Read La Bible en Sango courant – Mbeti ti Nzapa 1 Agbia 15 Bible Online

1 Agbia 15 - La Bible en Sango courant – Mbeti ti Nzapa bible

1 Agbia 15

¹Na ngu baleoko na miombe ni so Yeroboam, molenge ti Nebat, ayeke gbia ti Israel, Abiam aga gbia ti Juda.

²Lo le-gbia ngu ota na Jérusalem. Iri ti mama ti lo ayeke Maaka, molenge ti Abishalom.

³Abiam asara gi amara ti siokpari so kue babâ ti lo asara kozoni na lo. David, kotara ti lo amu ando be ti lo kue na *KOTA GBIA, Nzapa ti lo. Me ti Abiam, lo sara tongaso pepe.

⁴Me ndali ti David, KOTA GBIA, Nzapa ti lo amu na lo mbeni molenge-koli ti ga gbia na peko ti lo. Tongaso si sewa ti lo angba na ndö ti mbata ti gbia lakue si Jérusalem angba kota gbata ti gbia ni.

⁵Biani, David asara ando ye so ayeke mbirimbiri na le ti KOTA GBIA. Na lango so kue lo ngba na fini, aye so kue KOTA GBIA amu yanga na lo ti sarango ni, lo ke ti sara ni laoko pepe. Me sioni ye oko so lo sara ni ayeke tënë ti Urii, zo ti mara ti Het.

⁶Na lango so kue Roboam angba ti le-gbia, bira ayeke na popo ti lo na Yeroboam.

⁷Tanga ti atënë na ndö ti Abiam, aye so kue lo sara, a su tënë ni na ya ti “Mbeti ti aye so agbia ti Juda asara”. Bira ayeke lani na popo ti Abiam na Yeroboam.

⁸Abiam akui, lo hon na peko ti ababâ ti lo; a lu lo na Gbata ti David. Molenge ti lo Asa aga gbia na peko ti lo.

⁹Na ngu baleuse ni so Yeroboam ayeke gbia ti Israel, Asa aga gbia ti Juda.

¹⁰Lo le-gbia ngu baleosio na oko na Jérusalem. Iri ti mama ti lo ayeke Maaka, molenge ti Abishalom.

¹¹Asa asara ye so ayeke nzoni na le ti *KOTA GBIA tongana ti David, kotara ti lo.

¹²Lo tumba na ya ti kodro ni akoli na awali so ayeke sara aye ti ndumba ndali ti anzapa nde, lo zi ayanda so kue akotara ti lo asara.

¹³Ataa mama ti lo Maaka, lo zi iri ti “Gbia-wali” so ayeke na ndö ti lo, ngbanga ti so mama ti lo ni asara mbeni sioni yanda ndali ti nzapa-wali *Ashera. Asa amu yanga titene a kungbi yanda ni so na sese si a gbi ni na popo-hoto ti Sedron.

¹⁴Me ando so azo aleke na ndö ti ahoto ti voro anzapa nde daa, Asa azi ni pepe, ataa so lo mu be ti lo kue na KOTA GBIA na lango so kue lo ngba na fini.

¹⁵Aye so babâ ti lo amu na Nzapa nga na aye so lo wani, lo mu na Nzapa, lo mu ni lo ga na ni na ya ti kota da ti KOTA GBIA; aye ni ayeke so: wen ti nginza, lôro na ambeni kungba nde nde.

¹⁶Na lango so kue Asa na Basha, gbia ti Israel angba ti le-gbia, bira ayeke na popo ti ala.

¹⁷Mbeni lâ, Basha aga ti tiri bira na azo ti Juda. Lo sara ngangu gbagba na tere ti gbata ti Rama ti kanga lege na Asa, gbia ti Juda titene lo na azo ti lo ali wala asigigi pepe.

¹⁸Tongaso Asa amu wen ti nginza na lôro so kue angba na ya ti kubu ti amosoro ti kota da ti KOTA GBIA na ti so angba na yangbo ti gbia, lo zia ni na maboko ti azo ti kua ti lo. Na pekoni, gbia atokua azo ni titene ala gue na amosoro ni na Damas ti mu na Ben-Hadad, gbia ti Sirii. Ben-Hadad ayeke molenge ti Tabrimon, molenge ti Hezion. Asa atene na gbia Ben-Hadad, atene:

¹⁹“Ayeke nzoni mbi na mo, e ga *ambuki tongana ti so babâ ti mbi na babâ ti mo asara ando so. Baa, wen ti nginza na lôro laa mbi tokua na mo na kadoo so. Gue mo buba ya ti mbuki ti mo na Basha, gbia ti Israel, tongaso si lo zia ti tiri bira na mbi.”

²⁰Ben-Hadad ayeda na tënë ti gbia Asa si lo tokua amakonzi ti aturugu ti lo ti gue ti tiri bira na agbata ti Israel. Ala mu agbata ti Yon, ti Dan, ti Abel-Bet-Maaka nga na sese ti Kineret, na tanga ti sese ti Neftali kue.

²¹Gi so Basha ama tënë ni, lo zia lege ti sarango ngangu gbagba na tere ti gbata ti Rama si lo kiri ti duti na Tirsa.

²²Tongaso gbia Asa airi azo ti sese ti Juda kue, lo zia zo oko pepe. Ala ga si ala ro atêne na akeke so Basha ayeke sara na ngangu gbagba na tere ti gbata ti Rama so, ala gue na ni. Asa amu atêne na akeke ni si lo sara na ngangu gbagba na tere ti gbata ti Geba, ti Benjamin na ti Mispa.

²³Tanga ti atënë na ndö ti Asa, aye so kue lo sara, aye ti koli so kue lo sara na tënë ti agbata so lo sara angangu gbagba na tere ni, a su tënë ni na ya ti “Mbeti ti aye so agbia ti Juda asara”. Me na ngoi so lo ga mbakoro awe, kobela ti gere asara lo.

²⁴Asa akui, lo hon na peko ti ababâ ti lo si a lu lo na tere ti ababâ ti lo na Gbata ti David. Molenge ti lo Yosafat laa aga gbia na peko ti lo.

²⁵Na ngu use ni so Asa ayeke gbia ti Juda, Nadab, molenge ti Yeroboam aga gbia ti Israel. Lo le-gbia ngu use na Israel.

²⁶Nadab asara ye so ayeke sioni na le ti *KOTA GBIA; lo mu gi peko ti sioni sarango ye ti babâ ti lo Yeroboam so lani apusu azo ti Israel ti sara siokpari so.

²⁷Basha, molenge ti Ahia ti koli, zo ti mara ti Isakar aleke tënë na hondengo ni na tere ti Nadab. Andaa Nadab na aturugu ti Israel angoro gbata ti Gibeton ti mu ni na bira. Gibeton ayeke mbeni gbata so ayeke na gbe ti azo ti mara ti Filistii. Na ndembe so laa Basha afâ gbia Nadab.

²⁸Basha afâ Nadab na ngu ota ni so Asa ayeke gbia ti Juda. Basha aga gbia na peko ti lo.

²⁹So Basha aga gbia awe, lo fâ azo ti sewa ti Yeroboam kue; lo zia mbeni zo oko angba na fini pepe. Lo fâ azo ni kue, lo hunzi ala alingbi na tënë so KOTA GBIA atene na lege ti zo ti kua ti lo Ahia, zo ti kodro ti Silo.

³⁰Ye so kue asi, ngbanga ti so Yeroboam asara siokpari, lo pusu nga azo ti Israel ti sara oko siokpari so lo sara; ye so asara si ngonzo ti KOTA GBIA, Nzapa ti Israel alondo mingi.

³¹Tanga ti atënë na ndö ti Nadab na aye so kue lo sara, a su tënë ni na ya ti “Mbeti ti aye so agbia ti Israel asara”.

³²Na lango so kue Asa na Basha, gbia ti Israel angba ti le-gbia, bira ayeke na popo ti ala.

³³Na ngu ota ni so Asa ayeke gbia ti Juda, Basha, molenge ti Ahia aga gbia ti Israel kue. Lo le-gbia ngu baleuse na osio na Tirsa.

³⁴Lo sara ye so ayeke sioni na le ti *KOTA GBIA; lo mu gi peko ti sioni sarango ye ti babâ ti lo Yeroboam so apusu lani azo ti Israel ti sara siokpari.