Read La Bible en Sango courant – Mbeti ti Nzapa Tongo nda ti aye 24 Bible Online

Tongo nda ti aye 24 - La Bible en Sango courant – Mbeti ti Nzapa bible

Tongo nda ti aye 24

¹Abraham aga mbakoro si ngu ti lo ahon mingi awe. KOTA GBIA asara tufa na ndö ti lo na ya ti aye kue.

²Abraham atene na zo ti kua ti lo so aninga ahon atanga ni kue si lo yeke baa lege ti aye ti Abraham kue so, atene: “Zia maboko ti mo na gbe ti ngbonda ti mbi

³Mbi ye titene mo deba yanga ti mo na iri ti KOTA GBIA, Nzapa ti yayu na ti sese. Tene na mbi, mo tene, mo yeke mu ande mbeni wali na popo ti amolenge-wali ti azo ti Kanaan so mbi yeke duti na popo ti ala so, ti mu na molenge ti mbi pepe.

⁴Me mo gue na kodro ti mbi, na popo ti asewa ti mbi, mo mu mbeni wali na molenge ti mbi Isaac.”

⁵Zo ti kua ni akiri tënë na lo, atene: “E hinga pepe, wali ni ayeke ke ande ti ga na mbi na sese so e yeke daa ge so. Tongana lo ke, alingbi mbi mu molenge ti mo, mbi kiri na lo na sese so mo londo daa si mo ga so?”

⁶Abraham akiri tënë na lo, atene: “Oko pepe! Kiri na molenge ti mbi kâ pepe.

⁷KOTA GBIA, Nzapa ti yayu, asara si mbi zia da ti babâ ti mbi, na kodro so a du mbi daa. Lo sara tënë na mbi si lo deba yanga ti lo na mbi, lo tene: ‘Mbi yeke mu kodro so na *ahale ti mo’. Lo wani laa lo yeke tokua ande *ange ti lo kozo ti mo. Kâ si mo yeke mu mbeni wali na molenge ti mbi.

⁸Tongana wali ni ake ti mu peko ti mo, fade mo yeke sigigi na gbe ti dengo ba ti mo so. Me gi ye oko, mo kiri na molenge ti mbi kâ pepe.”

⁹Zo ti kua ni azia maboko ti lo na gbe ti ngbonda ti wa ti lo Abraham si lo deba yanga ti lo ti sara ye so.

¹⁰Lo mu *azambala baleoko ti wa ti lo, na anzoni ye so kue wa ti lo ayeke na ni si lo gue. Lo mu lege ti gue na gbata ti Nahor, na sese ti Mezopotamii ti nduzu.

¹¹So lo si na tere ti du ti ngu so ayeke na gigi ti gbata ni, lo sara si azambala ni awu tere ti ala na tere ti du ti ngu ni. Andaa na lakui laa, na ndembe so awali ayeke gue ti to ngu.

¹²Lo sambela Nzapa, lo tene: “KOTA GBIA, Nzapa ti wa ti mbi Abraham, sara si laso mbi wara ye so mbi ga ti gi ni so. Sara nzoni na wa ti mbi Abraham!

¹³Baa mbi laa mbi yeke luti na tere ti du ti ngu so; amolenge-wali ti azo ti gbata so ayeke ga ti to ngu.

¹⁴Maseka-wali so mbi yeke hunda na lo, mbi tene: ‘Mbi gbu gere ti mo, dingi yanga ti ta ti ngu ti mo, mbi nyon mbeni ngu ni’; tongana lo kiri tënë, lo tene: ‘Nyon ngu ni; mbi yeke mu mbeni na azambala ti mo titene ala nyon’, mbi yeke hinga, mbi tene, lo laa mo ye titene lo ga wali ti zo ti kua ti mo Isaac. Tongaso si mbi hinga, mbi tene, mo sara nzoni be na wa ti mbi.”

¹⁵So lo ngba ti tene tënë, Rébecca ayeke ga. Lo yo ta ti ngu na ndö ti go ti lo. Rébecca ayeke molenge ti Betuel; Betuel ayeke molenge ti Milka, wali ti Nahor; Nahor ayeke ita ti Abraham.

¹⁶Lo yeke pendere maseka-wali mingi. Lo de ti hinga koli pepe. Lo zu na du ti ngu, lo to ngu na ya ti ta ti lo asi si lo londo kâ, lo sigigi.

¹⁷Zo ti kua ti Abraham akpe, ague, awara lo si atene na lo: “Mbi gbu gere ti mo, mu na mbi mbeni ngu so ayeke na ya ti ta ti mo so kete, mbi nyon!”

¹⁸Lo kiri tënë, lo tene: “Kota zo, nyon ni!” Lo zi ta ti ngu ni na ndö ti go ti lo, lo gbu na maboko ti lo si zo ti kua ni anyon ngu ni.

¹⁹So lo mu ngu ni na lo awe, lo tene: “Mbi yeke to nga ngu na azambala ti mo, ala nyon, alingbi na ala.”

²⁰Lo tuku ngu so ayeke na ya ti ta ni hio na ya ti ye so anyama ayeke nyon ngu daa si lo kiri lo kpe ti to ngu na du ti ngu ni. Lo to ngu na azambala ni kue.

²¹Koli ni ayeke baa Rébecca kpoo. Lo yeke gi ti hinga: KOTA GBIA ayeke sara si tambula ti lo ague nzoni, wala ague nzoni pepe.

²²So azambala ni anyon ngu ni awe, koli ni amu mbeni *kati ti lôro so nengo ni aga nduru na grame omene, na aye ti maboko use so a sara na lôro, nengo ti oko aga nduru na grame ngbangbo oko, lo mu na maseka-wali ni.

²³Na pekoni, lo hunda lo, lo tene: “Mbi gbu gere ti mo, tene na mbi: mo yeke molenge ti zo wa? Na da ti babâ ti mo, mbeni ndo ayeke daa titene mbi na azo so amu peko ti mbi so e lango daa na bi so?”

²⁴Maseka-wali ni akiri tënë na lo, atene: “Mbi yeke molenge ti Betuel so Milka adu na Nahor.”

²⁵Na pekoni, lo kiri lo tene: “Na ndo ti e, apere na akobe ti tengo ni ti anyama ayeke mingi. Ndo ti lango ndali ti ala ayeke nga daa.”

²⁶Koli ni akuku akpo li ti lo na sese si lo voro KOTA GBIA,

²⁷lo tene: “Mbi mu singila na KOTA GBIA, Nzapa ti wa ti mbi Abraham, ndali ti so lo zia wa ti mbi pepe, lo ngba lakue ti sara nzoni, ti bata tënë ti lo na wa ti mbi. KOTA GBIA afa lege na mbi ngbii, mbi si na da ti a-ita ti wa ti mbi.”

²⁸Maseka-wali ni akpe, ague, atene tënë ti ye so asi so na azo ti da ti mama ti lo.

²⁹Andaa mbeni ita ti Rébecca ti koli ayeke daa; iri ti lo Laban. Laban asigigi hio, lo gue ti tengbi na koli ni na yanga ti du ti ngu ni.

³⁰Lo baa kati, na aye ti maboko so ayeke na maboko ti ita ti lo ti wali so. Lo ma nga peko ti atënë so koli ni atene na Rébecca. Nilaa lo gue, lo wara koli ni, lo na azambala ti lo na tere ti du ti ngu ni.

³¹Lo tene na koli ni: “Ga, mo so KOTA GBIA asara tufa na ndö ti mo awe so! Mo yeke duti na gigi ngbanga ti nyen? Mbi leke ya ti da awe; mbi leke nga ndo ndali ti azambala awe.”

³²Koli ni ali na ya ti da ti Laban. A zi akungba na ndö ti azambala si a mu pere na kobe ti tengo ni na azambala ni. A mu nga ngu na koli ni nga na azo so amu peko ti lo titene ala sukula na gere ti ala.

³³Na pekoni, a zia kobe na gbe ti lo titene lo te, me lo tene: “Mbi yeke te kobe pepe, ngbii mbi tene tënë so mbi ga ndali ni si.” Laban atene na lo: “Tene tënë ni ma!”

³⁴Koli ni atene: “Mbi yeke zo ti kua ti Abraham.

³⁵KOTA GBIA asara tufa gbani gbani na ndö ti wa ti mbi si lo ga kota zo mingi. KOTA GBIA amu na lo ataba, angasa, abagara, nginza, lôro, azo ti kua ti koli na ti wali, azambala na alele.

³⁶Sara, wali ti wa ti mbi, na ya ti mbakoro ti lo, adu na wa ti mbi mbeni molenge-koli. Wa ti mbi amu aye ti lo kue na molenge ni.

³⁷Wa ti mbi ahunda na mbi ti deba yanga ti mbi, lo tene: ‘Mo yeke mu ande mbeni maseka-wali ti azo ti Kanaan so mbi yeke lango na kodro ti ala so, ti mu lo na molenge ti mbi pepe.

³⁸Me mo deba yanga ti gue na popo ti azo ti sewa ti mbi, na ya ti mara ti mbi si mo mu wali na molenge ti mbi.’

³⁹Tongaso mbi tene na wa ti mbi, mbi tene: ‘E hinga pepe, fade wali ni ayeke ke ti mu peko ti mbi.’

⁴⁰Lo kiri tënë na mbi, lo tene: ‘KOTA GBIA so mbi tambula na gbe ti le ti lo so, ayeke tokua ange ti lo titene mo na lo atambula. Lo yeke sara titene tambula ti mo ague nzoni. Mo yeke mu wali na popo ti azo ti sewa ti mbi, na ya ti mara ti mbi, ti mu lo na molenge ti mbi.

⁴¹Tongana mo si na popo ti azo ti mara ti mbi, andaa mo sigigi na gbe ti dengo ba so mbi hunda na mo so awe. Tongana azo ni ake ti mu na mo wali ni, tënë ti dengo ba ni ayeke na li ti mo pepe.’

⁴²Laso mbi si na yanga ti du ti ngu so, mbi sambela, mbi tene: ‘KOTA GBIA, Nzapa ti wa ti mbi Abraham, sara si tambula ti mbi ague nzoni.

⁴³Baa, mbi laa na tere ti du ti ngu so. Maseka-wali so ayeke ga ti to ngu si mbi yeke hunda na lo titene lo mu mbeni ngu ti ya ti ta ti lo, mbi nyon,

⁴⁴tongana lo tene na mbi: Nyon ni ma! Mbi yeke to nga mbeni na azambala ti mo, andaa wali so KOTA GBIA adiko lo ndali ti molenge-koli ti wa ti mbi laa.’

⁴⁵So mbi ngba ti tene tënë na be ti mbi kâ, Rébecca aga; ta ti ngu ayeke na ndö ti go ti lo. Lo zu na du ti ngu ni si lo to ngu ni. Mbi tene na lo, mbi tene: ‘Mbi gbu gere ti mo, mu na mbi ngu, mbi nyon!’

⁴⁶Lo zi ta ti ngu so lo yo na ndö ti go ti lo so hio si lo tene na mbi: ‘Nyon ngu ni; mbi yeke mu nga mbeni na azambala ti mo.’ Mbi nyon ngu ni si lo mu nga mbeni na azambala.

⁴⁷Mbi hunda lo, mbi tene: ‘Mo yeke molenge ti zo wa?’ Lo kiri tënë, lo tene: ‘Mbi yeke molenge ti Betuel so Milka adu na Nahor.’ Tongaso mbi zia kati na hon ti lo si mbi zia nga aye ti maboko na maboko ti lo.

⁴⁸Na pekoni, mbi kuku, mbi kpo li ti mbi na sese ti voro KOTA GBIA. Mbi mu singila na KOTA GBIA, Nzapa ti wa ti mbi Abraham so afa na mbi nzoni lege ngbii si mbi mu molenge-wali ti ita ti wa ti mbi ti mu lo na molenge ti wa ti mbi so.

⁴⁹Fadeso, tongana ala ye ti sara nzoni, wala ti bata tënë ti songo ndali ti wa ti mbi, ayeke nzoni ala tene na mbi. Tongana ala ke, fade mbi yeke hon na mbeni ndo nde.”

⁵⁰Laban na Betuel akiri tënë, atene: “KOTA GBIA laa aleke ye ni tongaso. E yeke na mbeni tënë ti tene daa pepe, ataa tënë ti nzoni, wala tënë ti sioni.

⁵¹Rébecca laa ayeke na le ti mo so. Mu lo, mo gue na lo. Ayeke nzoni lo ga wali ti molenge ti wa ti mo tongana ti so KOTA GBIA atene tënë ni so.”

⁵²So zo ti kua ti Abraham ama tënë so, lo kuku, lo kpo li ti lo na sese na gbe ti KOTA GBIA.

⁵³Zo ti kua ni asigigi na apendere ye so a sara ni na lôro, na wen ti nginza, lo sigigi nga na abongo si lo mu na Rébecca. Lo mu nga aye ti ngangu ngere na ita ti Rébecca nga na mama ti lo.

⁵⁴Na pekoni, lo na azo so amu peko ti lo ate kobe, ala nyon ye si ala lango. So ndo ahan awe, ala londo si zo ti kua ni atene: “Ala zia mbi kiri na wa ti mbi.”

⁵⁵Ita ti Rébecca na mama ti lo atene: “Ayeke nzoni Rébecca angba na tere ti e kete, na ya ti lango tongana baleoko si. Na pekoni, fade lo yeke gue.”

⁵⁶Zo ti kua ni atene: “Ala sara si mbi ninga ge pepe, ngbanga ti so KOTA GBIA asara si ye so mbi ga ndali ni so aga nzoni awe. Ala zia na mbi lege, mbi kiri na ndo ti wa ti mbi.”

⁵⁷Azo ni atene: “E iri maseka-wali ni, e hunda lo, lo fa na e tënë ti be ti lo si.”

⁵⁸Ala iri Rébecca si ala hunda lo, atene: “Mo na koli so aye ti gue?” Lo kiri tënë, lo tene: “Een, mbi yeda.”

⁵⁹Ala zia Rébecca, lo na wali so abata lo so si ala na zo ti kua ti Abraham na azo so amu peko ti lo alondo ti gue.

⁶⁰Asewa ti Rébecca asara tufa na ndö ti lo, atene: “Ita ti e, ayeke nzoni mo ga mama ti azo kutu kutu! Ayeke nzoni *ahale ti mo amu agbata ti azo so ake ala.”

⁶¹Rébecca na amaseka-wali so ayeke sara kua na lo alondo, ala ko na ndö ti azambala si ala mu peko ti zo ti kua ti Abraham. Lo mu ala si lo na ala ague.

⁶²Andaa Isaac alondo na du ti ngu ti Lahai-Roi awe. Lo lango lani na sese ti mbage ti Mbongo.

⁶³Na mbeni lakui, Isaac asigigi ti fono na ya ti ngonda ti gbu li ti lo na ndö ti ambeni ye. So lo yo le ti lo na nduzu, lo baa azambala ayeke ga.

⁶⁴Rébecca ayo le ti lo na nduzu si lo baa Isaac. Lo huru na ndö ti zambala ni, lo zu na sese.

⁶⁵Lo hunda zo ti kua ni, lo tene: “Koli wa laa ayeke fono na ya ti ngonda si lo yeke ga ti tengbi e so?” Zo ti kua ni akiri tënë, atene: “Wa ti mbi laa.” Rébecca amu bongo si lo kanga na le ti lo.

⁶⁶Zo ti kua ni afa na Isaac peko ti aye so kue lo sara.

⁶⁷Isaac ague na Rébecca na ya ti da ti bongo ti mama ti lo Sara. Lo mu Rébecca ti ga wali ti lo. Isaac aye lo si be ti lo ade na peko ti kuâ ti mama ti lo.