Read La Bible en Sango courant – Mbeti ti Nzapa 1 Agbia 19 Bible Online

1 Agbia 19 - La Bible en Sango courant – Mbeti ti Nzapa bible

1 Agbia 19

¹Akab afa na wali ti lo Yezabel peko ti aye so kue Élie asara; lo fa nga na Yezabel lege so Élie afâ na awayanga ti nzapa *Baal kue.

²Tongaso Yezabel atokua mbeni zo na Élie ti tene na lo: “Kekereke gi na oko ngbonga so, tongana mbi sara na mo mara ti ye so mo sara na awayanga ti nzapa Baal so pepe, ayeke nzoni anzapa asara ye ti ngangu mingi na mbi!”

³Mbeto agbu Élie si lo kpe, lo gue na mbeni ndo titene lo soo fini ti lo. Lo si na Bersheba, na sese ti Juda si lo zia zo ti kua ti lo kâ.

⁴Ti lo, lo gue na benyama; lo tambula na ya ti lango oko si lo si kâ. So Élie asi kâ awe, lo duti na gbe ti mbeni kete keke. Lo iri kuâ titene aga amu lo, lo tene: “*KOTA GBIA, fadeso ye ni ahon ndoni awe! Mo mu fini ti mbi. Biani, mbi yeke nzoni mbi hon akotara ti mbi pepe.”

⁵Na pekoni, lo lango na sese na gbe ti kete keke ni si lango ahon na lo. Me mbeni *ange aga andu lo si atene na lo: “Londo mo te kobe!”

⁶Élie abaa ndo si nduru na tere ti li ti lo, lo baa mbeni gatoo so a zö ni na ndö ti têne so amu wâ mingi; lo baa nga mbeni ngbenda ti ngu. Lo te, lo nyon si na pekoni lo kiri lo lango na sese.

⁷Me ange ti KOTA GBIA akiri aga andu lo si atene na lo: “Londo mo te kobe, ngbanga ti so lege angba ti yo na mo.”

⁸Élie alondo, lo te, lo nyon. So lo wara ngangu na lege ti kobe so awe, lo tambula lango baleosio, na bi baleosio ngbii lo si na Horeb, hoto ti Nzapa.

⁹So Élie asi na hoto ti Horeb awe, lo li na ya ti mbeni kota du ti têne si lo lango daa. Kâ, tënë ti *KOTA GBIA asi na lo, atene: “Élie, nyen laa mo yeke sara ge, nyen?”

¹⁰Élie akiri tënë: “KOTA GBIA Nzapa, mo so ngangu ti mo ahon angangu kue, tënë ti mo agbu be ti mbi mingi. Me azo ti Israel azia lege ti *mbuki ti mo awe, ala kungbi na sese agbalaka ti mo si ala fâ awayanga ti mo. Mbi ngba gi mbi oko si azo ayeke gi lege ti fâ mbi.”

¹¹KOTA GBIA atene na lo: “Sigigi! Gue mo luti na dawa ti mbi na ndö ti hoto. Mbi KOTA GBIA, mbi yeke ga ti hon.” Kozo titene KOTA GBIA ahon, mbeni kota pupu aya ngangu mingi, asuru ya ti ahoto si afâ ya ti atêne; me KOTA GBIA ayeke na ya ti pupu ni pepe. Na peko ti pupu ni, sese ayingi; me KOTA GBIA ayeke na ya ti sese so ayingi so pepe.

¹²Na peko ti yingingo ti sese ni, wâ ayeke daa; me KOTA GBIA ayeke na ya ti wâ ni pepe. Na peko ti wâ ni, a ma mbeni go so atene tënë, me na nduzu pepe.

¹³Gi so Élie ama go ni so, lo mu kota bongo ti lo si lo kanga na le ti lo. Lo sigigi na ya ti kota du ni si lo luti na yanga ni. Lo ma mbeni go so atene na lo: “Élie, nyen laa mo yeke sara ge, nyen?”

¹⁴Élie akiri tënë: “KOTA GBIA Nzapa, mo so ngangu ti mo ahon angangu kue, tënë ti mo agbu be ti mbi mingi. Me azo ti Israel azia lege ti mbuki ti mo awe, ala kungbi na sese agbalaka ti mo si ala fâ awayanga ti mo. Mbi ngba gi mbi oko si azo ayeke gi lege ti fâ mbi.”

¹⁵KOTA GBIA atene na lo: “Londo, mo mu gi lege ti benyama so mo ga daa so, mo gue ngbii mo si na Damas. Tongana mo si kâ, fade mo tuku mafuta na li ti Hazael titene lo ga gbia ti Sirii.

¹⁶Na pekoni, mo tuku mafuta na li ti Yehu, molenge ti Nimshi titene lo ga gbia ti Israel. Fade mo tuku mafuta na li ti Élisée, molenge ti Shafat, zo ti gbata ti Abel-Mehola titene lo sara kua ti wayanga-Nzapa na peko ti mo.

¹⁷Zo so kue ayeke kpe na maboko ti Hazael, fade Yehu ayeke fâ lo. Zo so kue ayeke kpe na maboko ti Yehu, fade Élisée ayeke fâ lo.

¹⁸Me fade mbi yeke bata azo saki mbarambara na Israel; azo ni ayeke azo so kue akuku na gbe ti nzapa *Baal pepe, ala su gere ti lo pepe.”

¹⁹Élie alondo kâ si lo hon. Lo gue, lo wara Élisée, molenge ti Shafat so lo ngba ti fâ yaka na abagara baleuse na osio so a kanga ala use use. Élie ahon nduru na tere ti Élisée, lo mu kota bongo ti lo si lo bi na ndö ti Élisée.

²⁰Élisée azia abagara ni, lo mu loro na peko ti Élie si lo tene na lo: “Mo zia, mbi gue, mbi su ngbangba ti babâ na mama ti mbi si; na pekoni fade mbi yeke ga ti mu peko ti mo.” Élie atene na lo: “Mo gue! Mo kiri na yanga ti kua ti mo. Nyen laa mbi sara na mo, nyen?”

²¹Élisée akiri na le ti yaka ti lo. Lo mu abagara use so, lo fâ ala si lo mu na *sandaga. Lo mu akeke ti *zuge ni na aye ti kua ni kue, lo sara na wâ, lo to na kasa ti abagara ni si lo mu na azo ni titene ala te. Na pekoni, lo londo, lo gue na peko ti Élie si lo ga zo ti kua ti lo.