Read La Bible en Malgache 1Samoela 29 Bible Online

1Samoela 29 - La Bible en Malgache bible

1Samoela 29

¹Ary namory ny miaramilany rehetra ho ao Afeka ny Filistina; fa ny Israely kosa dia nitoby teo anilan’ny loharano ao Jezirela.

²Nandroso nitarika ny miaramilany isan-jato sy isan’arivo ireo andrianan’ny Filistina; fa i Davida sy ny olony kosa dia nandroso teo aoriana niaraka tamin’i Akisy.

³Hoy ireo andrianan’ny Filistina: Haninona moa ireto Hebreo ireto? Ary hoy i Akisy tamin’ireo andrianan’ny Filistina: Tsy io va no i Davida, mpanompon’i Saoly, mpanjakan’ny Israely, ilay tatỳ amiko elaela ihany izay, ary tsy hitako izay tsininy hatrizay nialany niandany tamiko ka mandraka androany?

⁴Dia tezitra taminy ireo andrianan’ny Filistina ka niteny taminy hoe: Avereno ho any amin’ny fonenany izay efa nomenao azy ihany Ilehio fa aza avela hiara-midina amintsika hiady, fandrao ho tonga fahavalontsika raha miady; fa amin’ny inona no hahazoan’io sitraka amin’ny tompony? Tsy amin’ny lohan’ireto olona ireto va?

⁵Tsy io moa no i Davida izay nandihizana sy nanaovana hira mifamaly hoe: I Saoly dia nahafaty arivoarivo, fa i Davida dia nahafaty alinalina?

⁶Ary niantso an’i Davida i Akisy ka niteny taminy hoe: Raha velona koa NY TOMPO, olona marina ianao sady sitrako ny hiarahanao amiko mivoaka sy miditra eto an-toby satria tsy hitako izay tsininao hatrizay nahatongavanao teto amiko ka mandraka androany; nefa kosa tsy sitrak’ireo andriana ireo ianao.

⁷Koa miverena ary mandehana soa amantsara mba tsy hanaovanao izay tsy sitrak’ireo andrianan’ny Filistina.

⁸Fa hoy i Davida tamin’i Akisy: Inona no nataoko, ary inona no hitanao tamin’ny mpanomponao hatrizay nitoerako tatỳ aminao ka mandraka androany, no tsy hahazoako mandeha hiady amin’ny fahavalon’ny mpanjaka tompoko?

⁹Dia namaly an’i Davida i Akisy hoe: Fantatro fa tsara eo imasoko tahaka ny anjelin’Andriamanitra ianao; nefa ireo andrianan’ny Filistina no niteny hoe: Tsy hiara-miakatra amintsika hiady izy.

¹⁰Koa mifohaza vao maraina ianao mbamin’ny mpanompon’ny tomponao izay nanaraka anao; ary rehefa mifoha maraina ianareo ka mazava ny andro dia mandehana.

¹¹Ary nifoha vao mangiran-dratsy i Davida sy ny olony mba handeha hiverina maraim-be any amin’ny tanin’ny Filistina. Ny Filistina kosa dia niakatra nankany Jezirela.