Read La Bible en Malgache Rota 1 Bible Online

Rota 1 - La Bible en Malgache bible

Rota 1

¹Tamin’ny andro nitondran’ny mpitsara dia nisy mosary teo amin’ny tany. Ary nisy lehilahy avy any Betleheman’i Joda nandeha nivahiny tany amin’ny tany Moaba, dia izy sy ny vadiny mbamin’ny zanany roa lahy.

²Elimeleka no anaran-dRalehilahy, Naomy no anaran’ny vadiny, ary ny anaran’ny zanany roa lahy dia i Malòna sy i Kiliona; Efratita avy any Betleheman’i Joda izy ireo. Tonga tany amin’ny tany Moaba izy ka nitoetra tany.

³Ary maty i Elimeleka, vadin’i Naomy, ka izy sy ny zanany roa lahy ihany no sisa.

⁴Ary naka vady tamin’ny vehivavy moabita izy roa lahy: Orpa no anaran’ny iray, ary Rota no anaran’ny iray. Nitoetra tany Moaba tokony ho folo taona izy.

⁵Ary maty koa izy mirahalahy, dia i Malòna sy i Kiliona, ka tavela irery Ravehivavy, namoy ny zanany roa lahy sy ny vadiny.

⁶Dia niainga izy sy ny vinantovaviny ka nody avy tany amin’ny tany Moaba. Fa reny tany amin’ny tany Moaba fa novangian’NY TOMPO ny olony ka nomeny hanina.

⁷Dia niala tamin’izay nitoerany izy ary niaraka taminy ny vinantovaviny roa; nandeha hiverina any amin’ny tanin’ny Joda izy ireo.

⁸Ary hoy i Naomy tamin’ny vinantovaviny roa: Andeha, samia mody any amin’ny tranon-dreninareo avy ianareo! NY TOMPO anie hanisy soa anareo araka izay nataonareo tamin’ny maty sy tamiko koa!

⁹Homen’NY TOMPO tokantrano anie ianareo ka hahita fiadanana amin’izay tranon’ny vadinareo avy. Dia nanoroka azy i Naomy. Ary samy nanandratra ny feony izy roa vavy ka nitomany.

¹⁰Dia hoy izy roa vavy tamin’i Naomy: Tsia! Hiara-miverina aminao ho any amin’ny firenenao izahay!

¹¹Fa hoy i Naomy: Mandehana miverena, anaka! Nahoana no hiara-mandeha amiko ianareo? Mbola misy zazalahy va ato an-kiboko mba ho vadinareo?

¹²Mandehana miverena, anaka! Fa efa antitra aho ka tsy hahazo vady intsony. Raha hoy aho: Mbola misy fanantenana ihany ho ahy, eny, na dia hanambady anio alina aza aho ka hiteraka zazalahy,

¹³moa hahandry azy mandra-pahalehibeny va ianareo ka hijanona tsy hanambady? Tsia, anaka! Fa mangidy lavitra ny manjo ahy noho ny manjo anareo, fa ny tanan’NY TOMPO no natsotrany hamely ahy.

¹⁴Dia samy nanandratra ny feony indray izy roa vavy ka nitomany. Ary nanoroka ny rafozany vavy i Orpa, fa i Rota kosa dia nifikitra taminy ihany.

¹⁵Hoy izy: Indro, ny rahavavinao dia lasa nody ho any amin’ny fireneny sy ny andriamaniny ka mba miverena koa ianao hanaraka ny rahavavinao.

¹⁶Hoy anefa i Rota: Aza manery ahy handao anao sy hiverina tsy hanaraka anao! Izay alehanao no halehako, ary any amin’izay atorianao ho hatoriako; ny firenenao no ho fireneko, ary ny Andriamanitrao no ho Andriamanitro;

¹⁷izay tany hahafatesanao no hahafatesako, sady any koa no handevenana ahy; hataon’NY TOMPO amiko anie izany, eny, mihoatra noho izany aza, raha tsy ny fahafatesana ihany no hampisaraka antsika!

¹⁸Rehefa hitany fa tapa-kevitra handeha hiaraka aminy i Rota dia nitsahatra tsy niteny taminy intsony izy.

¹⁹Dia nandeha izy mianaka ka tonga tany Betlehema. Rehefa tonga tany Betlehema izy dia taitra ny iray tanàna manontolo nahita azy ka hoy ny vehivavy: I Naomy va re ity?

²⁰Fa hoy izy taminy: Aza atao hoe Naomy[1] intsony aho, fa ataovy hoe Mara[2] satria mangidy loatra ny nataon’ny Tsitoha tamiko.

²¹Nivoaka nanam-be aho fa nampodìn’NY TOMPO ho tsy manana na inona na inona. Nahoana aho no mbola ataonareo hoe Naomy, nefa NY TOMPO nitsangana ho fahavaloko, ary ny Tsitoha nampahory ahy?

²²Dia niverina i Naomy sy i Rota vinantovaviny, vehivavy moabita, ilay niaraka taminy tamin’izy niverina avy tany amin’ny tany Moaba. Tonga tao Betlehema izy tamin’ny niandohan’ny taom-pijinjana ny varimbazaha.