Read La Bible en Malgache Rota 3 Bible Online

Rota 3 - La Bible en Malgache bible

Rota 3

¹Dia hoy i Naomy rafozambaviny taminy: Tsy hitady izay tokantrano hahitanao fiadanana va aho anaka, mba hahasoa anao?

²Ary ankehitriny, tsy isan’ny havantsika va i Boaza, tompon’ireo zatovovavy izay niarahanao? Indro, mikororòka varimbazaha eo am-pamoloana izy anio alina.

³Koa mandroa sy mihosora diloilo ary miakanjoa, dia midìna any am-pamoloana. Nefa aza atao fantatr’i Ralehilahy akory ianao raha tsy efa avy nihinana sy nisotro izy.

⁴Ary rehefa mandry izy dia fantaro izay andriany ary midira ka songay ny lamba eo an-tongony, dia mandria eo ianao. Ary holazainy aminao izay hataonao.

⁵Dia hoy izy taminy: Eny, hataoko izay rehetra lazainao amiko.

⁶Dia nidina tany am-pamoloana izy ka nanatanteraka izay rehetra nandidian’ny rafozambaviny azy.

⁷Ary rehefa avy nihinana sy nisotro i Boaza ka faly ny fony dia nandeha handry teo amin’ny sisin’ny antontam-bary izy; fa nandeha nitsaitsaika kosa i Rota, dia nanonga ny lamba teo an-tongony ka nandry teo.

⁸Ary nony mamatonalina dia nangorohoro Ralehilahy ka niarina hitsapa ary indro, nisy vehivavy nandry teo an-tongony.

⁹Dia hoy izy: Iza moa izato? Ary hoy kosa Ravehivavy: Rota mpanompovavinao aho. Mba rakofy ny lambanao ny mpanompovavinao, fa havana mahavotra ianao.

¹⁰Dia hoy izy: Hotahìn’NY TOMPO anie ianao, anaka! Izao farany izao ianao dia nanao soa be lavitra noho ny tamin’ny voalohany, noho ny tsy nandehananao nanaraka ny zatovo, na ny mahantra, na ny manankarena.

¹¹Koa ankehitriny anaka, aza matahotra; hataoko aminao izay rehetra angatahinao; fa fantatry ny fireneko rehetra eo an-tanàna fa vehivavy mendrika ianao.

¹²Ankehitriny, marina fa havana mahavotra aho, nefa misy havana mahavotra akaiky kokoa noho izaho.

¹³Mitoera ihany atỳ anio alina, ary rehefa maraina, raha hanavotra anao izy dia tsara izany, aoka izy no hanavotra anao; fa raha toa ka tsy hanao izany izy dia izaho no hanavotra anao, raha velona koa NY TOMPO! Mitoera ihany atỳ mandra-paharain’ny andro.

¹⁴Dia nandry teo an-tongony mandra-paharain’ny andro i Rota, ary nifoha raha mbola maizimaizina, ilay mbola tsy ifankahalalana iny. Fa hoy Ralehilahy: Aza avela ho fantatr’olona fa tatỳ am-pamoloana Ravehivavy!

¹⁵Dia hoy koa izy: Ento atỳ ny lamba itafianao ka hazòny. Ary rehefa nataony izany dia namatra varimbazaha inenin’ny famarana i Boaza ka nampitondrainy azy izany. Dia lasa nankany an-tanàna i Boaza.

¹⁶Rehefa tonga tany amin’ny rafozambaviny i Rota dia hoy i Naomy: Nanao ahoana izay tany, anaka? Dia nambarany azy izay rehetra nataon-dRalehilahy taminy.

¹⁷Hoy koa izy: Ireto varimbazaha inenin’ny famarana ireto dia nomeny ahy; fa hoy izy tamiko: Aza mandeha tsy mitondra zavatra ho any amin’ny rafozambavinao.

¹⁸Dia hoy i Naomy: Mitoera ihany anaka, mandra-pahafantatrao izay hiafaran’ny raharaha; fa tsy hijanona Ralehilahy raha tsy vitainy anio ihany izany.