Read La Bible en Malgache 1Samoela 16 Bible Online

1Samoela 16 - La Bible en Malgache bible

1Samoela 16

¹Hoy NY TOMPO tamin’i Samoela: Mandra-pahoviana no halahelovanao an’i Saoly, nefa Izaho efa nandà azy tsy ho mpanjakan’ny Israely? Fenoy diloilo ny tandrokao ka mandehana, fa hirahiko ho any amin’i Jese betlehemita ianao; fa efa nahita mpanjaka ho Ahy ao amin’ny zanany Aho.

²Fa hoy i Samoela: Hataoko ahoana no fandeha any? Raha ren’i Saoly izany, moa tsy hovonoiny va aho? Hoy NY TOMPO: Mitondrà ombivavy kely ianao ka lazao hoe: Avy hamono zavatra hatao fanatitra ho an’NY TOMPO aho.

³Dia antsoy i Jese mba ho any amin’ny fanatitra, ary Izaho no hampahafantatra anao izay hataonao ka hohosoranao ho Ahy izay holazaiko aminao.

⁴Ary nanatanteraka izay nolazain’NY TOMPO i Samoela ka tonga tao Betlehema. Nitsena azy tamin-kovitra ny loholona teo an-tanàna ka niteny hoe: Fihavanana va no iavianao?

⁵Dia hoy izy: Fihavanana; avy hamono zavatra hatao fanatitra ho an’NY TOMPO aho; hamasino ny tenanareo, ary andeha hiaraka amiko ho any amin’ny fanatitra. Dia nohamasininy i Jese sy ny zanany ka nasainy ho any amin’ny fanatitra.

⁶Nony tonga ireo dia nijery an’i Eliaba izy ka niteny hoe: Ny voahosotry NY TOMPO tokoa ity eto anatrehany.

⁷Fa hoy NY TOMPO tamin’i Samoela: Aza mijery ny tarehiny na ny haavon’ny tsanganany fa efa nolaviko izy; satria tsy mba toy ny fijerin’ny olona no fijerin’NY TOMPO; ny olona dia mijery ny miseho eo ivelany, fa NY TOMPO kosa mijery ny fo.

⁸Ary niantso an’i Abinadaba i Jese ka nampandalo azy teo anatrehan’i Samoela. Fa hoy izy: Tsy ity no nofidin’NY TOMPO.

⁹Dia nampandalo an’i Sama indray i Jese. Fa hoy izy: Tsy ity no nofidin’NY TOMPO.

¹⁰Nampandalo fito lahy tamin’ny zanany teo anatrehan’i Samoela i Jese, nefa hoy i Samoela tamin’i Jese: Tsy nofidin’NY TOMPO ireto.

¹¹Ary hoy i Samoela tamin’i Jese: Tapitra eto avokoa va ny zanakao lahy rehetra? Dia hoy izy: Ny faralahy no sisa, fa miandry ondry izy. Hoy i Samoela tamin’i Jese: Maniraha olona haka azy, fa tsy hipetraka hihinana isika raha tsy tonga eto izy.

¹²Dia nandefa iraka haka azy izy. Mena volo izy sady bary maso no tsara tarehy. Ary hoy NY TOMPO: Mitsangàna, hosory izy, fa io no izy.

¹³Ary nandray ny tandroka feno diloilo i Samoela ka nanosotra azy teo anatrehan’ny rahalahiny; nanomboka tamin’iny andro iny dia tonga tamin’i Davida ny Fanahin’NY TOMPO. Dia nitsangana i Samoela ka nankany Rama.

¹⁴Dia niala tamin’i Saoly ny Fanahin’NY TOMPO, ary nisy fanahy ratsy avy tany amin’NY TOMPO nampahatahotra azy.

¹⁵Hoy ny mpanompon’i Saoly taminy: Indro, misy fanahy ratsy avy any amin’Andriamanitra mampahatahotra anao.

¹⁶Aoka ny tomponay haniraka anay mpanomponao izay eto anatrehanao, mba hitady olona mahay mitendry lokanga; koa rehefa misy fanahy ratsy avy amin’Andriamanitra tonga aminao dia hitendry amin’ny tanany izy ka ho tsara ianao.

¹⁷Hoy i Saoly tamin’ny mpanompony: Mizahà ary izay olona mahay mitendry tsara ka ento etỳ amiko.

¹⁸Hoy ny iray tamin’ny zatovony: Indro, ny iray amin’ny zanak’i Jese betlehemita no hitako mahay mitendry, sady lehilahy mahery sy mpiantafika izy no mahay mandaha-teny sy tsara tarehy, ary NY TOMPO momba azy.

¹⁹Dia nandefa iraka tany amin’i Jese i Saoly hilaza hoe: Iraho hankaty amiko i Davida zanakao izay miandry ondry.

²⁰Ary naka mofo tokony ho zakan’ny boriky iray sy divay iray siny hoditra ary zanak’osy i Jese ka nampitondrainy an’i Davida zanany ho an’i Saoly ireo.

²¹Dia tonga tany amin’i Saoly i Davida ka niseho teo anatrehany; ary tiany indrindra izy ka tonga mpitondra ny fiadiany.

²²Koa nandefa iraka tany amin’i Jese i Saoly hilaza hoe: Miangavy anao aho, avelao i Davida hitoetra eto anatrehako, satria efa mahita fitia amiko izy.

²³Rehefa nisy fanahy avy tany amin’Andriamanitra tonga tamin’i Saoly dia noraisin’i Davida ny lokanga ka notendren’ny tanany; dia maivamaivana sady nihatsara i Saoly, ary niala taminy ny fanahy ratsy.