Read La Bible en Sango courant – Mbeti ti Nzapa Tongo nda ti aye 14 Bible Online

Tongo nda ti aye 14 - La Bible en Sango courant – Mbeti ti Nzapa bible

Tongo nda ti aye 14

¹Na ngoi ni kâ, ambeni gbia ague ti tiri bira. Agbia ni ayeke Amrafel ti kodro ti Shinear, Ariok ti kodro ti Elasar, Kedor-Laomer ti kodro ti Elam, na Tidal ti kodro ti Goim.

²Ala tiri bira na agbia tongana Bera ti kodro ti Sodome, Birsha ti kodro ti Gomore, Shinab ti kodro ti Adma, Shemeber ti kodro ti Seboim, na lo ti kodro ti Bela, so ti tene kodro ti Soar.

³Ala kue abongbi na popo-hoto ti Sidim, so kota ngu ti Gba-ti-ingo ayeke daa laso so.

⁴Ala duti ando na gbe ti komandema ti Kedor-Laomer na ya ti ngu baleoko na use. Me na ngu baleoko na ota ni, ala tomboka na tere ti lo.

⁵Na ngu baleoko na osio ni, Kedor-Laomer na agbia so aga na lo ague, atiri bira na azo ti mara ti Refa. Lo hon ndö ti ala na bira na Ashetarot-Karnaim; lo hon ndö ti azo ti mara ti Zuzi na bira na kodro ti Ham; lo hon ndö ti azo ti mara ti Emi na bira na lando ti Kiriataim.

⁶Lo hon ndö ti azo ti mara ti Hori so ayeke na ndö ti hoto ti Seir, hoto ti ala, ngbii asi na El-Paran so ayeke nduru na benyama.

⁷Na pekoni, ala kiri na mbage ti En-Mishepat, so ti tene Kades. Ala buba kodro ti azo ti mara ti Amalek kue si ala hon nga ndö ti azo ti mara ti Amori so ayeke lango na kodro ti Hasason-Tamar.

⁸Tongaso agbia ti Sodome na ti Gomore, ti Adma, ti Seboim, na ti Bela, so ti tene Soar aleke tere ti ala ti tiri bira

⁹na gbia Kedor-Laomer ti Elam, na gbia Tidal ti Goim, na gbia Amrafel ti Shinear, na gbia Ariok ti Elasar, na ndo so ayeke na popo-hoto ti Sidim; so ti tene agbia osio si alondo ti tiri bira na agbia oku.

¹⁰Na popo-hoto ti Sidim ni, azo azi adu mingi ti gi gudron daa. Agbia ti Sodome na Gomore ati na ya ti adu ni na kpengo ti ala. Tanga ti azo ni akpe ague na ndö ti ahoto.

¹¹Azo amu akungba ti Sodome na Gomore kue, na akobe ti ala si ahon na ni.

¹²Ala mu Lot, molenge ti ita ti Abram so ayeke duti na Sodome, na aye ti lo kue si ahon na lo.

¹³Mbeni zo akpe na maboko ti azo ni si lo ga lo tene tënë ni na Abram, zo ti mara ti Hebro so ayeke duti na ndo so akeke ti shene ti Mamre ayeke daa. Mamre ayeke zo ti mara ti Amori. Lo yeke ita ti Eshekol na Aner. Ala na Abram ayeke *ambuki.

¹⁴So Abram ama tënë ti ita ti lo so azo agbu lo ahon na lo so, lo mu azo ti lo ngbangbo ota na baleoko na miombe so a du ala na da ti lo si ala manda akode ti bira. Lo tumba peko ti azo so amu Lot so ngbii lo si na Dan.

¹⁵Lo kangbi ya ti azo ti lo ni titene ala kue atuku na ndö ti awato ti lo na bi. Lo hon ndö ti ala si lo tumba peko ti ala ngbii asi na Hoba so ayeke na mbage ti Banga ti Damas.

¹⁶Lo mu akungba kue, lo mu Lot, molenge ti ita ti lo, na aye ti lo kue, na awali, na azo so a gbu ala na Lot so si lo kiri na ala.

¹⁷So Abram ahon ndö ti Kedor-Laomer na agbia so ayeke na tere ti lo si lo yeke kiri, gbia ti Sodome aga awara lo na popo-hoto ti Shave, so ti tene na popo-hoto ti gbia.

¹⁸Melkisedeke, gbia ti kodro ti Salem, aga na mapa na vin. Melkisedeke ayeke wayango-sandaga ti Nzapa, Nzapa so ayeke na yayu kâ na ndö ti aye kue.

¹⁹Lo sara tufa na ndö ti Abram, lo tene: “Ayeke nzoni Nzapa so ayeke na yayu kâ na ndö ti aye kue si lo sara yayu na sese, asara tufa na ndö ti Abram.

²⁰E gonda Nzapa so ayeke na yayu kâ na ndö ti aye kue, lo so lo sara titene awato ti mo ati na maboko ti mo so.” Abram amu na lo *dime ti aye so kue lo yeke na ni.

²¹Gbia ti Sodome atene na Abram: “Mu na mbi azo ni, mo bata ti mo akungba ni.”

²²Abram akiri tënë na lo, atene: “Baa, maboko ti mbi so mbi yeke yoro na mbage ti KOTA GBIA, Nzapa so ayeke na yayu kâ na ndö ti aye kue, lo so lo sara yayu na sese so.

²³Mbi deba yanga ti mbi: mbi yeke mu mbeni ye ti mo oko pepe, ataa kamba wala kamba ti poro. Tongaso si mo tene pepe, mo tene: ‘Mbi laa mbi sara si mo ga zo ti mosoro.’

²⁴Mbi ye mbeni ye oko pepe. Gi ye so amaseka ti mbi ate awe. Ti Aner, Eshekol na Mamre so amu peko ti mbi so, ala wani ayeke bata ti ala aye ni senge.”