Read La Bible en Malgache 1Samoela 11 Bible Online

1Samoela 11 - La Bible en Malgache bible

1Samoela 11

¹Ary niakatra i Nahasy amonita ka nitoby tandrifin’i Jabesy-Gileada; dia hoy ny mponina rehetra tao Jabesy tamin’i Nahasy: Manaova fanekena aminay, dia hanompo anao izahay.

²Fa hoy i Nahasy amonita: Izao no hanaovako fanekena aminareo: Hopotsirina ny masonareo havanana rehetra ka hataoko fandatsana ny Israely rehetra izany.

³Nefa hoy ny loholon’i Jabesy taminy: Omeo hafitoana izahay mba hanirahanay olona ho any amin’ny tanin’ny Israely rehetra, koa raha toa tsy misy olona hamonjy anay dia handeha hanatona anao izahay.

⁴Dia tonga tany Gibean’i Saoly ny iraka ka nanambara ny teniny teo anatrehan’ny vahoaka; dia nanandratra ny feony ny vahoaka rehetra ka nitomany.

⁵Ary indro, tonga avy tany an-tsaha i Saoly, sady nandroaka omby no niteny hoe: Inona izato manjo ny olona no mitomany izy? Ary nambarany azy ny tenin’ny mponina tao Jabesy.

⁶Dia tonga tamin’i Saoly ny Fanahin’Andriamanitra teo am-pandrenesana izany teny izany ka nirehitra mafy ny hatezerany.

⁷Dia naka omby roa izy ka norasainy ireo ary nampitondrainy ny iraka ho any amin’ny faritry ny tanin’ny Israely rehetra ka hoy izy: Na iza na iza no tsy mandeha hanaraka an’i Saoly sy i Samoela dia tahaka ireny no hanaovana ny ombiny. Dia nahazo ny olona ny fahatahorana NY TOMPO ka nandeha toy ny olona iray izy.

⁸Ary nandamina azy tany Bezeka i Saoly. Telo hetsy no isan’ny Zanak’Israely ary telo alina no isan’ny lehilahin’ny Joda.

⁹Hoy i Saoly tamin’ny iraka izay tonga teo: Izao no holazainareo amin’ny mponina ao Jabesy-Gileada: Rahampitso, rehefa mafampana iny ny andro dia hisy famonjena ho anareo. Dia tonga ny iraka ka nanambara izany tamin’ny mponina tao Jabesy, dia faly ireo.

¹⁰Ary hoy ny mponina tao Jabesy: Rahampitso no hivoahanay ho eny aminareo ka hataonareo aminay izay rehetra sitrakareo.

¹¹Nony maraina dia nozarain’i Saoly ho telo toko ny olona ka tonga teo amin’ny toby izy ireo tamin’ny fotoam-piambenana maraina, ary namely ny Amonita mandra-pahafampanan’ny andro. Izay sisa kosa dia niely patrana ka tsy nisy na dia olona roa aza tafaraka.

¹²Hoy ny vahoaka tamin’i Samoela: Iza moa no niteny hoe: I Saoly va no hanjaka aminay? Atolory anay ireny olona ireny hovonoinay ho faty.

¹³Nefa hoy i Saoly: Tsy hisy olona hovonoina ho faty anio; fa androany no nanaovan’NY TOMPO famonjena teo amin’ny Israely.

¹⁴Ary hoy i Samoela tamin’ny vahoaka: Andeha isika hankany Gilgala hanamafy ny fanjakana any.

¹⁵Dia lasa nankany Gilgala ny vahoaka manontolo, ary tany Gilgala no nananganany an’i Saoly ho mpanjaka teo anatrehan’NY TOMPO; tany koa no nanolorany fanati-pihavanana teo anatrehan’NY TOMPO, dia nifaly indrindra teo i Saoly mbamin’ny lehilahin’ny Israely rehetra.