Read La Bible en Malgache 1Samoela 21 Bible Online

1Samoela 21 - La Bible en Malgache bible

1Samoela 21

¹Dia niainga i Davida; fa i Jonatana kosa dia niverina tany an-tanàna.

²Ary tonga tany Noba, tany amin’i Ahimeleka mpisorona i Davida; dia toran-kovitra i Ahimeleka rehefa nihaona tamin’i Davida ka niteny taminy hoe: Nahoana no mandeha irery ianao fa tsy misy miaraka aminao?

³Dia hoy i Davida tamin’i Ahimeleka mpisorona: Ny mpanjaka dia efa nanome raharaha ahy ka hoy izy tamiko: Aoka tsy ho fantatr’olona ny raharaha nanirahako sy nampanaoviko anao, koa nasaiko nankarỳ ny zatovoko.

⁴Koa inona no misy ato aminao? Omeo mofo dimy aho ho vatsiko, na izay azonao atao.

⁵Hoy ny mpisorona tamin’i Davida: Tsy misy mofo fihinana eto an-tanako fa mofo masina ihany no ato; raha mba nifady vehivavy ahay mantsy ny zatovo!

⁶Ary hoy i Davida tamin’ny mpisorona: Eny, toy ny fanao rehefa hiady dia tsy niara-nitoetra tamim-behivavy izahay; ary tamin’izaho niainga dia masina ny fiadian’ny zatovo; ary na tsy masina aza ny anton-dianay dia hohamasinina izy anio noho ny fiadiana.

⁷Dia nanome azy mofo masina ny mpisorona satria tsy nisy mofo teo afa-tsy ny mofo atao fanatitra izay nalainy teo anatrehan’NY TOMPO mba hosoloina mofo mafana amin’ny andro anesorana azy.

⁸Nefa nisy iray tamin’ny mpanompon’i Saoly teo tamin’izany andro izany voahazona teo anatrehan’NY TOMPO; i Doega edomita no anarany; lehiben’ny mpiandry ondrin’i Saoly izy io.

⁹Dia hoy i Davida tamin’i Ahimeleka: Tsy misy lefona na sabatra va eto aminao? Fa tsy nitondra ny sabatro na ny fiadiako etỳ amiko aho satria nahamaika ny raharahan’ny mpanjaka.

¹⁰Fa hoy ny mpisorona: Ny sabatr’i Goliata filistina, ilay novonoinao tao amin’ny lohasaha Elaha no indro, mifono akanjo ao ambadiky ny efoda* ao; koa raha hoentinao dia ento; fa tsy misy afa-tsy iny eto. Dia hoy i Davida: Tsy misy tahaka iny, fa omeo ahy.

¹¹Tamin’izany andro izany dia niainga i Davida ka nandositra mba tsy ho azon’i Saoly. Dia tonga tany amin’i Akisy, mpanjakan’i Gata izy.

¹²Ary hoy ny mpanompon’i Akisy taminy: Tsy ity moa no Davida, mpanjakan’ny tany? Tsy izy va no nandihizana sy nifampihirana hoe: I Saoly dia nahafaty arivoarivo fa i Davida dia nahafaty alinalina?

¹³Nalatsak’i Davida tao am-pony izany teny izany ka natahotra mafy an’i Akisy mpanjakan’i Gata izy.

¹⁴Dia nody adala teo imasony izy ka nanao fihetsiky ny olona very saina, sady nanoratsoratra teo amin’ny lelam-bavahady izy no navelany hanorika tamin’ny somony ny iviny.

¹⁵Dia hoy i Akisy tamin’ny mpanompony: Indro, hitanareo fa very saina io lehilahy io, koa nahoana no noentinareo tetỳ amiko?

¹⁶Moa mitady olona very saina va aho no nitondranareo ity olona very saina ity hanondrana eto anatrehako? Moa hiditra ato an-tranoko va Ilehio?