Read La Bible en Malgache Apokalipsy 16 Bible Online

Apokalipsy 16 - La Bible en Malgache bible

Apokalipsy 16

¹Ary nandre feo mahery avy tao amin’ny tempoly aho niteny tamin’ny anjely fito hoe: Mandehana, aidino amin’ny tany ny ao amin’ny lovia fito feno ny fahatezeran’Andriamanitra.

²Ary nandeha ny voalohany dia nampidina ny tao an-doviany tamin’ny tany. Dia nisy vay ratsy sady mampanaintaina tamin’ny olona izay nanana ny mariky ny bibidia sy niankohoka teo anatrehan’ny sariny.

³Ary ny faharoa dia nampidina ny tao an-doviany tamin’ny ranomasina. Dia nody ra tahaka ny ran’olona efa maty ny ranomasina ary maty ny zavamananaina rehetra tao aminy.

⁴Ary ny fahatelo dia nampidina ny tao an-doviany tamin’ny ony sy ny loharano. Dia nody ra ireny.

⁵Ary nandre ny anjelin’ny rano aho niteny hoe: Marina Ianao, Ilay ankehitriny sy taloha, dia ny Iray Masina, satria nitsara toy izany Ianao.

⁶Satria ny ran’ny olona masina sy ny mpaminany no nalatsany, koa ra no nomenao hosotroiny; tandrify azy izany.

⁷Ary reko ny alitara niteny hoe: Eny, Tompo, Andriamanitra Tsitoha ô, marina sady mahitsy ny fitsaranao.

⁸Ary ny fahefatra dia nampidina ny tao an-doviany tamin’ny masoandro. Nasaina nandoro ny olona tamin’ny afo izy

⁹ka main’ny hafanana be ny olona. Dia niteny ratsy ny anaran’Andriamanitra izay manana fahefana amin’ireny loza ireny, izy, sady tsy nibebaka mba hanome voninahitra Azy.

¹⁰Ary ny fahadimy dia nampidina ny tao an-doviany tamin’ny sezafiandrianan’ilay bibidia. Dia tonga maizina ny fanjakany ary ny olona nitsakotsako ny lelany noho ny fanaintainana;

¹¹niteny ratsy an’Andriamanitry ny lanitra izy noho ny fanaintainany sy ny vainy sady tsy nibebaka tamin’ny asany.

¹²Ary ny fahenina dia nampidina ny tao an-doviany tao amin’i Eofrata, ony lehibe. Dia ritra ny ranony, mba hanamboarana ny lalan’ireny mpanjaka avy any amin’ny fiposahan’ny masoandro ireny.

¹³Ary hitako fa indreo, fanahy maloto telo tahaka ny sahona avy tamin’ny vavan’ilay dragona* sy tamin’ny vavan’ilay bibidia ary tamin’ny vavan’ilay mpaminany sandoka.

¹⁴Fa fanahin’ny demonia ireo ka manao famantarana sady mankany amin’ny mpanjakan’ny tany rehetra manerana izao tontolo izao, mba hamory azy ho amin’ny adin’ilay andro lehiben’Andriamanitra Tsitoha!

¹⁵Indro, avy toy ny mpangalatra Aho. Sambatra izay miambina ka miaro ny fitafiany, fandrao mandeha mitanjaka izy ka ho hita ny fahamenarany!

¹⁶Ary novoriny ho any amin’ny toerana atao amin’ny teny hebreo hoe Haramagedona ireny.

¹⁷Ary ny fahafito dia nampidina ny tao an-doviany tamin’ny rivotra. Dia nisy feo mahery nivoaka avy tao amin’ny tempoly, avy teo amin’ny sezafiandrianana, niteny hoe: Vita!

¹⁸Dia nisy tselatra sy feo ary kotrokorana; nisy koa horohoron-tany mafy izay tsy mbola nisy toy izany hatrizay nisian’olona tetỳ ambonin’ny tany, eny, tsy mbola nisy horohoron-tany mafy sy lehibe toy izany.

¹⁹Ary ny tanàna lehibe dia vaky ho telo toko ary rava ny tanànan’ny firenena maro; ary i Babilona lehibe dia notsarovana teo anatrehan’Andriamanitra mba homena azy ny kapoaky ny divain’ny firehetan’ny fahatezerany.

²⁰Nandositra ny nosy rehetra ary ny tendrombohitra tsy hita intsony.

²¹Nisy havandra vaventy nilatsaka avy tany an-danitra teo amin’ny olona, milanja tokony ho talenta* iray avy; ary niteny ratsy an’Andriamanitra ny olona noho ny loza avy tamin’ny havandra; fa lehibe loatra izany loza izany.