Read La Bible en Malgache 1Samoela 23 Bible Online

1Samoela 23 - La Bible en Malgache bible

1Samoela 23

¹Nisy nanambara tamin’i Davida hoe: Indro ny Filistina dia mamely an’i Keila ka mamabo ny ao am-pamoloana.

²Dia nanontany tamin’NY TOMPO i Davida hoe: Handeha hamely izao Filistina izao va aho? Hoy NY TOMPO tamin’i Davida: Mandehana, asio ny Filistina ka vonjeo i Keila.

³Ary hoy ny olon’i Davida taminy: E! Atỳ Joda aza isika matahotra, koa mainka rehefa mankany Keila hiady laharana amin’ny miaramilan’ny Filistina?

⁴Dia mbola nanontany tamin’NY TOMPO indray i Davida ka novalin’NY TOMPO hoe: Miaingà, midìna hankany Keila, fa Izaho no hanolotra ny Filistina ho eo an-tananao.

⁵Dia lasa nankany Keila i Davida sy ny olony ka niady tamin’ny Filistina sy namabo ny andiam-bibiny sady nahafaty olona be dia be, ary voavonjin’i Davida ny mponina tao Keila.

⁶Ary i Abiatara, zanak’i Ahimeleka, rehefa nandositra nankany amin’i Davida tany Keila, dia nitondra efoda* teny an-tanany.

⁷Nisy nanambara tamin’i Saoly fa tonga tao Keila i Davida. Dia hoy i Saoly: Andriamanitra efa hanolotra azy ho eo an-tanako; efa voahidy izy izao satria tafiditra ao amin’ny tanàna misy vavahady mihidy.

⁸Ary namory ny vahoaka rehetra i Saoly mba hidina any Keila hanao fahirano an’i Davida sy ny olony.

⁹Nony fantatr’i Davida fa namorona hevi-dratsy hamelezana azy i Saoly dia hoy izy tamin’i Abiatara mpisorona: Ento etỳ ny efoda.

¹⁰Dia hoy i Davida: Ry TOMPO, Andriamanitry ny Israely ô, efa ren’ny mpanomponao tokoa fa mitady hankaty Keila i Saoly mba handrava ny tanàna noho ny amiko.

¹¹Koa moa ny mpitondra atỳ Keila va hanolotra ahy ho eo an-tanany? Hidina etỳ tokoa toy izay efa ren’ny mpanomponao va i Saoly? Ry TOMPO, Andriamanitry ny Israely ô, mifona aminao aho, ambarao amin’ny mpanomponao. Ary hoy NY TOMPO: Hidina izy.

¹²Dia hoy i Davida: Ny mpitondra etỳ Keila va hanolotra ahy sy ny oloko ho eo an-tanan’i Saoly? Ary hoy NY TOMPO: Hanolotra anao izy.

¹³Dia niainga i Davida sy ny olony tokony ho eninjato lahy ka niala tao Keila ary nandeha tamin’izay azony naleha. Ary nisy nilaza tamin’i Saoly fa efa nandositra niala tao Keila i Davida, dia nijanona tsy nandeha izy.

¹⁴Nitoetra tany an-tany efitra tao amin’ny fierena any an-tendrombohitra sy tany amin’ny havoana tany an-tany efitr’i Zifa i Davida. Nitady azy isanandro i Saoly, nefa Andriamanitra tsy nanolotra azy ho eo an-tanany.

¹⁵Hitan’i Davida fa nivoaka hitady ny ainy i Saoly. Tany an-tany efitr’i Zifa tany Horsa no nisy an’i Davida.

¹⁶Ary i Jonatana, zanak’i Saoly, niainga, dia nankany amin’i Davida tany Horsa ka nampahery azy tamin’Andriamanitra.

¹⁷Dia hoy izy taminy: Aza matahotra, fa tsy hahazo anao ny tanan’i Saoly raiko; fa ianao no ho mpanjaka amin’ny Israely, ary izaho no ho lefitrao, ary fantatr’i Saoly raiko koa izany.

¹⁸Ary nanao fifanekena teo anatrehan’NY TOMPO izy roa lahy; koa i Davida dia nitoetra tany Horsa, fa i Jonatana kosa dia nody any an-tranony.

¹⁹Niakatra nankany amin’i Saoly tany Gibea ny Zifita ka niteny hoe: Miery any aminay ao amin’ny fierena any an-tendrombohitra any Horsa, any amin’ny tany be havoana any Hakila izay atsimon’ny tany efitra, i Davida.

²⁰Koa ankehitriny, ry mpanjaka, araka ny fanirianao hidina dia midìna ianao, fa izahay no hanolotra azy ho eo an-tanan’ny mpanjaka.

²¹Hoy i Saoly: Hotahin’NY TOMPO anie ianareo, fa ianareo dia namindra fo tamiko.

²²Miangavy anareo aho, mandehana, fotory tsara indray ka fantaro tsara ny nalehany, ary hadihadio izay nahita azy tany fa tena fetsy, hono, izy iny.

²³Koa zahao sy fantaro tsara ny fierena rehetra izay iereny dia miverena atỳ amiko rehefa azonareo antoka izany, fa handeha hiaraka aminareo aho; raha mbola eto amin’ny tany izy dia hotadiaviko manerana ny fokon’i Joda rehetra.

²⁴Dia niainga nankany Zifa izy ireo hialoha an’i Saoly. I Davida sy ny olony kosa tamin’io dia tany amin’ny tany efitr’i Maona, tao amin’ny tany ngazana atsimon’ny tany efitra.

²⁵Ary nandeha i Saoly sy ny olony mba hitady azy. Nisy nilaza tamin’i Davida izany ka nidina tany amin’ny harambato izy ary nitoetra tany an-tany efitr’i Maona. Nony ren’i Saoly izany dia nanenjika an’i Davida tany an-tany efitr’i Maona izy.

²⁶Ary nandeha tamin’ny ilan’ny tendrombohitra iray i Saoly fa i Davida sy ny olony kosa dia tamin’ny ilany. Niezaka mafy handositra an’i Saoly i Davida fa i Saoly sy ny olony dia nihodidina an’i Davida sy ny olony mba hisambotra azy.

²⁷Kinanjo nisy iraka tonga tao amin’i Saoly niteny hoe: Avia haingana ianao fa efa manafika ny tany ny Filistina.

²⁸Dia niverina avy tamin’ny nanenjehany an’i Davida i Saoly ka nandeha niady tamin’ny Filistina; ary ny anaran’izany tany izany dia nataony hoe Sela-Hamalekota[7].