Read La Bible en Malgache Apokalipsy 4 Bible Online

Apokalipsy 4 - La Bible en Malgache bible

Apokalipsy 4

¹Rehefa afaka izany dia hitako fa indro, nisy varavarana nivoha tany an-danitra, ary ilay feo izay efa reko tamin’ny voalohany dia tahaka ny an’ny trompetra niteny tamiko hoe: Miakara atỳ, dia hasehoko anao izay zavatra tsy maintsy ho avy amin’izao manaraka izao.

²Ary niaraka tamin’izay dia voatsindrin’ny Fanahy aho. Indro, nisy sezafiandrianana iray tany an-danitra ary nisy Iray nipetraka teo ambonin’ny sezafiandrianana.

³Ary ny tarehin’Ilay nipetraka dia tahaka ny vato jaspy sy karneola, ary nisy avana mitarehin’emeraoda nanodidina ny sezafiandrianana.

⁴Ary manodidina ilay sezafiandrianana iray dia nisy sezafiandrianana efatra amby roapolo; ary teo ambonin’ireo sezafiandrianana ireo dia nisy loholona efatra amby roapolo nipetraka, nitafy fitafiana fotsy sady nisatroka satroboninahitra volamena.

⁵Ary nisy tselatra sy feo ary kotrokorana nivoaka avy teo amin’ny sezafiandrianana, ary nisy jiro fito nirehitra teo anoloan’ny sezafiandrianana; ny Fanahy fiton’Andriamanitra ireo.

⁶Teo anoloan’ny sezafiandrianana dia nisy toa ranomasina fitaratra tahaka ny vato kristaly. Teo afovoan’ny sezafiandrianana sy manodidina azy dia nisy zavamananaina efatra feno maso avokoa teo anoloany sy teo ivohony.

⁷Ny zavamananaina voalohany dia tahaka ny liona, ny zavamananaina faharoa dia tahaka ny zanak’omby, ny zavamananaina fahatelo dia manana tava tahaka ny tavan’olona ary ny zavamananaina fahefatra dia tahaka ny voromahery manidina.

⁸Ny zavamananaina efatra dia samy nanana elatra enina avy, sady feno maso ny tenany rehetra manodidina ka hatrany anatiny. Ary tsy mitsahatra andro aman’alina izy miteny hoe: Masina, masina, masina ny Tompo Andriamanitra Tsitoha, Ilay taloha sy ankehitriny ary ho avy!

⁹Ary isaky ny manome voninahitra sy haja ary fisaorana ho an’Ilay mipetraka eo ambonin’ny sezafiandrianana, dia Izay velona mandrakizay mandrakizay, ny zavamananaina,

¹⁰dia miankohoka eo anoloan’Izay mipetraka eo ambonin’ny sezafiandrianana ny loholona[1] efatra amby roapolo ka mivavaka amin’Izay velona mandrakizay mandrakizay, ary manipy ny satroboninahiny eo anoloan’ny sezafiandrianana sady miteny hoe:

¹¹Ianao, Tomponay sy Andriamanitray, no mendrika handray ny voninahitra sy ny haja ary ny hery; fa Ianao no nahary ny zavatra rehetra ary noho ny sitraponao no naha nisy sy naha ary azy.