Read La Bible en Sango courant – Mbeti ti Nzapa Tongo nda ti aye 45 Bible Online

Tongo nda ti aye 45 - La Bible en Sango courant – Mbeti ti Nzapa bible

Tongo nda ti aye 45

¹Joseph akanga be ti lo gbaa na le ti azo so kue ayeke na tere ti lo so. Lo mu yanga, lo tene: “Azo kue asigigi!” Azo ni kue asigigi; zo oko angba na tere ti lo pepe si lo fa tere ti lo na a-ita ti lo.

²Lo toto ngangu si azo ti Ezipte ama toto ti lo ni. Ataa azo ti da ti gbia Faraon ama toto ni.

³Joseph atene na a-ita ti lo: “Mbi Joseph laa. Babâ ti mbi angba na fini?” A-ita ti lo ni ayeke na ngangu ti kiri tënë na lo pepe, ngbanga ti so mbeto ahon ndö ti ala.

⁴Joseph atene na ala: “Ala ga nduru na tere ti mbi.” A-ita ti lo ni aga nduru na tere ti lo si lo tene na ala: “Mbi Joseph, ita ti ala, mbi so ala ka mbi ando si azo ague na mbi na Ezipte so laa.

⁵Me fadeso, ayeke nzoni be ti ala aso pepe; ala sara nga ngonzo na tere ti ala wani ndali ti kango so ala ka mbi so pepe, ngbanga ti so Nzapa atokua mbi kozo ti ala titene ndali ti mbi, ala ngba na fini.

⁶Kota nzara so ati na ya ti kodro so asara ngu use awe. Angba ngu oku so na ya ni, fade azo alingbi ti fâ yaka wala ti ko ale ti kobe pepe.

⁷Nzapa atokua mbi kozo ti ala ti sara si mara ti ala angba na fini na ndö ti sese. So ayeke mbeni kota ye so lo sara titene lo soo ala na kuâ.

⁸Tongaso, ala laa atokua mbi ge pepe, me Nzapa laa atokua mbi. Lo sara titene mbi ga tongana babâ ti Faraon, mbi ga makonzi na ndö ti azo na aye ti da ti lo si mbi ga komanda na ndö ti sese ti Ezipte kue.

⁹Ala gue hio na mbage ti babâ ti mbi, ala tene na lo, atene: ‘Molenge ti mo Joseph atene: Nzapa asara titene mbi ga kota zo na ndö ti kodro ti Ezipte kue. Ayeke nzoni mo ga na ndo ti mbi, mo ku pepe.

¹⁰Fade mo sara kodro na sese ti Goshen, nduru na mbi, mo na amolenge ti mo, amolenge ti amolenge ti mo, angasa na ataba ti mo, abagara ti mo, na aye so kue mo yeke na ni.

¹¹Kâ, mbi yeke sara ande titene mo wara kobe ti tengo ni, ngbanga ti so fade kota nzara ayeke kiri ti sara na ya ti ngu oku. Tongaso si mawa ati na ndö ti mo, azo ti sewa ti mo, na aye ti mo kue pepe.’

¹²“Ala wani abaa na le ti ala, Benjamin nga, ita ti mbi abaa na le ti lo so mbi wani laa mbi yeke tene tënë so na ala.

¹³Fade ala tene tënë ti nengo so azo ayeke ne mbi ge na Ezipte so na babâ ti mbi. Ala fa na lo tënë ti aye so kue ala baa ge so. Ala sara hio, aga na babâ ti mbi ge.”

¹⁴Joseph ati na ndö ti go ti ita ti lo Benjamin, lo gbu lo na kate ti lo si lo toto; Benjamin nga ayeke toto na ndö ti go ti Joseph.

¹⁵Lo su ngbangba ti a-ita ti lo kue si lo toto na tere ti ala. Na pekoni, a-ita ti lo atene tënë na lo.

¹⁶Tënë ni ague ngbii asi na ya ti da ti Faraon, atene: “A-ita ti Joseph aga!” Be ti Faraon na azo ti kua ti lo anzere mingi na mango tënë so.

¹⁷Tongaso, Faraon atene na Joseph: “Mo tene na a-ita ti mo, mo tene: ‘Ala sara ye so mbi yeke tene na ala: ala leke akungba ti ala na ndö ti anyama ti ala; ala gue na sese ti Kanaan.

¹⁸Ala mu babâ ti ala na azo ti sewa ti ala, aga na ala na mbi. Fade mbi yeke mu na ala anzoni ye ti kodro ti Ezipte si ala yeke te anzoni kobe ti kodro ni.’

¹⁹Ti mo, mo mu yanga na ala, mo tene: ‘Ala sara ye so: ala mu apusu ti ambarata ti Ezipte, ague na ni ndali ti amolenge ti ala na awali ti ala; ala mu babâ ti ala si ala ga.

²⁰Aye ti ala so ala yeke zia kâ, be ti ala agi ala ndali ni pepe, ngbanga ti so anzoni ye ti Ezipte kue ayeke ga ande ti ala.’ ”

²¹Amolenge ti Jacob asara ye so Faraon ahunda na ala. Joseph amu na ala apusu ti ambarata tongana ti so Faraon atene so; lo mu nga na ala kobe ti tengo ni na lege.

²²Lo mu na ala oko oko kue abongo ti matanga. Me lo mu na Benjamin ale ti nginza ngbangbo ota na abongo oku ti matanga.

²³Ti babâ ti lo, lo tokua na lo alele baleoko so a kanga akungba ti anzoni ye ti Ezipte na ndö ti ala, na amama ti lele baleoko so a kanga asake ti ale ti *ble, amapa na ambeni kobe titene lo te na lege.

²⁴Lo zia lege na a-ita ti lo titene ala gue. Lo tene na ala, lo tene “Ala papa na lege pepe.”

²⁵A-ita ti Joseph alondo na kodro ti Ezipte si ala kiri asi na tere ti babâ ti ala Jacob na sese ti Kanaan.

²⁶Ala tene na lo: “Joseph angba na fini. Lo laa lo yeke komanda na ndö ti kodro ti Ezipte kue.” Tënë ti ala ni asara ye oko na be ti Jacob pepe, ngbanga ti so lo zia be ti lo na ndö ti tënë ti ala ni pepe.

²⁷Ala fa na lo peko ti atënë so kue Joseph atene na ala. So babâ ti ala Jacob abaa apusu ti ambarata so Joseph atokua ni ti mu lo ti gue na lo so, lo kiri lo wara ngangu, be ti lo anzere.

²⁸Lo tene: “Mbi yeda awe! Molenge ti mbi Joseph angba na fini; mbi ye ti gue ti baa lo kozo si mbi kui.”