Read La Bible en Malgache 1Samoela 31 Bible Online

1Samoela 31 - La Bible en Malgache bible

1Samoela 31

¹Ary niady tamin’ny Israely ny Filistina. Dia nandositra teo anoloan’ny Filistina ny lehilahin’ny Israely ka niampatrampatra teny an-tendrombohitra Gilboa ny faty.

²Nanenjika mafy an’i Saoly sy ny zanany ny Filistina ka matin’ny Filistina i Jonatana sy i Abinadaba ary i Malky-Soa, zanak’i Saoly.

³Mafy tamin’i Saoly ny ady; nifanehatra tamin’ny mpandefa tsipìka izy ka nangorohoro tokoa noho ny mpandefa tsipìka.

⁴Dia hoy i Saoly tamin’ny mpitondra ny fiadiany: Tsoahy ny sabatrao ka tsatohy miboroaka aho, fandrao avy irerỳ tsy mifora irerỳ ka hotsatohany miboroaka aho, dia hataony ho fihomehezana. Nefa tsy nety ny mpitondra ny fiadiany fa natahotra loatra. Dia nalain’i Saoly ny sabatra ka nianjerany.

⁵Rehefa hitan’ny mpitondra ny fiadiany fa maty i Saoly dia mba nianjera tamin’ny sabany koa izy ka niara-maty taminy.

⁶Dia niara-maty androtr’izay ihany i Saoly sy ny zanany telo lahy sy ny mpitondra ny fiadiany ary ny olony rehetra.

⁷Nony hitan’ny lehilahin’ny Israely teny andafin’ny lohasaha sy teny andafin’i Jordana fa nandositra ny lehilahin’ny Israely, ary maty i Saoly sy ny zanany, dia nandositra niala tao an-tanàna izy ireo, ary tonga ny Filistina ka nonina tao.

⁸Nony ampitso, raha tonga haka ny zavatra teo amin’ny maty ny Filistina, dia nahita an’i Saoly sy ny zanany telo lahy niampatrampatra teo an-tendrombohitra Gilboa.

⁹Dia notapahiny ny lohany sady nalainy ny fiadiany ary nandefa iraka tany amin’ny tanin’ny Filistina manodidina izy mba hanambara izany zavatra mahafaly izany ao amin’ny tranon’ny sampiny sy amin’ny olona.

¹⁰Dia napetrany tao amin’ny tranon’ireo Astarta* ny fiadiany; ary ny fatiny dia nofantsihany teo amin’ny mandan’i Bety-Sana.

¹¹Nony ren’ny mponina tany Jabesy-Gileada izay nataon’ny Filistina tamin’i Saoly

¹²dia niainga ny lehilahy mahery rehetra ka nandeha nandritra ny alina ary naka ny fatin’i Saoly sy ny fatin’ny zanany teo amin’ny mandan’i Bety-Sana; ary tonga tao Jabesy izy ireo ka nandoro azy tao.

¹³Ary noentiny ny taolany ka naleviny tao ambanin’ilay hazo tamarisika tao Jabesy, dia nifady hanina hafitoana izy ireo.