Read La Bible en Sango courant – Mbeti ti Nzapa 2 Samuel 1 Bible Online

2 Samuel 1 - La Bible en Sango courant – Mbeti ti Nzapa bible

2 Samuel 1

¹Na peko ti kuâ ti Saul, David akiri na gbata ti Siklag na peko ti so lo gue, lo so benda na ndö ti azo ti Amalek. Lo sara lango use na Siklag.

²Na ota lango ni, mbeni koli alondo na ya ti bâbâ ti Saul asi. Bongo ti lo asuru surungo, ya ti li ti lo kue gi na sese ti fa vundu ti be ti lo. So lo si nduru na David awe, lo kuku, lo kpo li ti lo na sese.

³David ahunda lo: “Mo londo na ndo wa?” Lo kiri tënë, lo tene: “Mbi kpe na ya ti bâbâ ti azo ti Israel laa mbi ga so.”

⁴David ahunda lo, atene: “Ye ni kâ tongana nyen? Tene na mbi peko ni si.” Koli ni akiri tënë: “Bira aza wâ si azo ti Israel akpe kirikiri. Azo akui mingi; Saul na molenge ti lo Jonatan kue akui.”

⁵David ahunda maseka ni, atene: “Mo hinga tongana nyen laa Saul na molenge ti lo Jonatan akui?”

⁶Maseka-koli ni atene: “Mbi yeke luti na li ti hoto ti Gilboa; mbi ye ti baa, mbi baa Saul aba na ndö ti likongo ti lo. Apusu ti mbarata na azo ti kpengo na ambarata aga nduru nduru na lo.

⁷Lo baa ndo na mbage ti mbi, lo iri mbi si mbi yeda, mbi tene: ‘Mbi laa.’

⁸Lo hunda mbi, lo tene: ‘Mo yeke zo wa?’ Mbi kiri tënë na lo, mbi tene: ‘Mbi yeke zo ti mara ti Amalek.’

⁹Lo tene na mbi: ‘Pusu nduru na tere ti mbi, mo fâ mbi, ngbanga ti so mbi baa tere ti mbi nzoni pepe, ataa so fini ti mbi angba ngbango.’

¹⁰Nilaa mbi ga nduru na tere ti lo si mbi fâ lo, ngbanga ti so mbi hinga, mbi tene, lo yeke ngba na fini pepe. Mbi zi kpoto ti gbia so ayeke na li ti lo; mbi zi nga ye ti maboko so lo kanga na maboko ti lo, mbi ga na ni na mo, gbia ti mbi.”

¹¹David agbu bongo ti lo wani si lo suru ni; azo so kue ayeke na tere ti lo asara nga tongana ti lo.

¹²Ala sara mua, ala toto, ala ke kobe ngbii asi na lakui ndali ti kuâ ti Saul, ti Jonatan na ti azo ti Israel so kue ayeke azo ti *KOTA GBIA so akui na ya ti bira so.

¹³David akiri ahunda maseka so ayeke fa peko ti tënë na lo so, atene: “Mo yeke zo ti ndo wa?” Maseka ni akiri tënë: “Mbi yeke molenge ti mbeni zo ti mara ti Amalek, lo yeke gene ge na kodro so.”

¹⁴David atene na lo: “Tongana nyen laa mbeto ti fango gbia so KOTA GBIA atuku mafuta na li ti lo asara mo pepe so?”

¹⁵David airi mbeni turugu ti lo oko si atene na lo: “Ga mo fâ lo!” Turugu ni afâ lo.

¹⁶David atene na zo ti mara ti Amalek ni, atene: “Mene ti mo ayeke kiri na li ti mo wani! Tënë ti yanga ti mo wani laa afâ mo, ngbanga ti so mo tene: ‘Mbi laa mbi fâ gbia so KOTA GBIA atuku mafuta na li ti lo.’ ”

¹⁷Tongaso, David ahe mbeni bia ti totongo kuâ ti Saul na ti Jonatan.

¹⁸Lo mu yanga titene a fa bia ni na azo ti Juda. Bia ni ayeke “Bia ti kokora”. A wara ni na ya ti Mbeti ti zo ti mbirimbiri.

¹⁹Ae, Israel! A fâ akpengba turugu ti mo na ndö ti ahoto ti mo! Ae! Akpengba koli ti kodro ti mo ati na sese!

²⁰Ala tene tënë so na azo ti Gat pepe; ala gue na atënë ni na ndö ti alege ti Askalon pepe, ngbanga ti amaseka-wali ti azo ti Filistii awara ngia daa, ngbanga ti amaseka-wali ti azo so afâ *ganza pepe adodo na ngia.

²¹Ahoto ti Gilboa, ayeke nzoni ngu ti pere na ngu-Nzapa atuku na ndö ti ala pepe! Ayeke nzoni sese ti ala akiri adu akobe pepe! Biani, na ndo so laa a bi buba na tere ti akpengba zo ti bira; na ndo so laa akpaka mafuta pepe na tere ti *vala ti Saul.

²²Na dawa ti azo so alingbi ti fâ ala, na dawa ti angangu wato, kokora ti Jonatan ayeke kiri ka na peko pepe, yongoro zeme ti Saul ayeke kiri ka senge pepe.

²³Na lango ti fini Saul na Jonatan kue, azo so aye ala mingi. Ataa so ala kui, kuâ akangbi ala pepe. Ala yapu lani mingi ahon *angoalo, ngangu ti ala ahon ngangu ti abamara.

²⁴Amaseka-wali ti Israel, ala toto Saul maa! Lo so lani lo yeke mu na ala apendere bongo, na aye ti pendere si lo yeke zia lôro ti pendere na tere ti bongo ti ala so.

²⁵Ae! A fâ akpengba turugu na ya ti bira awe! Jonatan akui na ndö ti ahoto ti mo, Israel!

²⁶Ita ti mbi Jonatan, ndali ti mo, mbi yeke na vundu. Mo ye mbi lani mingi; yengo so mo ye na mbi ahon ti so koli aye wali ti lo.

²⁷Ae! A fâ akpengba turugu awe! Aye ti bira ti ala abuba awe!