Read La Bible en Malgache Apokalipsy 3 Bible Online

Apokalipsy 3 - La Bible en Malgache bible

Apokalipsy 3

¹Ary soraty ho an’ny anjelin’ny Fiangonana any Sardisy: Izao no lazain’Ilay manana ny Fanahy fiton’Andriamanitra sy ny kintana fito: Fantatro ny asanao, fa manana anarana ho velona ianao, kanjo maty.

²Miambena ka aoreno tsara ny zavatra sisa izay mila ho faty; fa tsy nisy hitako tanteraka ny asanao eo anatrehan’Andriamanitro.

³Dia tsarovy ny amin’ny nandraisanao sy ny nandrenesanao, ary tano mafy ka mibebaha. Fa raha tsy miambina ianao dia ho avy toy ny mpangalatra Aho ka tsy ho fantatrao izay ora hiaviako aminao.

⁴Kanefa misy olona vitsy atỳ aminao atỳ Sardisy izay tsy nandoto ny fitafiany; hiara-mandeha amiko mitafy lamba fotsy ireo satria mendrika izy.

⁵Izay mandresy dia hitafy lamba fotsy tahaka ireo koa ary tsy hamono velively ny anarany eo amin’ny bokin’ny fiainana Aho fa hanaiky ny anarany eo anatrehan’ny Raiko sy eo anatrehan’ny anjeliny.

⁶Izay manan-tsofina, aoka izy hihaino izay lazain’ny Fanahy amin’ny Fiangonana rehetra!

⁷Ary soraty ho amin’ny anjelin’ny Fiangonana any Filadelfia: Izao no lazain’Izay masina, Izay marina, Izay manana ny fanalahidin’i Davida, Izay mamoha ka tsy hisy hanidy ary manidy ka tsy misy mamoha:

⁸Fantatro ny asanao; indro, efa nasiako varavarana mivoha eo anatrehanao ka tsy misy maharindrina azy; fa na dia kely aza ny herinao dia nitandrina ny teniko ianao ary tsy mba nandà ny anarako.

⁹Indro, alaiko ny sasany amin’ny sinagogan’i Satana, izay milaza ny tenany ho Jiosy*, kanjo tsy izy fa mandainga. Indro, hataoko tonga hiankohoka eo anoloan’ny tongotrao ireo ka ho fantany fa Izaho dia tia anao.

¹⁰Satria efa nitandrina ny teniko ny amin’ny faharetana ianao, Izaho kosa hiaro anao ho voavonjy amin’ny andron’ny fakam-panahy izay efa hihatra amin’izao tontolo izao ho fizahan-toetra izay monina ambonin’ny tany.

¹¹Ho avy haingana Aho. Tano mafy izay anananao mba tsy hisy haka ny satroboninahitrao.

¹²Izay mandresy dia hataoko andry eo amin’ny tempolin’Andriamanitro ary tsy hiala tao intsony izy. Hosoratako eo aminy ny anaran’Andriamanitro sy ny anaran’ny tanànan’Andriamanitro, dia i Jerosalema vaovao izay midina avy any an-danitra avy amin’Andriamanitro, ary ilay anarako vaovao.

¹³Izay manan-tsofina, aoka izy hihaino izay lazain’ny Fanahy amin’ny Fiangonana rehetra.

¹⁴Ary soraty ho amin’ny anjelin’ny Fiangonana any Laodikia: Izao no lazain’ny Amena*, dia Ilay Vavolombelona mahatoky sy marina izay niandohan’izao zavatra noharin’Andriamanitra izao:

¹⁵Fantatro ny asanao, fa tsy mangatsiaka na mafana ianao. Aleo mangatsiaka na mafana ianao!

¹⁶Fa satria matimaty ianao ka tsy mafana na mangatsiaka dia mila haloan’ny vavako ianao.

¹⁷Fa hoy ianao: Manankarena sady nihary fananana be aho ka tsy misy na inona na inona mahory ahy, kanjo tsy fantatrao fa ianao no ilay ory, mahantra, malahelo, jamba ary mitanjaka;

¹⁸koa manoro hevitra anao Aho hividy Amiko volamena voadio tamin’ny afo mba hanankarena ianao, ary fitafiana fotsy hotafinao mba tsy hisehoan’ny henatrao noho ny fitanjahana, ary ody maso hahosotrao ny masonao mba hahiratanao.

¹⁹Izay rehetra tiako no anariko sy faiziko; koa mazotoa ianao ka mibebaha!

²⁰Indro, mitsangana eo am-baravarana Aho ka mandondòna. Raha misy mihaino ny feoko ka mamoha ny varavarana dia hiditra ao aminy Aho ka hiara-misakafo aminy, ary izy Amiko.

²¹Izay mandresy dia havelako hiara-mipetraka Amiko eo ambonin’ny sezafiandrianako, tahaka ny nandreseko sy ny niarahako nipetraka amin’ny Raiko eo ambonin’ny sezafiandrianany.

²²Izay manan-tsofina, aoka izy hihaino izay lazain’ny Fanahy amin’ny Fiangonana rehetra!