Read La Bible en Malgache 1Samoela 28 Bible Online

1Samoela 28 - La Bible en Malgache bible

1Samoela 28

¹Tamin’izany andro izany ny Filistina dia namory ny miaramilany mba hanafika ny Israely. Ary hoy i Akisy tamin’i Davida: Aoka ho fantatrao tsara fa hiara-mandeha amiko hanafika ianao sy ny olonao.

²Hoy i Davida tamin’i Akisy: Ho fantatrao amin’izao tokoa izay hain’ny mpanomponao atao. Hoy kosa i Akisy tamin’i Davida: Raha izany dia hataoko mpiambina ahy manokana mandrakizay ianao.

³Efa maty i Samoela, ary ny Israely rehetra dia nisaona azy sy nandevina azy tao Rama, tao an-tanànany. Efa noroahin’i Saoly hiala amin’ny tany koa izay mpanontany amin’ny maty sy izay mpanandro.

⁴Ary nivory ny Filistina dia tonga nitoby tao Sonema, fa i Saoly kosa dia namory ny Israely rehetra ka nitoby tao Gilboa.

⁵Raha nahita ny miaramilan’ny Filistina i Saoly dia raiki-tahotra sady niemponempona tokoa ny fony.

⁶Dia nanontany tamin’NY TOMPO i Saoly nefa tsy namaly azy NY TOMPO, na tamin’ny nofy, na tamin’ny Orima, na tamin’ny mpaminany.

⁷Hoy i Saoly tamin’ny mpanompony: Itadiavo vehivavy mpanontany amin’ny maty aho hankanesako any hanontaniako aminy. Ary hoy ny mpanompony taminy: Indro, misy vehivavy mpanontany amin’ny maty ao Eny-Dora.

⁸Dia nanova tarehy i Saoly ka niakanjo fitafiana hafa. Ary nandeha niaraka tamin’ny olona roa lahy izy ka tonga tao amin-dRavehivavy nony alina. Hoy izy: Miangavy anao aho, manaova sikidy ho ahy hiantso fanahin’ny maty iray ka ampiakaro ho eto amiko izay hotononiko aminao.

⁹Hoy Ravehivavy taminy: Indro, fantatrao izay nataon’i Saoly tamin’ny namongorany ny mpanontany amin’ny maty sy ny mpanandro hiala amin’ny tany; koa nahoana ianao no mamandrika ny aiko hahafaty ahy?

¹⁰Ary nianiana tamin’NY TOMPO i Saoly ka niteny taminy hoe: Raha velona koa NY TOMPO dia tsy hisy heloka hahazo anao amin’izao zavatra izao.

¹¹Hoy Ravehivavy: Iza ary no hampiakariko ho eto aminao? Ary hoy izy: I Samoela no ampiakaro ho eto amiko.

¹²Nony hitan-dRavehivavy i Samoela, dia nidradradradra tamin’ny feo mahery izy ka niteny tamin’i Saoly hoe: Nahoana no namitaka ahy ianao? I Saoly ianao.

¹³Hoy ny mpanjaka taminy: Aza matahotra! Inona no hitanao? Hoy Ravehivavy tamin’i Saoly: Mahita andriamanitra miakatra avy amin’ny tany aho.

¹⁴Ary hoy izy taminy: Manao ahoana ny endriny? Dia hoy izy: Lehilahy antitra manao akanjobe ivelany no miakatra. Dia fantatr’i Saoly fa i Samoela izay ka niankohoka niondrika tamin’ny tany izy.

¹⁵Hoy i Samoela tamin’i Saoly: Nahoana no helingeleninao aho ka ampiakarinao? Dia hoy i Saoly: Sahirana loatra aho, fa miady amiko ny Filistina nefa Andriamanitra efa nahafoy ahy ka tsy mamaly teny ahy intsony, na amin’ny alalan’ny mpaminany, na amin’ny nofy; koa izany no niantsoako anao mba hampahafantaranao ahy izay hataoko.

¹⁶Hoy i Samoela: Nahoana no manontany amiko ianao, nefa NY TOMPO efa mahafoy anao ka tonga fahavalonao?

¹⁷NY TOMPO efa nanatanteraka izay nampilazainy ahy; fa efa nendahin’NY TOMPO hiala amin’ny tananao ny fanjakana ka nomeny olon-kafa, dia i Davida.

¹⁸Satria tsy nihaino ny feon’NY TOMPO ianao ka tsy nahatanteraka ny fahatezerany mirehitra tamin’ny Amalekita, dia izany no nanaovan’NY TOMPO izao zavatra izao taminao androany.

¹⁹Indray hatolotry NY TOMPO ho eo an-tanan’ny Filistina ny tenanao sy ny Israely; ary rahampitso dia ho etỳ amiko ianao sy ny zanakao; ary ny miaramilan’ny Israely koa dia hatolotry NY TOMPO ho eo an-tanan’ny Filistina.

²⁰Dia lavo niampatra tamin’ny tany niaraka tamin’izay i Saoly ka raiki-tahotra indrindra noho ny tenin’i Samoela, sady efa tsy nisy hery intsony izy, satria tsy nihinan-kanina indray andro sy indray alina maninjitra.

²¹Nankao amin’i Saoly Ravehivavy ka nahita azy raiki-tahotra indrindra dia niteny taminy hoe: Indro, ny mpanompovavinao nihaino ny feonao dia nanao ny aiko tsy ho zavatra aho ka nihaino ny teninao izay nolazainao tamiko.

²²Koa ankehitriny, miangavy anao aho, mba henoy kosa ny tenin’ny mpanompovavinao, ary aoka aho handroso sombin-kanina kely eo anoloanao; dia hano izany mba ho tanjaka ho anao rehefa handeha amin’ny alehanao ianao.

²³Fa nandà izy hoe: Tsy hihinana aho. Ny mpanompony sy Ravehivavy anefa dia mbola nanery azy ihany, hany ka nihaino ny feony ihany izy. Dia nitsangana avy teo amin’ny tany izy ka nipetraka teo am-parafara.

²⁴Ary Ravehivavy dia nanana zanak’omby mifahy tao an-trano; dia nandeha haingana izy ka namono izany, ary naka koba izy dia nofetafetainy ka nendasiny ho mofo tsy misy masirasira.

²⁵Dia narosony teo anoloan’i Saoly sy teo anoloan’ny mpanompony izany ka nihinana izy ireo, dia niainga ary lasa nandeha tamin’iny alina iny ihany.