Read La Bible en Malgache 1Samoela 30 Bible Online

1Samoela 30 - La Bible en Malgache bible

1Samoela 30

¹Nony tonga teo Ziklaga i Davida sy ny olony tamin’ny andro fahatelo dia indro, fa efa nanafika tany Negeva sy Ziklaga ny Amalekita ka namely an’i Ziklaga sy nandoro azy tamin’ny afo.

²Namabo ny vehivavy sy izay rehetra tao izy ireo, na lehibe na kely, nefa tsy nisy novonoiny ireo na dia iray aza fa noentiny rehefa nanohy ny diany izy.

³Nony tonga tao amin’ny tanàna i Davida sy ny olony dia indro, efa levon’ny afo ny tanàna; ary ny vadiny mbamin’ny zanany lahy sy ny zanany vavy dia lasan-ko babo.

⁴Dia nanandra-peo nitomany i Davida sy ny mpanaraka azy mandra-pahalany ritra ny ranomasony.

⁵Voababo koa izy roa vavy vadin’i Davida, dia i Ahinoama jezirelita sy Abigaila, ilay novadin’i Nabala karmelita.

⁶Dia ory indrindra i Davida, fa ny olona dia nifampitaona hitora-bato azy satria samy nalahelo ny zanany lahy sy ny zanany vavy ny olona rehetra; fa i Davida kosa dia nampahery ny tenany tamin’NY TOMPO Andriamaniny.

⁷Ary hoy i Davida tamin’i Abiatara mpisorona, zanak’i Ahimeleka: Miangavy anao aho, ento etỳ amiko ny efoda*. Dia noentin’i Abiatara teo amin’i Davida ny efoda.

⁸Dia nanontany tamin’NY TOMPO i Davida hoe: Henjehiko va izany jirika izany? Ho tratrako va izy? Dia namaly azy NY TOMPO hoe: Enjeho izy fa ho tratranao tokoa ary ho afakao tokoa ireo babo.

⁹Dia lasa i Davida sy ny eninjato lahy izay nanaraka azy ka tonga teo amin’ny lohasahan-driaka Besora ary teo no nijanonan’ny sasany.

¹⁰I Davida sy ny efajato lahy no nanenjika; fa ny roanjato lahy kosa izay reraka ka tsy afaka nita ny lohasahan-driaka Besora dia nijanona tany aoriana.

¹¹Nahita lehilahy ejiptiana iray teny an-tsaha ny olona ka noentiny tany amin’i Davida. Dia nomeny hanina Ralehilahy ka nihinana sady nampisotroiny rano koa.

¹²Nomeny mofo aviavy didiny iray sy mofo voaloboka maina koa izy; ary rehefa nihinana izy dia nody indray ny ainy, satria efa telo andro sy telo alina izy tsy nihinan-kanina na nisotro rano.

¹³Ary hoy i Davida taminy: An’iza moa ianao, ary avy taiza? Ary hoy izy: Zatovo ejiptiana, mpanompon’ny Amalekita iray, aho; ary narian’ny tompoko aho afaka omaly satria narary.

¹⁴Izahay mantsy nanafika ny tany atsimo izay an’ny Keretita sy ny faritanin’ny Joda ary ny tany atsimo izay an’i Kaleba sady nandoro an’i Ziklaga tamin’ny afo.

¹⁵Hoy i Davida taminy: Hitondra ahy midina ho amin’izany jirika izany va ianao? Ary hoy izy: Mianiàna amiko amin’Andriamanitra ianao fa tsy hamono ahy na hanolotra ahy ho eo an-tanan’ny tompoko, dia hitondra anao midina ho amin’izany jirika izany aho.

¹⁶Nony noentiny nidina izy, indreo, miely manerana ny tany ny Amalekita ka homana sy misotro ary milanona noho ny haben’ny babo rehetra izay azony tamin’ny tanin’ny Filistina sy ny tanin’ny Joda.

¹⁷Ary namely azy tamin’iny takariva iny ka hatramin’ny ampitso hariva i Davida; tsy nisy olona afaka, afa-tsy zatovo efajato lahy izay nitaingina rameva ka lasa nandositra.

¹⁸Dia azon’i Davida izay rehetra efa nobaboin’ny Amalekita; azon’i Davida koa ny vadiny roa.

¹⁹Tsy nisy zavatra tsy azony, na kely na lehibe, na zazalahy na zazavavy, na inona na inona tamin’izay nobaboin’ireny; izany rehetra izany dia azon’i Davida avokoa.

²⁰Ary naka ny ondry aman’osy sy ny omby rehetra i Davida. Ireo izay nandeha teo aloha dia nitarika ireo biby kosa dia niantsoantso hoe: Itony ny babon’i Davida!

²¹Nony tonga teo amin’ny roanjato lahy izay reraka ka tsy afaka nanaraka azy ary navela teo amin’ny lohasahan-driaka Besora i Davida dia nandeha nitsena an’i Davida sy ny olona nanaraka azy izy ireo. Rehefa tonga teo akaikin’ny olona i Davida dia nanontany azy ireo izay fahasalamany.

²²Dia niteny ireo olona sompatra sy tena ratsy fanahy rehetra izay isan’ireo nanaraka an’i Davida hoe: Satria tsy mba niaraka tamintsika ireo dia tsy hanomezantsika azy ny babo izay azontsika, afa-tsy ny vadiny aman-janany avy ihany; ireo no aoka hoentiny dia aoka handeha izy.

²³Fa hoy i Davida: Aza manao izany amin’izay nomen’NY TOMPO antsika, ry rahalahy; fa niaro antsika Izy ary natolony teo an-tanantsika ny jirika izay tonga namely antsika.

²⁴Koa iza no hanaiky anareo amin’izany? Fa tahaka ny anjaran’izay nidina hiady ihany no ho anjaran’izay nitoetra tamin’ny entana: Hifampizara izany izy rehetra.

²⁵Dia izany no fanao hatramin’io andro io ka natao didy sy lalàna tamin’ny Israely ambaraka androany.

²⁶Nony tonga tao Ziklaga i Davida, dia mba nanaterany ho an’ireo loholon’ny Joda sakaizany koa ny babo sady hoy izy: Inty ny saotra ho anareo avy amin’ny babo azo tamin’ny fahavalon’NY TOMPO.

²⁷Ho an’izay ao Betela sy izay any Ramata amin’ny tany Negeva, ho an’izay ao Jatira

²⁸sy ho an’izay ao Aroera, ho an’izay ao Sifmota, ho an’izay ao Estemoa,

²⁹ho an’izay ao Rakala, ho an’izay any an-tanànan’ny Jeramelita, ho an’izay any an-tanànan’ny Kenita,

³⁰ho an’izay ao Horma, ho an’izay ao Borasana, ho an’izay ao Ataka,

³¹ho an’izay ao Hebrona ary ho an’izay any amin’ny tany rehetra nandehandehanan’i Davida sy ny olony.