Read La Bible en Sango courant – Mbeti ti Nzapa 1 Agbia 14 Bible Online

1 Agbia 14 - La Bible en Sango courant – Mbeti ti Nzapa bible

1 Agbia 14

¹Na ngoi ni so Abia, molenge ti Yeroboam ati na kobela.

²Yeroboam atene na wali ti lo: “Mo yu bongo nde titene azo ahinga atene, mo laa wali ti gbia pepe. Na pekoni, mo gue na Silo. Wayanga-Nzapa Ahia ayeke kâ. Lo laa lo tene na mbi, lo tene, fade mbi yeke ga gbia ti azo ti Israel.

³Na guengo ti mo, mo mu mapa baleoko, ambeni gatoo nga na mbeni ta ti mafuta ti wotoro. Fade lo yeke fa na mo ye so ayeke si na molenge ti e.”

⁴Wali ti Yeroboam asara ye tongaso: lo gue na Silo si lo li na da ti Ahia. Andaa wayanga-Nzapa Ahia aga mbakoro awe, le ti lo avuko, lo lingbi ti baa ndo pepe.

⁵Me *KOTA GBIA atene na Ahia: “Wali ti Yeroboam ayeke na lege ti ga ti baa mo ndali ti molenge ti lo so ayeke na kobela. Na singo ti lo ge, lo yeke tara ti sara titene azo abaa lo tongana mbeni wali nde. Fade mo yeke tene na lo atënë tongaso, tongaso.”

⁶Gi so wayanga-Nzapa Ahia ama toto ti gere ti wali ni na lingo ti lo na ya ti da, lo tene: “Wali ti Yeroboam, mo li ma! Ngbanga ti nyen si mo tara ti sara titene azo abaa mo tongana mbeni wali nde so? Mbi yeke na mbeni sioni sango ndali ti mo.

⁷Kiri, mo tene na Yeroboam, mo tene: Tënë so KOTA GBIA, Nzapa ti Israel atene ayeke so: ‘Kozoni mo yeke gi senge zo na popo ti azo ti Israel. Mbi mu mo, mbi sara si mo ga gbia ti azo ti Israel, azo ti mbi.

⁸Mbi zi mbata ti gbia na gbe ti azo ti sewa ti David, mbi mu na mo. Me mo sara ye tongana zo ti kua ti mbi David pepe; lo so lo sara ye alingbi na andia ti mbi, lo mu peko ti mbi na be ti lo kue si lo sara ye so ayeke mbirimbiri na le ti mbi.

⁹Ti mo, mo sara ye ti sioni mingi ahon azo so kue ayeke kozoni na mo: mo zia ngonzo na be ti mbi na lege so mo sara ndali ti mo wani anzapa nde nga na ayanda so mo kporo bengba wen si mo sara na ni; mo zia mbi na peko!

¹⁰Ndani laa, fade mbi yeke tokua kpale na ndö ti sewa ti mo. Mbi yeke hunzi akoli so kue ayeke na ya ti sewa ti mo, akoli na amolenge so ayeke na sese ti Israel. Fade mbi yeke zi azo ti sewa ti Yeroboam kue kue kue tongana ti so zo ayeke zi azende si mbeni ye oko akiri angba pepe.

¹¹Azo ti sewa ti mo so kue ayeke kui na ya ti gbata, fade ambo ayeke te kuâ ti ala. Ala so ayeke kui na ya ti ngonda, fade andeke ti nduzu ayeke te kuâ ti ala.’ So tënë ti yanga ti KOTA GBIA laa.”

¹²Wayanga-Nzapa Ahia akiri atene: “Ti mo, wali ti Yeroboam, kiri na ndo ti mo! Gi na ndembe so mo yeke li ande na ya ti gbata ni, molenge ti mo ayeke kui.

¹³Azo ti Israel kue ayeke toto kuâ ti lo, na pekoni ala yeke lu lo. Na popo ti azo ti sewa ti Yeroboam kue, gi lo oko laa du ti kuâ ti lo ayeke duti daa. Biani, Na popo ti azo ti sewa so kue, gi lo oko laa KOTA GBIA, Nzapa ti Israel awara nzoni ye na lege ti lo.

¹⁴Na pekoni, fade KOTA GBIA ayeke mu mbeni fini gbia na azo ti Israel. Gbia ni ayeke hunzi azo ti sewa ti Yeroboam kue. — Tongana nyen? Ye ni laa asi laso awe so! Asi fafadeso awe! —

¹⁵KOTA GBIA ayeke pika azo ti Israel si ala yeke ga tongana sosongo so ayeke yingi na le ti ngu. KOTA GBIA ayeke zi ala na ndö ti nzoni sese so lo mu ando na akotara ti ala si lo yeke kangbi ala kirikiri na mbage ti ngu ti Efrate. Ye ni ayeke si ande na ala, ngbanga ti so ala zia ngonzo na be ti KOTA GBIA na lege so ala akeke aluti na nduzu ndali ti nzapa-wali *Ashera.

¹⁶KOTA GBIA ayeke do azo ti Israel ti zia, ngbanga ti so Yeroboam asara siokpari si lo pusu nga azo ti Israel ti sara siokpari.”

¹⁷Wali ti Yeroboam alondo, lo kiri na gbata ti Tirsa. Gi so gere ti lo ado yanga ti da ti lo, molenge ti lo akui.

¹⁸A lu lo si azo ti Israel atoto kuâ ti lo alingbi na tënë so KOTA GBIA atene na lege ti zo ti kua ti lo, wayanga-Nzapa Ahia.

¹⁹Tanga ti atënë na ndö ti Yeroboam, atënë ti abira so lo sara na atënë ti lengo-gbia ti lo, a su tënë ni kue na ya ti “Mbeti ti aye so agbia ti Israel asara”.

²⁰Yeroboam ale-gbia ngu baleuse na use; na pekoni, lo kui, lo hon na peko ti ababâ ti lo. Molenge ti lo Nadab laa aga gbia na peko ti lo.

²¹Roboam, molenge ti Salomon ale-gbia na Juda. Lo yeke na ngu baleosio na oko si lo ga gbia; lo le-gbia ngu baleoko na mbarambara na Jérusalem, gbata so *KOTA GBIA asoro na popo ti amara kue ti Israel titene iri ti lo aduti na ndö ni. Iri ti mama ti lo ayeke Naama, zo ti mara ti Amon.

²²Azo ti mara ti Juda asara ye so ayeke sioni na le ti KOTA GBIA. Ala sara si ngonzo ti lo alondo na lege ti siokpari so ala sara ahon ti akotara ti ala.

²³Legeoko tongana akotara ti ala, ala leke ando na ndö ti ahoto titene ala voro anzapa nde daa; ala leke angbongboro têne so aluti na nduzu, ala leke nga akeke so aluti na nduzu ndali ti nzapa-wali Ashera. Ala zia aye ni so na li ti akete hoto kue nga na gbe ti afini keke so kue kugbe ni ayeke gbani gbani.

²⁴Na ya ti kodro ni, akoli na awali ayeke nga daa so ayeke sara aye ti ndumba ndali ti anzapa nde. Azo ti Juda ahaka peko ti asioni sarango ye kue ti amara so KOTA GBIA atumba ala na ndö ti sese ni ti mu na azo ti Israel.

²⁵Na ngu oku ni so Roboam ayeke gbia, Shishak, gbia ti Ezipte aga ti tiri bira na Jérusalem.

²⁶Lo mu amosoro so a bata na ya ti kubu ti da ti KOTA GBIA nga na amosoro so ayeke na ya ti yangbo ti gbia, lo hon na ni; lo mu aye kue kue kue, ataa *avala ti lôro so Salomon amu yanga si a sara ni ando so.

²⁷Gbia Roboam asara avala na bengba wen, lo mu ni na amakonzi ti aturugu so ayeke bata yanga ti yangbo ti gbia.

²⁸Lakue tongana gbia ayeke gue na ya ti kota da ti KOTA GBIA, aturugu ti batango gbia ayeke yo avala ni; na pekoni, ala yeke kiri na ni na da ti aturugu ti batango gbia.

²⁹Tanga ti atënë na ndö ti Roboam na aye so kue lo sara, a su tënë ni na ya ti “Mbeti ti aye so agbia ti Juda asara”.

³⁰Bira angba lakue na popo ti Roboam na Yeroboam.

³¹Roboam akui, lo hon na peko ti ababâ ti lo; a lu lo na tere ti ababâ ti lo na Gbata ti David. Iri ti mama ti lo ayeke Naama, zo ti mara ti Amon. Molenge ti lo Abiam aga gbia na peko ti lo.