Read La Bible en Malgache 1Samoela 8 Bible Online

1Samoela 8 - La Bible en Malgache bible

1Samoela 8

¹Rehefa antitra i Samoela dia ny zanany no nataony mpitsara ny Israely.

²Joela no anaran’ny lahimatoany, ary Abia kosa no anaran’ny faralahiny; mpitsara tany Bery-Sheba izy ireo.

³Tsy nanaraka ny dian’ny rainy anefa ny zanany fa nivily nitady vola aman-karena ka nandray kolikoly sy nanao fitsarana miangatra.

⁴Ary nivory tao Rama ny loholon’ny Israely rehetra mba ho any amin’i Samoela

⁵ka niteny taminy hoe: Indro, efa antitra ianao, ary ny zanakao dia tsy manaraka ny dianao; koa manendre mpanjaka mba hitsara anay, tahaka ny firenena hafa rehetra.

⁶Tsy sitrak’i Samoela anefa ny nitenenan’ny olona hoe: Omeo mpanjaka izahay hitsara anay. Dia nivavaka tamin’NY TOMPO i Samoela.

⁷Ary hoy NY TOMPO tamin’i Samoela: Henoy ihany ny tenin’ny olona amin’izay rehetra lazainy aminao; fa tsy ianao no laviny, fa Izaho no laviny tsy hanjaka aminy.

⁸Araka ny asa rehetra izay nataony hatramin’ny andro nitondrako azy nivoaka avy tany Ejipta ka mandraka androany, dia ny nahafoizany Ahy sy ny nanompoany andriamanitra hafa, dia toy izany koa no ataony aminao.

⁹Ary ankehitriny, henoy ihany ny feony, kanefa lazao marina aminy ka ambarao aminy ny ho fanaon’ny mpanjaka izay hanjaka aminy.

¹⁰Dia nambaran’i Samoela tamin’ny olona izay nangataka mpanjaka taminy ny teny rehetra nolazain’NY TOMPO.

¹¹Hoy izy: Izao no ho fahefan’ny mpanjaka izay hanjaka aminareo: Ny zanakareo lahy dia halainy ka hotendreny ho amin’ny kalesy fitondrany miady sy ho mpitaingin-tsoavaliny ary hihazakazaka eo alohan’ny kalesiny;

¹²hotendreny ho mpifehy arivo sy ho mpifehy dimampolo, ary hiasa ny taniny sy hijinja ny vokany ary hamboatra ny fiadiany sy ny fanaka momba ny kalesy fitondrany miady izy;

¹³ny zanakareo vavy dia halainy ho mpangaroharo zava-manitra ary ho mpahandro sy mpanao mofo;

¹⁴ny tsara indrindra amin’ny sahanareo sy ny tanim-boalobokareo sy ny tanin’olivanareo dia halainy ka homeny ny mpanompony;

¹⁵ny ampahafolon’ny voan-javatrareo sy ny tanim-boalobokareo dia halainy ka homeny ny tandapany sy ny mpanompony;

¹⁶ny mpanompolahinareo, ny mpanompovavinareo, ny zatovonareo tsara indrindra ary ny borikinareo dia halainy ka hampanaoviny ny asany.

¹⁷Halainy koa ny ampahafolon’ny ondry aman’osinareo; ary ny tenanareo dia ho tonga mpanompony.

¹⁸Dia hitaraina ianareo amin’izany andro izany noho ny mpanjakanareo izay nofidinareo ho anareo, nefa tsy hamaly anareo NY TOMPO amin’izany andro izany.

¹⁹Kanefa tsy nety nihaino ny tenin’i Samoela ny olona, fa hoy izy: Tsia, fa aoka ihany hisy mpanjaka hanjaka aminay,

²⁰mba ho tahaka ny firenena hafa rehetra koa izahay ka ny mpanjakanay no hitondra anay sy handeha eo alohanay ary hitarika ny adinay.

²¹Dia ren’i Samoela ny teny rehetra nolazain’ny olona ka nolazainy teo anatrehan’NY TOMPO.

²²Ary hoy NY TOMPO tamin’i Samoela: Henoy ny teniny ka manendre mpanjaka ho azy. Dia hoy i Samoela tamin’ny lehilahin’ny Israely: Samia ary mandeha ho any amin’ny tanànanareo avy ianareo rehetra.