Read La Bible en Malgache 1Samoela 7 Bible Online

1Samoela 7 - La Bible en Malgache bible

1Samoela 7

¹Dia tonga teo ny mponina tao Kiriata-Jearima ka nitondra ny vata misy ny faneken’NY TOMPO niakatra; nitondra azy ho ao an-tranon’i Abinadaba, teo amin’ny havoana izy ireo, ary nanamasina an’i Eleazara zanany mba hitandrina ny vata misy ny faneken’NY TOMPO.

²Hatramin’izany andro izany dia nitoetra ela, roapolo taona, tany Kiriata-Jearima ny vata misy ny faneken’NY TOMPO; ary ny taranak’Israely rehetra dia nitaraina tamin’NY TOMPO.

³Dia hoy i Samoela tamin’ny taranak’Israely rehetra: Raha miverina amin’NY TOMPO amin’ny fonareo manontolo tokoa ary ianareo dia ario hiala aminareo ny andriamanitra tsy izy sy ireo Astarta* ka ampiomany ho an’NY TOMPO ny fonareo, ary aoka Izy ihany no hotompoinareo, dia hamonjy anareo amin’ny tanan’ny Filistina Izy.

⁴Dia nanary ireo Baala* sy ireo Astarta ny Zanak’Israely ka nanompo NY TOMPO irery ihany.

⁵Ary hoy i Samoela: Vorio any Mizpa ny Israely rehetra, dia hivavaka amin’NY TOMPO ho anareo aho.

⁶Dia nivory tany Mizpa izy, ary nanovo rano ka nandraraka izany teo anatrehan’NY TOMPO sady nifady hanina nandritra io andro io ka niteny hoe: Efa nanota tamin’NY TOMPO isika. Ary nitsara ny Zanak’Israely tany Mizpa i Samoela.

⁷Rehefa ren’ny Filistina fa vory tany Mizpa ny Zanak’Israely dia niakatra hamely azy ireo andrianan’ny Filistina. Nony nandre izany ny Zanak’Israely dia raiki-tahotra noho ny Filistina.

⁸Dia hoy ny Zanak’Israely tamin’i Samoela: Aza mitsahatra mitaraina amin’NY TOMPO Andriamanitsika ho anay ianao, mba hamonjeny anay amin’ny tanan’ny Filistina.

⁹Dia naka zanak’ondry iray mbola minono i Samoela ka nanolotra azy ho fanatitra dorana manontolo ho an’NY TOMPO; ary nitaraina tamin’NY TOMPO ho an’ny Israely i Samoela ka nihaino azy NY TOMPO.

¹⁰Raha mbola nanolotra ny fanatitra dorana manontolo i Samoela dia nanatona hiady amin’ny Israely ny Filistina; fa NY TOMPO nampikotrokorana mafy tamin’ny Filistina tamin’izany andro izany ka nampifanaritaka azy, dia resy teo anoloan’ny Israely izy.

¹¹Ary niala tany Mizpa ny lehilahin’ny Israely ka nanenjika ny Filistina ary namely azy mandra-pahatongany teo ambanin’i Bety-Kara.

¹²Ary naka vato i Samoela ka nanorina azy teo anelanelan’i Mizpa sy Sena; ny anarany dia nataony hoe Ebenezera[4]; fa hoy izy: Efa novonjen’NY TOMPO isika hatramin’izao.

¹³Dia resy ny Filistina ka tsy tafiditra tao anatin’ny tanin’ny Israely intsony; ary ny tanan’NY TOMPO dia namely ny Filistina nandritra ny andro rehetra niainan’i Samoela.

¹⁴Ny tanàna izay efa nalain’ny Filistina tamin’ny Israely dia azon’ny Israely indray, hatrany Ekrona ka hatrany Gata; ary ny tanin’izy ireo dia nalain’ny Israely tamin’ny tanan’ny Filistina koa. Ary nihavana ny Israely sy ny Amorita.

¹⁵Ary nitsara ny Israely i Samoela tamin’ny andro rehetra niainany.

¹⁶Nandeha isan-taona isan-taona nitety an’i Betela sy i Gilgala ary i Mizpa izy ka nitsara ny Israely teo amin’ireo tanàna rehetra ireo.

¹⁷Niverina ho any Rama indray izy avy eo, fa tao ny tranony; ary nitsara ny Israely sy nanorina alitara ho an’NY TOMPO tao izy.