Read La Bible en Malgache 1Samoela 3 Bible Online

1Samoela 3 - La Bible en Malgache bible

1Samoela 3

¹Nanao fanompoam-pivavahana ho an’NY TOMPO teo anatrehan’i Ely i Samoela zaza. Tamin’izany andro izany dia nahalana ny tenin’NY TOMPO ary tsy nisy fahitana niseho loatra.

²Indray andro anefa, raha nandry tao amin’ny fandrianany i Ely ary efa nihapahina ny masony tamin’izany ka tsy nahita izy

³sady tsy mbola maty ny jiron’Andriamanitra, ary i Samoela koa dia nandry tao amin’ny tempolin’NY TOMPO izay nisy ny vata misy ny faneken’Andriamanitra,

⁴dia niantso an’i Samoela NY TOMPO, ary hoy izy hoe: Inty aho.

⁵Dia nihazakazaka nankeo amin’i Ely izy ka niteny hoe: Inty aho, fa niantso ahy ianao. Nefa hoy i Ely: Tsy niantso aho, miverena matory. Dia lasa natory izy.

⁶Mbola niantso azy indray NY TOMPO hoe: Ry Samoela! Dia nifoha indray i Samoela ka nankao amin’i Ely ary niteny hoe: Inty aho, fa niantso ahy ianao. Nefa hoy izy: Tsy niantso aho, anaka; andeha miverina matory.

⁷Mbola tsy nahafantatra NY TOMPO mantsy i Samoela sady tsy mbola nanehoana ny tenin’NY TOMPO.

⁸Ary niantso an’i Samoela fanintelony NY TOMPO. Dia nifoha izy ka nankao amin’i Ely ary niteny hoe: Inty aho, fa niantso ahy ianao. Tamin’izay dia fantatr’i Ely fa NY TOMPO no niantso ny zaza.

⁹Koa hoy i Ely tamin’i Samoela: Andeha matory ihany; ary raha toa miantso anao Izy dia valio hoe: Mitenena, TOMPO ô, fa mihaino ny mpanomponao. Dia lasa natory teo amin’ny fandrianany i Samoela.

¹⁰Ary avy NY TOMPO dia nijoro teo ka niantso toy ny teo ihany hoe: Ry Samoela, ry Samoela ô! Dia namaly i Samoela hoe: Mitenena, fa mihaino ny mpanomponao.

¹¹Ary hoy NY TOMPO tamin’i Samoela: Indro Izaho hanao zavatra eo amin’ny Israely, koa izay rehetra mandre izany dia hangintsina ny sofiny roa.

¹²Amin’izany andro izany dia hotanterahiko amin’i Ely izay zavatra rehetra voalazako ny amin’ny taranany; hatomboko izany ka hotanterahiko.

¹³Fa efa nambarako taminy fa hotsaraiko mandrakizay ny taranany noho ny heloka izay fantany, satria nahatonga ozona ho an’ny tenany ny zanany nefa tsy nosakanany.

¹⁴Koa izany no nianianako ny amin’ny taranak’i Ely, fa tsy hisy fanatitra hahafaka ny heloky ny taranak’i Ely mihitsy, na fanatitra alatsa-dra izany na fanatitra avy amin’ny zavamaniry.

¹⁵Dia natory i Samoela mandra-paharain’ny andro; nony maraina dia namoha ny varavaran’ny tranon’NY TOMPO izy. Ary natahotra hilaza ny fahitana tamin’i Ely i Samoela.

¹⁶Fa niantso an’i Samoela i Ely ka niteny hoe: Ry Samoela, zanako! Dia hoy izy: Inty aho.

¹⁷Ary hoy izy: Inona no zavatra nolazain’NY TOMPO taminao? Miangavy anao aho, aza afeninao ahy; hataon’Andriamanitra aminao anie izany; eny, mihoatra noho izany aza, raha misy afeninao ahy ny zavatra rehetra nolazainy taminao.

¹⁸Dia nambaran’i Samoela taminy avokoa ny zavatra rehetra fa tsy nisy nafeniny. Dia hoy i Ely: Izy no TOMPO, aoka Izy hanao izay sitraky ny fony.

¹⁹Ary nitombo i Samoela sady nomba azy NY TOMPO ka tsy nisy navelany ho raraka an-tany ny teniny.

²⁰Ny Israely rehetra koa, hatrany Dana ka hatrany Bery-Sheba, dia nahalala fa tonga mpaminanin’NY TOMPO tokoa i Samoela.

²¹Dia mbola niseho tao Silo ihany NY TOMPO, satria niseho tamin’i Samoela tao Silo tamin’ny alalan’ny teniny NY TOMPO.