Read La Bible en Malgache Apokalipsy 5 Bible Online

Apokalipsy 5 - La Bible en Malgache bible

Apokalipsy 5

¹Ary hitako fa indro, nisy boky voasoratra tao anatiny sy teo ivohony, voahidy mafy tamin’ny tombo-kase fito, teo an-tanana ankavanan’Ilay nipetraka teo ambonin’ny sezafiandrianana.

²Ary hitako fa indro, nisy anjely mahery niantso tamin’ny feo mafy hoe: Iza no mendrika hanokatra ny boky sy hamaha ny tombo-kaseny?

³Tsy nisy anefa tany an-danitra, na tetỳ an-tany, na tany ambanin’ny tany, nahasokatra ny boky na nahajery azy.

⁴Dia nitomany mafy aho satria tsy nisy hita mendrika hanokatra ny boky na hijery azy.

⁵Hoy anefa ny iray tamin’ny loholona tamiko hoe: Aza mitomany; indro, ny Liona avy amin’ny firenen’i Joda, dia ny Solofon’i Davida, no efa nandresy ka hanokatra ny boky sy hamaha ny tombo-kaseny fito.

⁶Ary hitako fa indro, teo afovoan’ny sezafiandrianana sy ny zavamananaina efatra ary teo afovoan’ny loholona dia nisy Zanak’ondry nitsangana tahaka ny efa voavono. Nanana tandroka fito sy maso fito Izy, dia ny Fanahy fiton’Andriamanitra nirahina hankany amin’ny tany rehetra.

⁷Tonga Izy ka nandray ny boky teo an-tanana ankavanan’Ilay nipetraka teo ambonin’ny sezafiandrianana.

⁸Rehefa nandray ny boky Izy dia niankohoka teo anatrehan’ny Zanak’ondry ny zavamananaina efatra sy ny loholona[2] efatra amby roapolo, ary samy nanana lokanga sy lovia volamena feno ditin-kazo manitra izy, dia ny vavaka ataon’ny olona masina izany.

⁹Nihira tononkira vaovao izy hoe: Ianao no mendrika handray ny boky sy hamaha ny tombo-kaseny; satria voavono Ianao, ary ny ranao no nanavotanao olona avy tamin’ny fokom-pirenena rehetra, ny samihafa fiteny, ny olona ary ny firenena rehetra, ho an’Andriamanitra;

¹⁰nataonao fanjakana sy mpisorona ho an’Andriamanitsika ireo ary hanjaka ambonin’ny tany izy.

¹¹Ary nahita aho, sady nandre feon’anjely maro manodidina ny sezafiandrianana sy ny zavamananaina ary ny loholona ary ny isany dia alinalina sy arivoarivo.

¹²Niteny tamin’ny feo mahery izy hoe: Ny Zanak’ondry izay novonoina dia mendrika handray ny hery, ny harena, ny fahendrena, ny faherezana, ny haja, ny voninahitra ary ny saotra.

¹³Ary ny zavaboahary rehetra, na izay any an-danitra, na izay etỳ ambonin’ny tany sy any ambanin’ny tany, na izay eny ambonin’ny ranomasina mbamin’izay rehetra ao anatiny, dia reko samy niteny hoe: Ho an’Ilay mipetraka eo ambonin’ny sezafiandrianana sy ho an’ny Zanak’ondry anie ny saotra, ny haja, ny voninahitra ary ny fanjakana mandrakizay mandrakizay!

¹⁴Ary ny zavamananaina efatra dia niteny hoe: Amena*! Ary ny loholona dia niankohoka ka nivavaka.