Read La Bible en Malgache Apokalipsy 2 Bible Online

Apokalipsy 2 - La Bible en Malgache bible

Apokalipsy 2

¹Soraty ho an’ny anjelin’ny Fiangonana any Efesosy: Izao no lazain’Ilay mihazona ny kintana fito eny an-tanany havanana sady mandeha eo afovoan’ny fitoeran-jiro volamena fito:

²Fantatro ny asanao sy ny fikelezanao aina ary ny fiaretanao sy ny tsy fahazakanao izay mpanao ratsy; ary ianao dia efa nizaha toetra izay milaza ny tenany ho Apostoly, kanjo tsy izy, ary hitanao fa mpandainga izy.

³Manana faharetana ianao ka niaritra noho ny anarako sady tsy reraka.

⁴Kanefa manan-teny aminao Aho satria efa niala tamin’ny fitiavanao voalohany ianao.

⁵Koa tsarovy izay nitoeranao fony tsy mbola lavo dia mibebaha ka manaova ny asa voalohany; fa raha tsy izany dia ho avy aminao Aho ka hamindra ny fitoeran-jironao hiala amin’ny toerany raha tsy mibebaka ianao.

⁶Kanefa izao no toetranao: Halanao ny asan’ny Nikolaìta izay halako koa.

⁷Izay manan-tsofina, aoka izy hihaino izay lazain’ny Fanahy amin’ny Fiangonana rehetra! Izay mandresy dia havelako hihinana ny avy amin’ny hazon’aina izay eo amin’ny Paradisan’Andriamanitra.

⁸Ary soraty ho an’ny anjelin’ny Fiangonana any Smirna: Izao no lazain’ny Voalohany sy ny Farany izay efa maty nefa velona indray:

⁹Fantatro ny fahorianao sy ny fahantranao, nefa manankarena ianao, ary ny fitenenan-dratsy ataon’izay milaza ny tenany ho Jiosy*, kanjo tsy izy fa sinagogan’i Satana.

¹⁰Aza matahotra izay hiaretanao. Indro, ny devoly* dia hanipy ny sasany aminareo ho ao an-tranomaizina mba ho voazaha toetra ianareo, ary hanam-pahoriana hafoloana. Aoka ho mahatoky hatramin’ny fahafatesana ianao, dia homeko anao ny satroboninahitry ny fiainana.

¹¹Izay manan-tsofina, aoka izy hihaino izay lazain’ny Fanahy amin’ny Fiangonana rehetra! Izay mandresy dia tsy hosimban’ny fahafatesana faharoa.

¹²Ary soraty ho an’ny anjelin’ny Fiangonana any Pergamosy: Izao no lazain’Ilay manana ny sabatra roa lela maranitra:

¹³Fantatro izay onenanao, dia ao amin’ny itoeran’ny sezafiandrianan’i Satana*. Mitana mafy ny anarako ianao ka tsy nandà ny finoana Ahy, na dia tamin’ny andron’i Antipasy vavolombeloko aza, izay lehilahy nahatoky Ahy, dia ilay novonoina teo aminareo, teo amin’izay onenan’i Satana.

¹⁴Kanefa manan-teny kely aminao Aho, fa misy eo aminao izay mitana ny fampianaran’i Balama, ilay nanome fo an’i Balaka hanisy fahatafintohinana teo anoloan’ny Zanak’Israely, hihinana hena naterina tamin’ny sampy sy hijangajanga.

¹⁵Ary toy izany koa, misy eo aminao izay mitana ny fampianaran’ny Nikolaìta tahaka ny an’ireny.

¹⁶Koa mibebaha; fa raha tsy izany dia ho avy aminao haingana Aho ka hamely ireo amin’ny sabatry ny vavako.

¹⁷Izay manan-tsofina, aoka izy hihaino izay lazain’ny Fanahy amin’ny Fiangonana rehetra! Izay mandresy dia homeko mana miafina sady homeko vato fotsy, ary eo amin’izany vato izany dia misy anaram-baovao voasoratra izay tsy fantatr’olona afa-tsy izay mandray azy ihany.

¹⁸Ary soraty ho an’ny anjelin’ny Fiangonana any Tiatira: Izao no lazain’ny Zanak’Andriamanitra izay manana maso toy ny lelafo, ary ny tongony tahaka ny varahina manganohano:

¹⁹Fantatro ny asanao, ny fitiavanao, ny finoanao, ny fanompoanao ary ny faharetanao, ary ny asanao farany dia maro noho ny voalohany.

²⁰Kanefa manan-teny aminao Aho satria ianao dia mandefitra amin’ilay vehivavy Jezebela izay milaza ny tenany ho mpaminanivavy ka mampianatra sady manoloky ny mpanompoko hijangajanga sy hihinana hena naterina tamin’ny sampy.

²¹Nomeko andro hibebahany izy nefa tsy mety mibebaka amin’ny fijangajangany izy.

²²Indro, hampandamahiko eo am-pandriana izy, ary izay mijangajanga aminy dia hataoko ao amin’ny fahoriana lehibe raha tsy mibebaka amin’ny asan-dRavehivavy izy.

²³Hovonoiko amin’ny areti-mandringana ny zanany; ary ny Fiangonana rehetra dia hahalala fa Izaho no mandinika ny voa sy ny fo; ary homeko araka ny asanareo avy ianareo rehetra.

²⁴Fa aminareo izay sisa any Tiatira, dia izay tsy manana izany fampianarana izany sady tsy mba mahalala ny ataon’ireo hoe sain-dalin’i Satana, dia izao no lazaiko: Tsy hovesarako entana hafa ianareo.

²⁵Kanefa izay anananareo dia tano mafy mandra-piaviko.

²⁶Ary izay mandresy ka mitandrina ny asako hatramin’ny farany dia homeko fahefana amin’ny Jentilisa*.

²⁷Hiandry azy amin’ny tehim-by izy ka hanorotoro azy toy ny fanorotoro vilany tany, araka izay noraisiko tamin’ny Raiko.

²⁸Ary homeko azy ny kintana fitarikandro.

²⁹Izay manan-tsofina, aoka izy hihaino izay lazain’ny Fanahy amin’ny Fiangonana rehetra!