Read La Bible en Sango courant – Mbeti ti Nzapa Tongo nda ti aye 6 Bible Online

Tongo nda ti aye 6 - La Bible en Sango courant – Mbeti ti Nzapa bible

Tongo nda ti aye 6

¹So azo ato nda ti wungo ni mingi na ndö ti sese si ala to nda ti dungo amolenge-wali,

²amolenge-koli ti Nzapa abaa so amolenge-wali ti azo ni ayeke pendere mingi. Ala soro ambeni molenge-wali ni si ala mu ala ti ga awali ti ala.

³Tongaso KOTA GBIA atene na be ti lo: “Pupu ti mbi ayeke ngba lakue na ya ti zo pepe, ngbanga ti so lo yeke gi zo senge. Fade lo yeke duti na gigi gi ngu ngbangbo oko na baleuse.”

⁴Ayongoro yongoro zo ayeke na ngoi ni na ndö ti sese. Na ndembe so amolenge-koli ti Nzapa ague, amu amolenge-wali ti azo si adu na ala so, andaa ayongoro zo ni angba; ala laa asara akota ye ando si iri ti ala awu mingi.

⁵KOTA GBIA abaa so sioni ti zo ahon ndoni na ndö ti sese. Ti londo na ndaperere ngbii asi na lakui, be ti lo aye gi ti sara sioni.

⁶Nilaa be ti KOTA GBIA aso ndali ti so lo sara zo si lo zia lo na ndö ti sese so. Vundu agbu be ti lo mingi.

⁷Lo tene: “Mbi yeke sara ande titene azo so mbi sara ala so ahunzi kue na ndö ti sese, ala na anyama ti kodro, na anyama so ayeke hara harango, na andeke ti nduzu. Tongana mbi sara fade ala pepe, ka ayeke nzoni mingi.”

⁸Me ti Noe, be ti Nzapa anzere mingi na lo.

⁹Tënë ti sewa ti Noe ayeke tongaso: Na popo ti azo ti ngoi ti Noe, lo yeke mbeni zo ti mbirimbiri, tënë ayeke na li ti lo pepe, lo tambula na Nzapa.

¹⁰Lo du amolenge-koli ota: Sem, Kam na Yafet.

¹¹Na le ti Nzapa, gigi ni abuba awe; azo ti sarango ngangu na amba ti ala asi singo.

¹²Nzapa abaa ndo na ndö ti sese; lo baa so sese ni abuba awe, ngbanga ti so azo kue abuba lege ti dutingo ti ala na ndö ti sese ni awe.

¹³Nzapa atene na Noe: “Ti mbi, ngoi titene mbi hunzi azo ti sese kue alingbi awe. Ndali ti ala, sarango ngangu na azo asi singo na ndö ti sese. Mbi yeke hunzi azo ni kue si mbi yeke buba nga sese ni kue.

¹⁴Ayeke nzoni mo mu akpengbango keke, mo leke na mbeni kota mangboko ndali ti mo. Mo kangbi ya ti mangboko ni nde nde. Mo kanga adu ti tere ni na gigi na adu ti ya ni na gudron.

¹⁵Mo sara mangboko ni, yongoro ni metere ngbangbo oko na baleoku, nduru ni metere baleuse na oku si yongo ni na nduzu metere baleoko na oku.

¹⁶Mo leke li ni daa. Ayeke nzoni mo zia mbeni ndo na popo ti li ni na atere ni alingbi na santimetere baleoku. Fade mo leke yanga ti mangboko ni na mbeni mbage ti tere ni. Mo leke mbeni da ti ya ti mangboko ni na gbeni; mo leke mbeni use da ni na ndö ni si mo leke mbeni ota da ni na ndö ti use ni.

¹⁷Ti mbi, mbi yeke sara titene ngu asuku, amu ndö ti sese ti buba aye so kue ayeke na fini. Fade aye so kue ayeke na ndö ti sese ayeke kui.

¹⁸Me mbi yeke leke ande *mbuki ti mbi na mo. Mo li na ya ti mangboko ni, mo na amolenge ti mo, wali ti mo, na awali ti amolenge ti mo.

¹⁹Na popo ti anyama so kue ayeke na fini, fade mo mu koli ni oko na wali ni oko, mo li na ala na ya ti mangboko ni, titene mo na ala angba na fini.

²⁰Na popo ti amara ti ndeke oko oko, amara ti nyama ti kodro oko oko, na amara ti nyama oko oko so ayeke hara harango na sese, fade koli ni oko na wali ni oko ayeke ga na tere ti mo ti ngba na fini.

²¹Ti mo, ayeke nzoni mo mu amara ti kobe so kue a yeke te tengo, mo bata ni na tere ti mo titene aga ande kobe ti mo na kobe ti anyama ni kue.”

²²Noe asara ye ni tongaso. Lo sara ye ni alingbi gi na yanga so Nzapa amu na lo.