Read La Bible en Sango courant – Mbeti ti Nzapa 2 Samuel 13 Bible Online

2 Samuel 13 - La Bible en Sango courant – Mbeti ti Nzapa bible

2 Samuel 13

¹Ye so asi na peko ni ayeke so: Absalom, molenge ti David ayeke na mbeni ita ti lo ti wali so apendere mingi; iri ti lo Tamar. Amnon so ayeke nga mbeni molenge ti David asara nzara ti Tamar.

²Be ti Amnon ayeke gi na nduzu ndali ti ita ti lo Tamar. Biani Tamar ade ti hinga koli pepe, nilaa ayeke ngangu na Amnon ti pusu nduru na Tamar.

³Mbeni mba ti Amnon ayeke daa; iri ti lo Yonadab. Lo yeke molenge ti Shama; Shama ni ayeke ita ti David. Yonadab ayeke mbeni zo so ayeke sara ye na lege ti ndara mingi.

⁴Yonadab ahunda Amnon, atene: “Molenge ti gbia, ngbanga ti nyen laa lakue na ndaperere tere ti mo anzere pepe so? Mo lingbi ti tene na mbi nda ni pepe?” Amnon akiri tënë na lo: “Mbi sara nzara ti Tamar mingi, ita ti Absalom ti wali so ayeke nga ita ti mbi.”

⁵Yonadab atene na lo: “Lango na ndö ti gbogbo ti mo, sara tongana zo so tere ti lo aso. Tongana babâ ti mo aga ti baa mo, fade mo tene na lo: ‘Zia lege na ita ti mbi ti wali Tamar aga ato na mbi kobe. Fade lo to kobe ni na le ti mbi; lo wani, lo mu kobe ni na mbi si mbi te.’ ”

⁶Amnon alango na ndö ti gbogbo, lo sara ye tongana zo so tere ti lo aso. Gbia aga abaa lo si lo tene na gbia ni: “Zia lege na ita ti mbi ti wali Tamar aga asara gatoo use na mbi. Ayeke nzoni lo sara gi na le ti mbi, lo wani, lo mu na mbi si mbi te.”

⁷David atokua mbeni zo na da ti Tamar si atene na lo: “Gue na da ti ita ti mo Amnon, mo to kobe na lo.”

⁸Tamar ague na da ti ita ti lo Amnon, lo wara Amnon na ndö ti gbogbo. Tamar amu farini, lo tuku ngu daa, lo gbu ya ni si lo sara gatoo gi na le ti Amnon.

⁹Na pekoni, lo mu mbeni sembe, lo zia agatoo ni daa. Me Amnon ake ti te ni; lo tene: “Azo kue asigigi na da ti mbi!” Azo ni kue asigigi.

¹⁰Tongaso Amnon atene na Tamar: “Ga na agatoo ni na ya ti kubu ti mbi ge. Ge laa mo wani, mo yeke mu na mbi si mbi te.” Tamar amu agatoo so lo sara so, lo gue na ni na ita ti lo Amnon na ya ti kubu ni.

¹¹Na ndembe so Tamar ayeke mu na lo gatoo ni ti tene lo te, Amnon agbu lo si atene na lo: “Ita ti mbi, ga, mo lango na mbi!”

¹²Tamar atene: “Ên-en, ita ti mbi; mo buba mbi pepe. Azo ti Israel ayeke sara mara ti ye tongaso pepe, sara ye ti buba tongaso pepe!

¹³Mbi, mbi yeke zia kamene ni na ndo wa? Ti mo, mo yeke ga buba na sese ti Israel. Tongana ye ni ayeke tongaso, ayeke nzoni mo tene tënë ni na gbia si. Lo yeke ke pepe titene mbi ga wali ti mo.”

¹⁴Me Amnon aye ti ma lo pepe. Lo gbu Tamar na ngangu si lo hinga lo.

¹⁵Na pekoni, be ti Amnon akiri ake Tamar mingi. Lo ke Tamar ahon nzara ti lo so lo yeke na ni kozo so. Amnon atene na Tamar: “Londo, mo hon kâ!”

¹⁶Tamar akiri tënë na lo: “Tongana mo tumba mbi, so ayeke sioni mingi ahon ye so mo sara na mbi so.” Me Amnon aye ti ma lo pepe.

¹⁷Lo iri maseka-koli so ayeke sara kua na lo si lo tene na lo: “Mo tumba lo so na da ti mbi, lo sigigi! Mo kanga yanga ti da ni.”

¹⁸Zo ti kua ti Amnon atumba Tamar si lo kanga yanga ti da na peko ti so lo hon so. Tamar ayu mbeni yongoro bongo ti nzoroko, ngbanga ti so lege so amolenge-wali ti gbia so ade ti hinga koli pepe ayeke yu kâ bongo laa.

¹⁹Tamar amu mburu ti wâ, lo tuku na li ti lo, lo suru yongoro bongo ti nzoroko so lo yu so. Lo zia maboko ti lo na li ti lo si lo gue na dekongo na yanga ti lo.

²⁰Ita ti lo Absalom ahunda lo, atene: “Ita ti mo Amnon alango na mo? De be ti mo! Tene tënë ni na zo oko pepe; ita ti mo laa. Zia be ti mo daa pepe.” Nilaa Tamar ayeke lango na ya ti da ti ita ti lo Absalom tongana mbeni wali so zo ado lo azia.

²¹So gbia David ama tënë ti ye so asi so, ngonzo agbu lo mingi.

²²Absalom azi yanga oko na Amnon pepe, be ti lo ake Amnon ngbanga ti so lo buba Tamar, ita ti Absalom.

²³So ngu use ahon awe, azo ague ti fâ kua ti tere ti ataba na da ti Absalom, na Baal-Hasor, nduru na Efraim. Absalom atisa amolenge ti gbia kue na matanga ni.

²⁴Absalom ague, awara gbia si atene na lo: “Gbia, mbi yeke na azo ti fango kua ti tere ti ataba na da ti mbi. Tongana gbia abaa nzoni, lo na azo ti yangbo ti lo kue aga daa maa.”

²⁵Gbia akiri tënë na Absalom: “Ên-en, molenge ti mbi! Tongana e kue, e gue, fade ayeke ga kungba na ndö ti mo mingi.” Absalom angba gi na ndö ti tisango ndo ni, me gbia ake ti gue. Lo sara gi tufa na ndö ti Absalom.

²⁶Absalom atene: “Zia lege na ita ti mbi Amnon, e na lo, e gue ma!” Gbia akiri tënë na lo: “Lo gue na ndo ti mo ngbanga ti nyen?”

²⁷Absalom angba gi na ndö ti oko hunda ni si gbia azia lege na Amnon na tanga ti amolenge ni kue ti gue.

²⁸Na pekoni, Absalom amu yanga na azo ti kua ti lo, atene: “Ala baa Amnon nzoni. Na ndembe so lo nyon samba ahon ndö ti lo si be ti lo ayeke na ngia, tongana mbi tene na ala: ‘Ala pika Amnon!’, fade ala pika lo, ala fâ lo. Ala sara mbeto pepe, mbi laa mbi mu yanga na ala! Ala gbu ngangu, ala sara ye ti koli!”

²⁹Azo ti kua ti Absalom asara na Amnon alingbi gi na tënë so Absalom atene na ala. Amolenge ti gbia ni kue alondo, zo oko oko ako na ndö ti *pâkârâ ti lo si lo kpe.

³⁰Ala ngba na lege ti guengo ni si David ama, atene: “Absalom afâ amolenge-koli kue ti gbia, mbeni oko angba na fini pepe.”

³¹Gbia alondo, lo suru bongo na tere ti lo si lo lango na sese. Azo ti kua ti lo kue ayeke luti na tere ti lo na surungo bongo na tere ti ala.

³²Yonadab, molenge ti Shama, ita ti David amu tënë si atene: “Gbia ti mbi, a fâ amolenge ti mo kue pepe. Gi Amnon oko laa akui. Absalom aleke lani na be ti lo ti sara ye so na ngoi so Amnon abuba Tamar so.

³³Ayeke nzoni gbia abaa atene, a fâ amolenge ti lo kue awe pepe. Gi Amnon oko laa akui

³⁴si Absalom akpe ahon.” Maseka-koli so a zia lo tongana sanziri ayo le ti lo na nduzu si lo baa gbaa ti azo asigigi na mbage ti peko ti lo na tere ti hoto si ayeke ga.

³⁵Yonadab atene na gbia: “Baa amolenge ti gbia laa ayeke ga so. Tënë so mbi ngba ti tene so laa.”

³⁶Gi so lo hunzi ti tene tënë tongaso, amolenge ti gbia asi. Ala ti na kota toto; gbia na azo ti yangbo ti lo kue atoto mingi nga.

³⁷Absalom akpe ague na ndo ti Talmai, molenge ti Amihud. Talmai ayeke gbia ti Geshur. Na ngoi ni so kue, David angba ti sara mua ti molenge ti lo Amnon.

³⁸Ti Absalom, so lo kpe lani lo gue na Geshur, lo duti kâ ngu ota.

³⁹Na pekoni, gbia David azia lege ti ngonzo so lo sara na tere ti Absalom, ngbanga ti so be ti lo ade awe ndali ti kuâ ti Amnon.