Read La Bible en Sango courant – Mbeti ti Nzapa 2 Agbia 12 Bible Online

2 Agbia 12 - La Bible en Sango courant – Mbeti ti Nzapa bible

2 Agbia 12

¹Yoas ayeke na ngu mbarambara si lo ga gbia.

²Na ngu mbarambara ni so Yehu ayeke gbia ti Israel laa Yoas aga gbia. Lo le-gbia na Jérusalem ngu baleosio. Iri ti mama ti lo ayeke Sibia, zo ti Bersheba.

³Yoas asara ye so ayeke mbirimbiri na le ti *KOTA GBIA na lango ti fini ti lo kue, ngbanga ti so wayango-sandaga Yoyada afa lege na lo nzoni.

⁴Me ando so azo aleke na ndö ti ahoto ti voro anzapa nde daa, lo zi ni pepe. Azo angba ti gue kâ ti mu *asandaga na ti zö dukani.

⁵Mbeni lâ, Yoas atene na awayango-sandaga, atene: “Nginza so kue azo azia nde ndali ti KOTA GBIA si ala yeke ga na ni na da ti *KOTA GBIA, wala nginza ti azo so a diko wungo ti ala, wala nginza ti lapo so zo oko oko afuta ni alingbi na ngangu ti lo, wala nginza so azo amu na nzoni be,

⁶ayeke nzoni wayango-sandaga oko oko aro ni na maboko ti azo ti batango nginza ti lo. Ala yeke mu nginza ni ti leke na kota da ti KOTA GBIA, na ndo so kue ye abuba daa.”

⁷Me na ngu baleuse na ota ni so Yoas ayeke le-gbia, aye so abuba na tere ti kota da ti KOTA GBIA, awayango-sandaga ade ti leke ni pepe.

⁸Gbia Yoas airi wayango-sandaga Yoyada nga na tanga ti awayango-sandaga si lo tene na ala: “Aye so abuba na tere ti kota da ti KOTA GBIA so, ala leke ni pepe ngbanga ti nyen? Ti fadeso, azo so ayeke bata nginza ti ala so, ala awayango-sandaga, ala yeke kiri ti ro nginza na maboko ti azo ni pepe. Me fade ala yeke zia nginza ni titene a leke na aye so abuba na tere ti kota da ni.”

⁹Tongaso awayango-sandaga ayeda ti kiri ti mu nginza na maboko ti azo pepe ti leke na kota da ni.

¹⁰Wayango-sandaga Yoyada amu mbeni sanduku, lo koro du na yanga ni si lo zia na tere ti gbalaka, na mbage ti maboko ti koli na lingo na ya ti kota da ti KOTA GBIA. Nginza so kue azo ayeke ga na ni na ya ti kota da ti KOTA GBIA, awayango-sandaga so ayeke bata yanga ti kota da ni ayeke mu ni si ayeke zia na ya ti sanduku ni.

¹¹Tongana ala baa so nginza ayeke mingi na ya ti sanduku ni, wakuasu ti gbia na kota wayango-sandaga ayeke ga, ala mu nginza ni si ala diko ni.

¹²Na peko ti so ala diko nginza ni awe, ala mu ni na azo so ayeke na ndö ti kua ti lekengo kota da ti KOTA GBIA. Azo ni ayeke futa na asarapande nga na azo ti lekengo da ni, ala so ayeke sara kua na ya ti kota da ti KOTA GBIA,

¹³amason na azo ti dengo tere ti têne; ala yeke mu nga nginza ni ti vo na akeke nga na atêne so a de tere ni dengo, ti vo na aye so kue ala lingbi ti leke na kota da ni.

¹⁴Me nginza so azo aga na ni na ya ti kota da ti KOTA GBIA, a mu ni pepe ti sara na adu ti sembe, wala na aye ti mingongo na wâ ti lamba, wala na adu ti sembe so a yeke tuku mene daa ti fi na tere ti aye, wala na tatalita, wala na aye so a sara na lôro wala na wen ti nginza.

¹⁵A mu nginza ni kue na azo so ayeke na ndö ti kua ti lekengo kota da ni titene ala leke na kota da ti KOTA GBIA.

¹⁶Azo so a mu nginza ni na ala ti futa na azo ti kua ni, zo oko ahunda ala pepe titene ala fa peko ti nginza ni, ngbanga ti so ala sara ye na taa legeni na nginza ni.

¹⁷Âdu ti nginza so azo amu ndali ti sandaga ti lekengo tënë nga na nginza so azo amu ndali ti sandaga ti zingo siokpari na li ti ala, a tuku ni na ya ti sanduku ti kota da ti KOTA GBIA pepe, me nginza ni ayeke ti awayango-sandaga.

¹⁸Na ngoi ni so, Hazael, gbia ti Sirii aga ti tiri bira na gbata ti Gat si lo mu ni. Na pekoni, lo leke na be ti lo ti gue ti tiri bira na Jérusalem.

¹⁹Gi hio tongaso, Yoas, gbia ti Juda amu aye so kue lo wani na ababâ ti lo, agbia ti Juda, Yosafat, Yoram na Ahazia azia ni nde ndali ti *KOTA GBIA; Yoas amu nga lôro so kue ayeke na ya ti kubu ti batango amosoro ti kota da ti KOTA GBIA nga na lôro so ayeke na yangbo ti gbia; lo mu aye so kue lo tokua ni na Hazael, gbia ti Sirii. Tongaso gbia ti Sirii azia lege ti ga ti tiri bira na Jérusalem.

²⁰Tanga ti atënë na ndö ti Yoas na aye so kue lo sara, a su ni na ya ti “Mbeti ti aye so agbia ti Juda asara”.

²¹Azo ti yangbo ti Yoas atomboka si ala leke tënë na hondengo ni na tere ti lo. Ala fâ lo na Bet-Milo na ndembe so lo yeke zu ti gue na Sila.

²²Azo ti fango lo ni ayeke Yozabad, molenge ti Shimeat na Yehozabad, molenge ti Shomer. A lu lo na tere ti ababâ ti lo na Gbata ti David. Molenge ti lo Amasia laa aga gbia na peko ti lo.