Read La Bible en Malgache Apokalipsy 7 Bible Online

Apokalipsy 7 - La Bible en Malgache bible

Apokalipsy 7

¹Rehefa afaka izany dia hitako fa indreo, nisy anjely efatra nitsangana teo amin’ny vazan-tany efatra, nihazona ny rivotra efatra amin’ny tany, mba tsy hisy rivotra hitsoka amin’ny tany, na amin’ny ranomasina, na amin’ny hazo akory aza.

²Ary hitako fa indro, nisy anjely hafa koa niakatra avy tany amin’ny fiposahan’ny masoandro, nanana ny fitombo-kasen’Andriamanitra velona. Ary niantso ny anjely efatra izay nasaina hanimba ny tany sy ny ranomasina, tamin’ny feo mahery izy hoe:

³Aza manimba ny tany, na ny ranomasina, na ny hazo, mandra-panisinay tombo-kase amin’ny handrin’ny mpanompon’Andriamanitsika.

⁴Ary nandre ny isan’izay voaisy tombo-kase aho: Efatra arivo sy efatra alina sy iray hetsy no voaisy tombo-kase tamin’ny fokon’ny Zanak’Israely rehetra:

⁵Tamin’ny fokon’i Joda, roa arivo sy iray alina no voaisy tombo-kase; tamin’ny fokon’i Robena, roa arivo sy iray alina; tamin’ny fokon’i Gada, roa arivo sy iray alina;

⁶tamin’ny fokon’i Asera, roa arivo sy iray alina; tamin’ny fokon’i Naftaly, roa arivo sy iray alina; tamin’ny fokon’i Manase, roa arivo sy iray alina;

⁷tamin’ny fokon’i Simeona, roa arivo sy iray alina; tamin’ny fokon’i Levy, roa arivo sy iray alina; tamin’ny fokon’i Isakara, roa arivo sy iray alina;

⁸tamin’ny fokon’i Zebolona, roa arivo sy iray alina; tamin’ny fokon’i Josefa, roa arivo sy iray alina; tamin’ny fokon’i Benjamina, roa arivo sy iray alina no voaisy tombo-kase.

⁹Rehefa afaka izany dia hitako fa indreo, nisy olona betsaka tsy tambo isaina avy tamin’ny firenena rehetra, ny fokom-pirenena rehetra ary ny samihafa fiteny rehetra. Nitsangana teo anoloan’ny sezafiandrianana sy teo anatrehan’ny Zanak’ondry izy ireo, niakanjo akanjo fotsy lava sady nitana sampan-drofia teny an-tanany,

¹⁰ary niantso tamin’ny feo mahery hoe: Ny famonjena dia an’Andriamanitsika izay mipetraka eo ambonin’ny sezafiandrianana, sy an’ny Zanak’ondry!

¹¹Ary ny anjely rehetra dia nitsangana manodidina ny sezafiandrianana sy ny loholona ary ny zavamananaina efatra; niankohoka teo anoloan’ny sezafiandrianana izy ka nivavaka tamin’Andriamanitra

¹²hoe: Amena*! Ny saotra, ny voninahitra, ny fahendrena, ny fisaorana, ny haja, ny hery ary ny faherezana dia an’Andriamanitsika mandrakizay mandrakizay! Amena!

¹³Ary ny iray tamin’ny loholona dia niteny tamiko hoe: Iza moa ireo miakanjo akanjo fotsy lava? Ary avy taiza izy?

¹⁴Fa hoy aho taminy: Tompoko, ianao no mahalala! Dia hoy izy tamiko: Ireo no avy tamin’ny fahoriana lehibe, ary ny akanjony dia nosasany sy nofotsiany tamin’ny ran’ny Zanak’ondry.

¹⁵Noho izany izy dia eo anoloan’ny sezafiandrianan’Andriamanitra ka manompo Azy andro aman’alina ao amin’ny tempoliny. Ary Ilay mipetraka eo ambonin’ny sezafiandrianana dia hamelatra ny tranolainy handrakotra azy.

¹⁶Tsy ho noana na hangetaheta intsony ireo; ary tsy haninona azy ny masoandro na izay hafanana akory.

¹⁷Fa ny Zanak’ondry izay eo afovoan’ny sezafiandrianana no ho Mpiandry azy ka hitondra azy ho amin’ny loharanon’ny ranon’aina; ary hofafan’Andriamanitra ny ranomaso rehetra amin’ny masony (Isa 25.8).