Read La Bible en Sango courant – Mbeti ti Nzapa Tongo nda ti aye 46 Bible Online

Tongo nda ti aye 46 - La Bible en Sango courant – Mbeti ti Nzapa bible

Tongo nda ti aye 46

¹Jacob alondo, lo mu aye ti lo kue si lo mu lege ti gue. So lo si na Bersheba, lo mu *asandaga na Nzapa, Nzapa ti babâ ti lo Isaac.

²Nzapa airi lo na bi na ya ti mbeni ye tongana bango-li, atene: “Jacob! Jacob!” Lo yeda, lo tene: “Mbi laa.”

³Nzapa atene: “Mbi yeke Nzapa, Nzapa ti babâ ti mo. Sara mbeto ti gue na Ezipte pepe. Kâ, mbi yeke sara titene mbeni kota mara abaa gigi na lege ti mo.

⁴Fade mbi na mo, e yeke gue na Ezipte. Mbi laa mbi yeke mu nga mo kâ ti sigigi na mo. Tongana mo kui ande, Joseph laa ayeke leke le ti mo.”

⁵Jacob alondo na Bersheba ti hon. Amolenge ti lo amu lo, ala mu amolenge ti ala na awali ti ala, azia ala na ndö ti apusu ti ambarata so Faraon atokua ti yo na ala so.

⁶Ala mu anyama ti ala na akungba ti ala so ala wara na sese ti Kanaan si ala gue na ni. Jacob na *ahale ti lo kue laa ague na Ezipte;

⁷lo mu amolenge ti lo ti koli na ti wali na atara ti lo ti koli na ti wali si lo na ala ague. Lo na ahale ti lo kue ague na Ezipte.

⁸Iri ti amolenge ti Israel so ague na Ezipte ayeke so: Jacob na amolenge ti lo: Ruben, kozo molenge ti Jacob.

⁹Amolenge ti Ruben ti koli ayeke so: Hanok, Palu, Hesron na Karmi.

¹⁰Amolenge ti Siméon ti koli ayeke so: Yemuel, Yamin, Ohad, Yakin, Sohar na Shaul so lo du lo na wali ti kodro ti Kanaan.

¹¹Amolenge ti Lévi ti koli ayeke so: Gershon, Kehat na Merari.

¹²Amolenge ti Juda ti koli ayeke so: Er, Onan, Shela, Peres na Zera. Er na Onan akui ti ala gi na kodro ti Kanaan. Amolenge ti Peres ti koli ayeke so: Hesron na Hamul.

¹³Amolenge ti Isakar ti koli ayeke so: Tola, Puva, Yob na Shimron.

¹⁴Amolenge ti Zabulon ti koli ayeke so: Sered, Elon na Yaleel.

¹⁵So amolenge-koli so Lea na Jacob adu ala, ala na Dina, molenge ti ala ti wali laa. Ala du ala na ndembe so ala yeke na Mezopotamii. Amolenge ti lo ti koli na ala ti wali, ala kue ayeke baleota na ota.

¹⁶Amolenge ti Gad ti koli ayeke so: Sifion, Hagi, Shuni, Esbon, Eri, Arodi na Areli.

¹⁷Amolenge ti Aser ti koli ayeke so: Imna, Isheva, Ishevi, Beria na ita ti ala ti wali Sera. Amolenge ti Beria ti koli ayeke so: Heber na Malkiel.

¹⁸So amolenge ti Zilpa, lo so Laban amu lo na molenge ti lo ti wali Lea si Jacob adu na lo laa. Ala kue ayeke baleoko na omene.

¹⁹Amolenge-koli ti Rachel, wali ti Jacob ayeke so: Joseph na Benjamin.

²⁰Na kodro ti Ezipte, Joseph adu Manase na Efraim. Lo du ala na Asenat, molenge ti Potifera ti wali. Potifera ayeke wayango-sandaga ti gbata ti One.

²¹Amolenge ti Benjamin ti koli ayeke so: Bela, Beker, Ashebel, Gera, Naaman, Ehi, Rosh, Mupim, Hupim na Arde.

²²So amolenge ti Rachel so lo na Jacob adu so laa. Wungo ti ala kue ayeke baleoko na osio.

²³Molenge ti Dan ti koli ayeke Hushim.

²⁴Amolenge ti Neftali ti koli ayeke so: Yasiel, Guni, Yeser na Shilem.

²⁵So amolenge ti Bila, lo so Laban amu lo na molenge ti lo ti wali Rachel si Jacob adu na lo so laa. Wungo ti ala kue ayeke mbarambara.

²⁶Azo so kue ayeke na tere ti Jacob na guengo ni na Ezipte, ala so ayeke amolenge ti ya ti lo, wungo ti ala ayeke baleomene na omene. A diko awali ti amolenge ti lo na ya ni pepe.

²⁷Amolenge ti Joseph so lo du ala na Ezipte ayeke use. Wungo ti azo ti sewa ti Jacob so ague na Ezipte ayeke balembarambara.

²⁸Jacob atokua Juda kozoni na mbage ti Joseph titene lo leke gango ti lo na sese ti Goshen. So Jacob na azo ti sewa ti lo asi na Goshen,

²⁹Joseph aleke pusu ti mbarata ti lo si lo gue na Goshen ti tengbi babâ ti lo Jacob. Gi so Joseph abaa babâ ti lo, lo ti na ndö ti go ti lo, lo gbu lo na kate ti lo si lo toto aninga.

³⁰Jacob atene na Joseph: “Mbi lingbi ti kui fadeso, ngbanga ti so mbi baa le ti mo awe; mbi hinga so mo ngba na fini.”

³¹Na pekoni, Joseph atene na a-ita ti lo nga na azo ti sewa ti babâ ti lo, atene: “Mbi yeke gue ti tene tënë ti singo ti ala na Faraon. Mbi yeke tene na lo, mbi tene: ‘A-ita ti mbi na azo ti sewa ti babâ ti mbi so ayeke na sese ti Kanaan aga na peko ti mbi awe.

³²Akoli ni ayeke awabatango-nyama. Ala ga na angasa ti ala, ataba ti ala, abagara ti ala, na aye so kue ala yeke na ni.’

³³Tongana Faraon airi ala si lo hunda ala, lo tene: ‘Kua ti ala ayeke nyen?’

³⁴fade ala kiri tënë, atene: ‘Kua ti e ayeke ti batango anyama. E azo ti gbe ti mo, e to nda ti kua so na molenge ngbii asi laso, tongana akotara ti e.’ Tongaso si ala lingbi ti duti na sese ti Goshen, ngbanga ti so azo ti Ezipte ake tënë ti awabatango-nyama na be ti ala oko.”