Read La Bible en Malgache 1Samoela 27 Bible Online

1Samoela 27 - La Bible en Malgache bible

1Samoela 27

¹Hoy i Davida anakampo: Mbola ho azon’ny tanan’i Saoly ihany aho indray andro any; tsy misy mahasoa ahy afa-tsy ny mandositra haingana any amin’ny tanin’ny Filistina, dia ho kivy i Saoly ka tsy hitady ahy manerana ny tanin’ny Israely intsony ary ho afaka amin’ny tanany aho.

²Dia niainga i Davida ka nandeha niaraka tamin’ny eninjato lahy nanaraka azy nankany amin’i Akisy, zanak’i Maoka, mpanjakan’i Gata.

³Nitoetra tao amin’i Akisy tao Gata i Davida, dia izy sy ny olony, samy miaraka amin’ny ankohonany avy ka i Davida dia niaraka tamin’ny vadiny roa, dia i Ahinoama jezirelita sy i Abigaila vadin’i Nabala karmelita.

⁴Nisy nanambara tamin’i Saoly fa efa nandositra nankany Gata i Davida, koa tsy nitady azy intsony izy.

⁵Ary hoy i Davida tamin’i Akisy: Raha mahita fitia eo imasonao aho dia aoka mba homena toerana ao amin’ny tanàna iray any ambanivohitra mba honenako, fa nahoana ny mpanomponao no hitoetra miaraka aminao eto amin’ny renivohitry ny fanjakana?

⁶Dia nomen’i Akisy azy androtr’izay i Ziklaga. An’ny mpanjakan’i Joda ambaraka androany i Ziklaga.

⁷Ny andro nitoeran’i Davida tany ambanivohitry ny Filistina dia herintaona sy efa-bolana.

⁸Ary niakatra i Davida sy ny olony ka nanafika ny Gesorita sy ny Gizrita ary ny Amalekita satria ireo no nonina tamin’ny tany hatrizay ela izay, hatrany akaikin’i Sora, hatrany amin’ny tany Ejipta.

⁹Namely ny tany i Davida ka tsy nisy novelominy na lehilahy na vehivavy, sady namabo ondry aman’osy sy omby, boriky sy rameva ary fitafiana izy, dia niverina nankany amin’i Akisy.

¹⁰Hoy i Akisy: Moa tsy nanafika va ianareo androany? Dia hoy i Davida: Nanafika ny tany atsimo izay any Joda sy izay an’ny Jeramelita ary izay an’ny Kenita izahay.

¹¹Tsy nisy novelomin’i Davida mba hoentiny any Gata, na lehilahy na vehivavy, fa hoy izy: Andrao hisy hilaza momba anay hoe: Toy izao no nataon’i Davida ary toy izany no fanaony tamin’ny andro rehetra nitoerany tany ambanivohitry ny Filistina.

¹²Ary nino an’i Davida i Akisy ka niteny hoe: Efa nampangidy hoditra ny tenany any amin’ny Israely olony izy ka ho mpanompoko mandrakizay.