asany manaraka azy.

¹⁴Ary indro, nahita rahona fotsy aho, ary nisy tahaka ny Zanak’Olona* nipetraka teo ambonin’ny rahona. Nisatroka satroboninahitra volamena Izy sady nitana antsimbary maranitra teny an-tanany.

¹⁵Ary nisy anjely iray koa nivoaka avy tao amin’ny tempoly, niantso tamin’ny feo mahery ka niteny tamin’Ilay nipetraka teo ambonin’ny rahona hoe: Arosoy ny antsimbarinao ka mijinjà! Satria tonga ny andro fijinjana fa efa masaka ny vokatry ny tany.

¹⁶Dia naroson’Ilay nipetraka teo ambonin’ny rahona tamin’ny tany ny antsimbariny ka voajinja ny tany.

¹⁷Ary nisy anjely iray koa nivoaka avy tao amin’ny tempoly tany an-danitra, ary izy koa dia nitana antsimbary maranitra.

¹⁸Nisy anjely iray koa nivoaka avy teo amin’ny alitara, ary nanana fahefana tamin’ny afo izy; niantso ilay nanana ny antsimbary maranitra tamin’ny feo mahery izy hoe: Arosoy ny antsimbarinao maranitra ka angony ny sampahom-boaloboka eo amin’ny tany; fa masaka tsara ny voalobony.

¹⁹Ary naroson’ilay anjely tamin’ny tany ny antsimbariny dia nangoniny ny voaloboky ny tany ka nazerany tao amin’ny famiazam-boaloboka lehibe, dia ny fahatezeran’Andriamanitra.

²⁰Ary nohitsakitsahina teny ivelan’ny tanàna ny famiazam-boaloboka ary avy tao amin’ny famiazam-boaloboka dia nisy ra nahadifotra hatramin’ny lamboridin-tsoavaly ka tonga hatramin’ny eninjato sy arivo stadio*.