Read La Bible en Sango courant – Mbeti ti Nzapa 2 Samuel 12 Bible Online

2 Samuel 12 - La Bible en Sango courant – Mbeti ti Nzapa bible

2 Samuel 12

¹*KOTA GBIA atokua wayanga-Nzapa Natan na David. Natan ague, awara lo si atene na lo: “Na ya ti mbeni kodro, akoli use ayeke daa; mbeni ayeke zo ti mosoro, mbeni ayeke zo ti mawa.

²Zo ti mosoro ni ayeke na ataba na abagara mingi.

³Zo ti mawa ni ayeke gi na kete taba oko so lo vo vongo. Lo yeke bata taba ni na da ti lo si taba ni na amolenge ti lo akono legeoko. Taba ni ayeke te gi kete kobe so zo ti mawa ni ayeke te, taba ni ayeke nyon gi kete ngu so zo ti mawa ni ayeke nyon, taba ni ayeke lango na ya ti maboko ti wa ti lo. Taba ni aga tongana molenge ti lo ti wali.

⁴Mbeni lâ, mbeni gene asi na da ti zo ti mosoro ni. Lo ke ti gbu mbeni taba ti lo oko wala mbeni bagara ti lo oko ti fâ ti to na gene so aga na da ti lo so. Me lo gbu kete taba ti zo ti mawa ni si lo fâ lo, lo to na gene so aga na da ti lo so.”

⁵Ngonzo agbu David mingi na tere ti koli so. Lo tene na Natan: “KOTA GBIA ayeke na fini! Koli so asara ye so alingbi na kuâ.

⁶So lo baa mawa ti mba ti lo pepe so, ayeke nzoni lo futa ataba osio na mba ti lo ni.”

⁷Natan atene na David: “Koli so asara ye so, mo laa! Baa, tënë so KOTA GBIA, Nzapa ti Israel atene ayeke so: ‘Mbi laa mbi tuku mafuta na li ti mo titene mo ga gbia ti Israel. Mbi nga laa mbi zi mo na maboko ti Saul.

⁸Mbi zia sewa ti wa ti mo na maboko ti mo. Mbi zia nga awali ti wa ti mo na kate ti mo. Azo ti Israel na azo ti Juda kue ayeke na gbe ti mo; so kue alingbi na mo pepe? Mbi lingbi ti zia mbeni ye daa tongana mo ye.

⁹Ngbanga ti nyen si mo baa tënë ti mbi, KOTA GBIA, tongana mbumbuse ye si mo sara ye so anzere na mbi pepe so? Mo fâ Urii, zo ti mara ti Het. Mo laa mo sara kue titene azo ti mara ti Amon afâ lo. Na pekoni, mo mu wali ti lo ti ga wali ti mo.

¹⁰Ti fadeso, tënë ti fango zo ayeke ngba lakue na ya ti da ti mo, ngbanga ti so mo baa mbi tongana mbumbuse ye si mo mu wali ti Urii, zo ti mara ti Het si lo ga wali ti mo.

¹¹Tënë so KOTA GBIA atene ayeke so: Mbi yeke sara titene mbeni ye ti sioni alondo na da ti mo wani si awara mo. Fade mbi yeke mu awali ti mo na le ti mo ti mu na mbeni koli so mo hinga lo nzoni; koli ni ayeke lango na awali ti mo na kota lâ.

¹²Biani, mo sara ti mo ye ni na hondengo ni. Ti mbi, mbi yeke sara ye ni na kota lâ, na le ti azo ti Israel kue.’ ”

¹³David atene na Natan: “Mbi sara siokpari so ake KOTA GBIA awe.” Natan akiri tënë na David, atene: “KOTA GBIA azi siokpari na li ti mo awe; mo yeke kui pepe.

¹⁴Me ye oko, mo bi buba na tere ti KOTA GBIA, nilaa molenge so a du lo na mo so ayeke kui.”

¹⁵Na pekoni, Natan akiri na da ti lo. Molenge so wali ti Urii adu na David so, *KOTA GBIA apika lo na kobela.

¹⁶David avoro Nzapa ndali ti molenge ni, lo ke kobe ti sambela. Na bi, na da ti lo, lo yeke lango gi na sese.

¹⁷Akota zo ti da ti lo atene na lo ti lango na sese pepe; me lo ke, lo ke nga ti te kobe na ala.

¹⁸Na lango mbarambara ni, molenge ni akui. Azo ti kua ti David asara mbeto ti tene tënë ti kuâ ni na lo. Ala tene na popo ti ala: “So molenge ni angba na fini so, e tene tënë na lo gbaa, lo ma e pepe. Ka so molenge ni akui awe so, fade e tene tënë ni na lo tongana nyen? Lo lingbi ti sara mbeni ye ti sioni!”

¹⁹So David abaa azo ti kua ti lo ayeke tene tënë na gbe ti go ti ala na popo ti ala, lo hinga lo tene, molenge ni akui awe. Nilaa lo hunda ala, lo tene: “Molenge ni akui awe?” Ala kiri tënë na lo: “Een, lo kui awe.”

²⁰Tongaso, David alondo na sese, lo sukula ngu, lo sara yombo na tere ti lo, lo sanze abongo ti lo. Na pekoni, lo gue na ya ti da ti KOTA GBIA ti voro lo. So lo kiri na da ti lo awe, lo hunda titene a ga na lo kobe lo te.

²¹Azo ti kua ti lo ahunda lo: “Nyen laa mo sara tongaso so? So lani molenge ni angba na fini so, mo ke ti te kobe si mo yeke toto; so molenge ni akui awe so, mo londo, mo te kobe!”

²²David atene: “So lani molenge ni angba na fini, mbi ke ti te kobe si mbi toto, ngbanga ti so mbi tene na be ti mbi, mbi tene: ‘Mbi hinga pepe, wala KOTA GBIA ayeke baa mawa ti mbi si molenge ni ayeke kui pepe.’

²³Me so lo kui awe so, mbi yeke kiri ti ke kobe ngbanga ti nyen? Mbi lingbi ti sara si lo kiri na fini? Mbi laa mbi yeke gue ande ti wara lo; me lo laa lo yeke ga na mbage ti mbi pepe.”

²⁴David ague, ade be ti wali ti lo Batsheba. Lo na lo abongbi. Batsheba adu molenge-koli si David adi iri ti lo Salomon. *KOTA GBIA aye molenge ni.

²⁵KOTA GBIA amu yanga na wayanga-Nzapa Natan ti zia iri na ndö ti molenge ni. Nilaa Natan adi iri ti molenge ni Yedidia, so ti tene “KOTA GBIA aye lo”.

²⁶Yoab atiri bira na azo ti Raba, li-kodro ti azo ti Amon; lo mu vaka so gbia ni ayeke lango daa.

²⁷Lo tokua azo na David, lo tene: “Mbi tiri bira na azo ti Raba, mbi mu vaka so a yeke bata ka ngu daa so awe.

²⁸Fadeso, ayeke nzoni mo bongbi tanga ti aturugu kue, mo ga, mo ngoro gbata ti Raba ni, mo mu ni na bira. Tongaso pepe, tongana mbi mu ni, azo ayeke gonda iri ti mbi ndali ni.”

²⁹David abongbi aturugu ni kue si lo gue na gbata ti Raba, lo tiri bira na azo ni si lo mu gbata ni.

³⁰David azi kpoto so ayeke na li ti nzapa ti azo ti Amon, so iri ti lo ayeke Milkom. A leke kpoto ni na lôro so nengo ni alingbi na kilo baleota; mbeni têne ti ngangu ngere ayeke na tere ni. A zia têne ni na tere ti kpoto ti gbia David. Aye so lo gbu na peko ti bira na ya ti gbata ni si lo gue na ni ayeke mingi.

³¹David amu azo ti gbata ni ague na ala; lo mu na ala angangu kua ti sarango ni. Ambeni ayeke suru akeke, ambeni ayeke de tere ti atêne, ambeni ayeke de akeke, ambeni ayeke do ya ti potopoto ti sara na biriki. David asara mara ti ye tongaso na azo ti agbata ti azo ti Amon kue. Na pekoni, David na aturugu ti lo kue akiri na Jérusalem.