Read La Bible en Malgache Apokalipsy 15 Bible Online

Apokalipsy 15 - La Bible en Malgache bible

Apokalipsy 15

¹Ary hitako fa indro, nisy famantarana iray koa tany an-danitra, sady lehibe no mahagaga, dia anjely fito izay nitana ny loza fito farany satria ireny no hoenti-manatanteraka ny fahatezeran’Andriamanitra.

²Ary nahita aho fa indro, toa ranomasina fitaratra miharo afo, ary izay naharesy ka afaka tamin’ny bibidia sy ny sariny ary ny isa mariky ny anarany dia nitsangana teo amoron’ny ranomasina fitaratra, nitana lokangan’Andriamanitra.

³Ary mihira ny tononkiran’i Mosesy, mpanompon’Andriamanitra, sy ny tononkiran’ny Zanak’ondry izy hoe: Lehibe sy mahatalanjona ny asanao, Tompo ô, Andriamanitra Tsitoha; mahitsy sy marina ny lalanao, ry Mpanjakan’ny firenena!

⁴Iza no tsy hatahotra? Ary iza no tsy hankalaza ny anaranao, Tompo ô? Fa Ianao ihany no masina ary ny firenena rehetra dia ho avy hiankohoka eo anatrehanao; fa naharihary ny fitsarana marina nataonao.

⁵Rehefa afaka izany dia nahita aho fa indro, novohana ny tempoly, dia ny tabernakelin’ny Vavolombelona any an-danitra.

⁶Ary ny anjely fito izay nitana ny loza fito dia nivoaka avy tao amin’ny tempoly ary nanao akanjo rongony fotsy sady madio no mangatsakatsaka izy sady nitondra fehikibo volamena teo amin’ny tratrany.

⁷Ary ny iray tamin’ny zavamananaina efatra dia nanome ny anjely fito, lovia volamena fito, feno ny fahatezeran’Andriamanitra, izay velona mandrakizay mandrakizay.

⁸Ary ny tempoly dia feno setroka noho ny voninahitr’Andriamanitra sy ny heriny, koa tsy nisy nahazo niditra tao amin’ny tempoly mandra-pahatanteraka ny loza fito noentin’ny anjely fito.