Read La Bible en Malgache 1Samoela 2 Bible Online

1Samoela 2 - La Bible en Malgache bible

1Samoela 2

¹Ary nivavaka i Hana ka hoy izy: Ny foko dia ravoravo amin’NY TOMPO, ny tandroko* dia voasandratra amin’NY TOMPO, ny vavako dia misokatra hamaly ny fahavaloko satria mifaly amin’ny famonjenao aho.

²Tsy misy masina tahaka NY TOMPO satria tsy misy afa-tsy Ianao; tsy misy vatolampy tahaka ny Andriamanitsika.

³Aza mahery miteny an’avona ary aoka tsy haloaky ny vavanareo ny fireharehana, fa NY TOMPO no Andriamanitry ny fahalalana ary Izy no mandanja ny asa.

⁴Tapaka ny tsipìkan’ny olo-mahery ary izay mila ho reraka dia misikina hery.

⁵Mikarama mofo ny voky ary mianina kosa ny noana; ny momba dia miteraka fito ary mihamalemy kosa ny maro anaka.

⁶NY TOMPO no mahafaty sy mahavelona; Izy no mampidina ho any amin’ny fitoeran’ny maty* sy mampiakatra avy any.

⁷NY TOMPO no mampahantra sy mampanankarena; Izy no mampietry sy mampisandratra.

⁸Izy no manangana ny fadiranovana avy amin’ny vovoka sy manandratra ny mahantra avy eo amin’ny zezika mba hampiara-mitoetra azy amin’ny olo-manankaja sy hampandova azy sezam-boninahitra. Fa an’NY TOMPO ny andrin’ny tany ary eo amboniny no ametrahany izao tontolo izao.

⁹Ny tongotry ny olo-masiny dia tandremany, fa ny ratsy fanahy kosa dia hampangininy any amin’ny haizina, satria tsy amin’ny hery no handresen’ny olona.

¹⁰Ho torotoro izay miady amin’NY TOMPO; any an-danitra Izy no hampikotroka hamely azy. NY TOMPO hitsara ny vazan-tany rehetra; hanome hery ny mpanjakany Izy sady hanandratra ny tandroky ny voahosony.

¹¹Ary nankany an-tranony tany Rama i Elkana, fa ny zaza kosa dia nanao fanompoam-pivavahana ho an’NY TOMPO teo anatrehan’i Ely mpisorona.

¹²Ny zanakalahin’i Ely dia tena ratsy fanahy sady tsy nahalala NY TOMPO.

¹³Izao no fanaon’ny mpisorona tamin’ny olona: Rehefa nisy olona namono zavatra hatao fanatitra dia avy ny zatovon’ny mpisorona nitondra fitrebika telo rantsana teny an-tanany, raha mbola ahandroina ny hena,

¹⁴dia natsindrony tao anatin’ny fanendasana ny fitrebika, na tao anatin’ny fahandroan-kena, na ny vilany, na ny vilanibe, koa izay rehetra azon’ny fitrebika tao dia nalain’ny mpisorona ho azy. Izany no fanaony tamin’ny Israely rehetra izay tonga tao Silo.

¹⁵Ary raha tsy mbola nodorana ho fofona ny jabora dia avy ny zatovon’ny mpisorona ka niteny tamin’izay lehilahy namono zavatra hatao fanatitra hoe: Omeo hena hatsatsika ho an’ny mpisorona; fa tsy handray hena masaka avy aminao izy fa manta ihany.

¹⁶Raha hoy ilay olona aminy hoe: Aoka hodorana aloha ny jabora fa avy eo vao halainao izay tianao, dia novaliny hoe: Tsia; fa omeo izao ankehitriny izao ihany; fa raha tsy izany dia halaiko an-keriny.

¹⁷Koa lehibe indrindra ny helok’ireo zatovo ireo teo anatrehan’NY TOMPO satria namingavinga ny fanatitra ho an’NY TOMPO izy ireo.

¹⁸I Samoela dia nanao fanompoam-pivavahana teo anatrehan’NY TOMPO. Mbola zaza izy tamin’izany ary nisalotra efoda* vita tamin’ny lamba rongony.

¹⁹Nanaovan’ny reniny akanjo kely izy; noentiny ho azy isan-taona isan-taona izany rehefa niara-niakatra tamin’ny vadiny hanolotra ny fanatitra fanao isan-taona izy.

²⁰Ary nitsodrano an’i Elkana mivady i Ely hoe: Homen’NY TOMPO zaza amin’ity vehivavy ity anie ianao ho solon’ilay voatolotra ho an’NY TOMPO. Dia lasa nody izy mivady.

²¹Dia namangy an’i Hana NY TOMPO ka nanana anaka indray izy ary niteraka lahy telo sy vavy roa. Ary nitombo teo anatrehan’NY TOMPO i Samoela zaza.

²²Efa antitra tokoa i Ely, ary reny izay rehetra nataon’ny zanany lahy tamin’ny Israely rehetra sy ny nandriany tamin’ireo vehivavy izay nanompo teo amin’ny varavaran’ny tranolay fihaonana*.

²³Dia hoy izy taminy: Nahoana ianareo no manao izany zavatra izany? Reko amin’ny olona rehetra ny ratsy ataonareo.

²⁴Tsia, anaka, tsy tsara ny teny reko; fa mampanota ny olon’NY TOMPO ianareo.

²⁵Raha misy olona manota amin’olona dia Andriamanitra no hitsara azy; fa raha misy kosa manota amin’NY TOMPO, iza no hifona ho azy? Nefa tsy nihaino ny tenin’ny rainy izy ireo satria efa sitraky NY TOMPO ny hahafaty azy ireo.

²⁶Ary i Samoela zaza dia nitombo ka sady tian’NY TOMPO izy no tian’ny olona koa.

²⁷Nisy lehilahin’Andriamanitra nankany amin’i Ely ka niteny taminy hoe: Izao no lazain’NY TOMPO: Tsy efa niseho tamin’ny ankohonan-drainao tokoa va Aho raha mbola tany Ejipta tao an-tranon’i Farao izy?

²⁸Eny, nofidiko tamin’ireo fokon’ny Israely rehetra izy ho mpisoroko mba hanolotra fanatitra eo ambonin’ny alitarako sy handoro ditin-kazo manitra ary hisalotra efoda* eo anatrehako, dia nomeko ho an’ny taranaky ny rainao ny fanatitra rehetra aterin’ny Zanak’Israely amin’ny afo.

²⁹Koa nahoana no hitsakitsahinareo ny fanatitra alatsa-dra sy ny fanatitra avy amin’ny zavamaniry izay aterina ho Ahy, dia ilay nasaiko atao ao amin’ny fonenako? Ny zanakao no omenao voninahitra mihoatra noho Izaho, mba hanatavy ny tenanareo amin’izay tsara indrindra amin’ny fanatitra rehetra atolotry ny Israely oloko!

³⁰Koa izany no ilazan’NY TOMPO, Andriamanitry ny Israely hoe: Voalazako tokoa fa ny taranakao sy ny taranaky ny rainao no handeha eo anatrehako mandrakizay; fa ankehitriny kosa, hoy NY TOMPO, sanatria Ahy izany; fa izay manome voninahitra Ahy no homeko voninahitra, ary izay manamavo Ahy no ho afa-baraka.

³¹Indro, avy ny andro izay hanapahako ny sandrinao sy ny sandrin’ny taranaky ny rainao, koa tsy hisy lehilahy ho tratra antitra amin’ny taranakao.

³²Ary hahita fahavalo ao amin’ny fonenako ianao, na inona na inona soa natao tamin’ny Israely, koa tsy hisy lehilahy ho tratra antitra amin’ny taranakao mandrakizay.

³³Nefa hisy lehilahy iray amin’ny taranakao izay tsy hesoriko eo anilan’ny alitarako mba hahapahina ny masonao sy handany ny ainao, ary ny taranakao rehetra dia ho faty raha vao herotrerony.

³⁴Ary izao no ho famantarana ho anao, izay hanjo ny zanakao roa lahy, dia i Hofinia sy i Finehasa: Andro iray no hahafatesan’izy mirahalahy.

³⁵Izaho hanangana mpisorona mahatoky ho Ahy izay hanatanteraka ny ato am-poko sy ato an-tsaiko; ary hampaharitra ny taranany Aho ka handeha eo anatrehan’ny voahosotro mandrakizay izy.

³⁶Ary ho avy izay sisa rehetra amin’ny taranakao ka hiankohoka eo anatrehany hangataka vola kely sy mofo iray sady hiteny hoe: Miangavy anao aho, mba tendreo ho isan’ny mpisorona aho mba hahazoako sombi-mofo hohanina.