Read La Bible en Malgache 1Samoela 15 Bible Online

1Samoela 15 - La Bible en Malgache bible

1Samoela 15

¹Hoy i Samoela tamin’i Saoly: NY TOMPO naniraka ahy hanosotra anao ho mpanjakan’ny Israely olony; koa ankehitriny mihainoa ny tenin’NY TOMPO ianao.

²Izao no lazain’Andriamanitra, Tompon’izao rehetra izao: Hovalìko izay nataon’ny Amalekita tamin’ny Israely, dia ny nanakanany azy tany an-dalana, fony izy niakatra avy tany Ejipta.

³Koa mandehana ankehitriny ka asio ny Amalekita, ataovy zavatra voaozona izay rehetra mety ho azy, aza asiana miangana fa vonoy avokoa, na lahy na vavy, na ankizy madinika, na zaza minono, na omby, na ondry aman’osy, na rameva, na boriky.

⁴Dia namory ny olona i Saoly ka nandamina azy tao Telaima: Roa hetsy ny mandeha an-tongotra ary iray alina kosa ny lehilahin’ny Joda.

⁵Dia tonga tao an-tanànan’ny Amalekita i Saoly ka nanao vela-pandrika tao an-dohasaha.

⁶Ary hoy i Saoly tamin’ny Kenita: Andeha miala ianareo ka midìna hiala amin’ny Amalekita, fandrao miaraka aringako aminy ianareo, fa ianareo dia nanisy soa ny Zanak’Israely rehetra, fony izy nivoaka avy tany Ejipta. Dia niala tamin’ny Amalekita ny Kenita.

⁷Ary i Saoly dia namely ny Amalekita hatrany Havila amin’ny lalana mankany Sora izay tandrifin’i Ejipta.

⁸Azony sambo-belona i Agaga, mpanjakan’ny Amalekita, fa ny vahoaka rehetra kosa dia nataony zavatra voaozona tamin’ny lelan-tsabatra.

⁹Nefa i Saoly sy ny olona dia tsy namono an’i Agaga sy izay tsara indrindra tamin’ny ondry aman’osy, ny omby, ny mifahy, ny zanak’ondry ary izay tsara rehetra, satria tsy foiny hatao zavatra voaozona ireny; ny ratsy rehetra sy izay tsy tiany kosa dia nataony zavatra voaozona avokoa.

¹⁰Ary tonga tamin’i Samoela ny tenin’NY TOMPO hoe:

¹¹Manenina Aho noho ny nanaovako an’i Saoly ho mpanjaka, fa niala tamin’ny fanarahana Ahy izy ka tsy nanatanteraka ny teniko. Dia tezitra i Samoela ka nitaraina tamin’NY TOMPO nandritra ny alina.

¹²Ary nifoha vao maraina i Samoela mba hitsena an’i Saoly, fa nisy nilaza tamin’i Samoela hoe: Efa tonga ato Karmela i Saoly. Indro, nanorina fahatsiarovana ho an’ny tenany izy, dia nihodina ka nandroso nidina ho any Gilgala.

¹³Dia tonga teo amin’i Saoly i Samoela, ary hoy i Saoly taminy: Hotahìn’NY TOMPO anie ianao; efa nanatanteraka ny tenin’NY TOMPO aho.

¹⁴Hoy kosa i Samoela: Inona anefa izany fibarareoky ny ondry aman’osy ren’ny sofiko sy ny fitrenan’ny omby reko izany?

¹⁵Hoy i Saoly: Avy tany amin’ny Amalekita no nitondrana ireny, fa ny olona dia namela izay ondry aman’osy sy omby tsara indrindra mba hovonoina hatao fanatitra ho an’NY TOMPO Andriamanitrao, fa ny sisa dia nataonay zavatra voaozona avokoa.

¹⁶Dia hoy i Samoela tamin’i Saoly: Aoka izay, fa hambarako aminao izay nolazain’NY TOMPO tamiko alina. Ary hoy izy taminy: Ambarao ary.

¹⁷Dia hoy i Samoela: Na dia noheverinao ho kely aza ny tenanao, moa tsy tonga lohan’ny firenen’Israely va? Ary NY TOMPO nanosotra anao ho mpanjakan’ny Israely;

¹⁸dia naniraka anao NY TOMPO ka niteny hoe: Mandehana ka ataovy zavatra voaozona avokoa ny Amalekita mpanota ary miadia aminy ambara-paharingany.

¹⁹Koa nahoana ianao no tsy nihaino ny feon’NY TOMPO fa nanao ampihimamba tamin’ny babo ary nanao izay ratsy teo imason’NY TOMPO?

²⁰Hoy i Saoly tamin’i Samoela: Efa nihaino ny feon’NY TOMPO ihany aho ka nandeha tamin’izay nanirahan’NY TOMPO ahy ary nitondra an’i Agaga, mpanjakan’ny Amalekita, sady nandringana ny Amalekita rehetra.

²¹Nefa nakan’ny olona ny ondry aman’osy sy omby tamin’ny babo, dia izay soa avy tamin’ny zavatra hatao zavatra voaozona mba hovonoina hatao fanatitra ho an’NY TOMPO Andriamanitrao ao Gilgala.

²²Fa hoy i Samoela: Sitraky NY TOMPO va ny fanatitra dorana manontolo sy ny fanatitra hafa alatsa-dra mihoatra noho ny mihaino ny feon’NY TOMPO? E! Ny mankatò no tsara noho ny fanatitra, ny mihaino no tsara noho ny jaboran’ondrilahy.

²³Fa ny fikomiana dia toy ny heloka amin’ny fanaovana sikidy, ary ny ditra dia toy ny manompo sampy sy terafima*. Satria nandà ny tenin’NY TOMPO ianao dia nolaviny tsy ho mpanjaka.

²⁴Hoy i Saoly tamin’i Samoela: Efa nanota aho, satria efa nandika ny tenin’NY TOMPO sy ny teninao; fa natahotra ny vahoaka aho ka nihaino ny feony.

²⁵Koa ankehitriny, miangavy anao aho, mamelà ny heloko ary miverena amiko indray mba hiankohofako eo anatrehan’NY TOMPO.

²⁶Fa hoy i Samoela tamin’i Saoly: Tsy hiverina aminao aho; fa efa nandà ny tenin’NY TOMPO ianao, ary NY TOMPO kosa efa nandà anao tsy ho mpanjakan’ny Israely intsony.

²⁷Nony nihodina handeha i Samoela, dia nohazonin’i Saoly ny sisin’akanjony ka rovitra.

²⁸Dia hoy i Samoela tamin’i Saoly: Efa norovitin’NY TOMPO ho afaka aminao androany ny fanjakan’Israely ka nomeny olon-kafa izay tsara noho ianao.

²⁹Ary izao koa, ny Voninahitr’Israely dia tsy mba handainga na hanenina, fa tsy olona Izy ka hanenina.

³⁰Fa hoy i Saoly: Efa nanota aho izao, kanefa mba miangavy anao aho, omeo voninahitra eo anatrehan’ny loholoko sy eo anatrehan’ny Israely aho, koa andeha re hiara-miverina amiko indray mba hiankohofako eo anatrehan’NY TOMPO Andriamanitrao.

³¹Dia niverina nanaraka an’i Saoly indray i Samoela ka niankohoka teo anatrehan’NY TOMPO i Saoly.

³²Dia hoy i Samoela: Entonareo eto amiko i Agaga, mpanjakan’ny Amalekita. Ary nankeo aminy i Agaga sady falifaly ka niteny hoe: Lasa tokoa ny fangidian’ny fahafatesana.

³³Fa hoy i Samoela: Toy ny tsy nampananan’ny sabatrao zanaka ny vehivavy no tsy hananan’ny reninao zanaka kosa. Dia notetitetehin’i Samoela teo anatrehan’NY TOMPO tao Gilgala i Agaga.

³⁴Dia nankany Rama i Samoela; fa i Saoly kosa dia niakatra tany amin’ny tranony tao Gibean’i Saoly.

³⁵Ary tsy namangy an’i Saoly intsony i Samoela ambara-pahafatiny; eny, nalahelo an’i Saoly i Samoela. NY TOMPO kosa nanenina tamin’ny nanaovany an’i Saoly ho mpanjakan’ny Israely.